دفتر الحضور اليومي [ الكاتب : عبد المنعم عبد الرحيم حضيري - آخر الردود : درماس - ]       »     دعواتكم بالشفاء للأخ مــامــا... [ الكاتب : درماس - آخر الردود : درماس - ]       »     فوائد ودرر [ الكاتب : فتح الرحمن احمد - آخر الردود : فتح الرحمن احمد - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     استراحة ما بعد الظهيرة [ الكاتب : أم مؤيد - آخر الردود : علي محمد أحمد (أبورنس) - ]       »     "العافى زيها مافى والطبيب السو... [ الكاتب : عمر محمد علي ترتوري - آخر الردود : عمر محمد علي ترتوري - ]       »     عُــــدنا ***والعـــــود ‘ن شا... [ الكاتب : احمد عبدالله جقلاب - آخر الردود : عمر محمد نور - ]       »     انا استجبت للنداء [ الكاتب : ابراهيم على كرار - آخر الردود : عمر محمد نور - ]       »     وأخيرا .. الجميلابي .. حرا طلي... [ الكاتب : علي محمد أحمد (أبورنس) - آخر الردود : ابراهيم على كرار - ]       »     أصلي ما كان في مُرادي يوم أفار... [ الكاتب : ابراهيم على كرار - آخر الردود : درماس - ]       »     عفواً سونا.. بقلم الأستاذ [ الكاتب : عمر محمد نور - آخر الردود : عبد المنعم عبد الرحيم حضيري - ]       »     أول رواية عربية تبنى بمفاهيم ا... [ الكاتب : عمر قرافى - آخر الردود : عبد المنعم عبد الرحيم حضيري - ]       »     ابو ابو رنس.... ابو شيبة ... س... [ الكاتب : عبد المنعم عبد الرحيم حضيري - آخر الردود : عبد المنعم عبد الرحيم حضيري - ]       »     الدوام لله الزلال بنت الشمال [ الكاتب : ابراهيم الصيني - آخر الردود : ابراهيم الصيني - ]       »     هل إستنوق الجمل ،،، أم ماذا [ الكاتب : درماس - آخر الردود : درماس - ]       »     غلبني من اندهاشي اطلع.. بقلم ا... [ الكاتب : عمر محمد نور - آخر الردود : عمر محمد نور - ]       »     آجماعة وينن ،،،، [ الكاتب : درماس - آخر الردود : احمد عثمان بشير - ]       »     المتواجدون [ الكاتب : درماس - آخر الردود : أم مؤيد - ]       »     كـُـلـُــنـْـكـَـاكـُــولْ [ الكاتب : درماس - آخر الردود : درماس - ]       »     الكوراك والكواريك . [ الكاتب : عبد المنعم محمد توب السوق - آخر الردود : عبد المنعم محمد توب السوق - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > المنتدى الأدبي > مكتبة لبنى محمد وداعة
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 09-11-12, 10:43 PM
الصورة الرمزية لبني محمد وداعة
لبني محمد وداعة غير متواجد حالياً
مراقب
 





افتراضي الطاقه والنفاج

قومت من النباه وبعد ارحم الراحمين قامت ولعت ناره وسوت الشاي الجماعه قاموا شربوا شايهم وقشت الواطه ورشته وحضرت حاجات الجبنه وسوت جبنته وجوا قعدوا في ضل الصباح كلهم وشربوا الجبنه وابوها شال شوالوا المربوط فيه المنجل والحبل واندلي لا تحت واخوها مرق يشوف شغلتو وهي طوالي قامت جهزت حاجات العواسه لكن باله في النفاج البينهم وبين بيت ناس حاج احمد باقي عبدالله ولدهم ده بدور يعرسه وهو متعود بعد الجماعه مايمرقو يجي داخل من النفاج يشربلوا فنجان جبنه وياخدلوا ونسه ونستين وبعدين يمشي علي شغلو وفعلا وهي في اللحظه ديك جاء داخل وشايل عصايتو وماشي يجدع فيها لاوراء ولا قدام ولقي الحاجه قاعده هناك في ضل الصباح تنضفلها في عدسيه دايره تشدها وجاء داخل ...الحاجي سلام
حباب عبدالله خش لاداخل
وبي هناك عشوشه بقت مافاهمي الجبنه من الكانون وقعد جمبها في عنيقريب قصير كدي وكبتلو الجبنه شربه واخد معاها خشم خشمين وقام مرق بالباب التحتاني فات وهي بعد داك قامت تدبر في حاله دايري تعوس فتحت علبة المعراكه لقت مافيها طايووق ....واااااب عليك ياقشوره كدي انكورك لي فاطني دي مشت علي الطاقه دقته بي ايدها ...فاطني ...فاطني هوووي
اهلا حباب عشوشه كيف
ياختي كدي اديني طايووق هبشته العلبه مالقيت فيها شي وباقي صاجي ده عبيييييط مابمرق لي الكسري من غير طايووق
سمح كدي اصبري انكب جركانة المويه دي في الزير واج اناولك ليه ...فاطني بعد كبت جركانته دخلت علي التكل تكركب وتكركب جات مارقي شايلاله طايوقايه لي عشوشه ...اها هاكي
عشوشه شالته وجات علي محل عواسته وقعدت وقالت بسم الله وقعدت تعوس وهي تدندن في الغناء بي صوت مابين العالي والواطي (منو القال اقفلوا النفاج قطع حبل الوصال والحن .... وعلاه الجدار ياحلوه عاد تاني الوصال كيفن ) طبعا النفسيات في السماء وتجيها طايره الجداده من هناك وهي كر يكرك المرض اليازاك وترجع تاني لي غناها ...
ماشاء الله في عالم تاني
بسم الله انتي جيتي من وين ؟
يعني حااكون جيت من وين عاد انتي ماماك حاسابي ...ما جيت من الباب الكل يوم بجيبو(النفاج) الا عاد انتي واعي بي شي
اي كدي طيري كدي
دي امونه جارتهم بينهم وبينه نفاج مشت طوالي دايره تسخن الجبنه عشوشه قالتلها جيبيها ختيها في الجميرات ديل مرقتهن من الكانون باقي الصاج سخنلي شديد مسافة جبتلي طايووق من فاطني ...امونه ختت الشرقرق في النار ودخلت لاجوه جابت فنجان الجبنه وفيه السكر والمعلق تكركب كررو كررو ...لمحت الحاجه من بعيد ...الحاجه سلام
اهلا امونه امك صبحت كيفنها
كويسي الحمد لله
خلاص قوليله بعد الفطور تعالي ارحكي نشوف بخيتي دي قالوا موروده
سمح ...جابت حاجات جبنته وجرت البنبر علي صحبته وقعدت تاخدلها شفطه شفطه من البن وتتمطق
عشوشه قالتها انتي الصايح القبيل ده شنو ؟
ده قالوا من لافوق من العرب ولداآ لي ابراهيم ود احمد مات في الضهب
بلاهــــــــــي انتي دحين ماعندو بت خالتن ليه كانت معانا في الخلوه
ايي والله ياعشوشه صحي اها يودينا عاد نمشي نشيل معاها الفاتحه ...قالت كلامه ده وهي قايمه من البنبر ياالله ياالله خلاص لامن تقضي كوركيلي ختت فنجان جبنته ودنقرت في الطبق شالتلها لفات كسيره في ايده
ماتزيديهن ياخرابه
لالالع كفاني عندي ملاحن بايت امشي ارميهن فيه وافطربوا باقي الليلي براي ما معاي زول
خلاص ساعة اقضي بكوركلك نمشي ونجي سريع عندي هديمات بدور اشطفن قبال العصير
خلاص خلاص دي تقول فيها وهي جمب باب النص البينهم وبينا
قامت عشوشه ولملمت كسرته جاء ابوها داخل اداها شي كدي ملفلف ( باقي ابوها بريده شديد ) وجرت طوالي علي الطاقه وكوركت لي فاطني ...فاطني تعالي هاكي
جات فاطني مالك في شنو؟ مدتلها الشي الملفلف ده فاطني شافتو
وااااحلالي العمده خالي
جاء شايلن ابوي اتنين ختيتلي واحدي تحت الزير واديتك التانيه
ابوها من هناك يابت ياسجم انتي واقفي لي يوم الليلي تسوي في شنو ؟ تعالي طيري سويلنا الفطور ده
سمح ابوي جايي فاطني عليك الله مديلي بصلايي مشيت تبنت البصل لقيتو كملان
سمح دخلت فاطني وجات شايلاهن بصلايتين مدتن لي عشوشه عشوشه شالتن ودخلت علي التكل
الحاج يطنطن في الونسه البنفاج دي وفي الفطور الاتاخر
الحاجي قاعده في ضلها داك وبعد العدسيه مسكتلها سعف تضفر فيه باقي دايره تسويله برش صلاه بتدور ترسلو لي اخوها في الخرطوم وساعت سمعت الحاج ينقنق قالت هيييييي ياحليلك يابت علي ياالفطورك بقي غدي....

من مواضيعي :

توقيع :
قايل عليك شدة وتزول ماقايلك انت علي سفر
رد مع اقتباس
 
 
 
 
قديم 10-11-12, 12:45 AM   #5
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

الطاقه والنفاج رمز من رموز المحبه والصلات الطيبه عند اهلنا لكن للاسف اصبحت في القديم المنسي ....
قبل ماادخل في موضوع هذا البوست احب اذكر ليكم اني من مده عندي رغبه في كتابة هذا الموضوع وكانت الفكره قد كبرت بمساعدة الاخ التاج علي حامد الله يطراه بالخير ويرجعه لمنتداه ...
الطاقه شباك صغير مشترك بين حيط الجيران والطاقه دي تغزل فيها بعض الشعراء والهمت البعض حب الجار والشعور تجاه جارو بالحنيه والحنين والمحبه الصادقه الصافيه وتعلمهم من المثل البقول ( جارك القريب ولا ود امك البعيد ) وعشان العلاقات تقوي اكتر واكتر بين الجيران كانوا اهلنا زمان بفتحو شباك مشترك بين الجار وجارو وسموهو الطاقه واصبح اكتر التعامل بيها وبالذات الشحده شحدة الملح والبصله والكسره وكمان الشمارات كلها كانت من خلال الطاقه لكن النفوس طاهره ونقيه وشويه شويه لما الحكايه اتطورت وبقت من خلال حاجه تانيه اسمه النفاج والنفاج ده باب في الغالب مايكون من خشب يربط بين الجيران او في الحيطه البين الجار وجارو ودايما بكون مفتوح وبربط بين الجيران وقلوب الجيران وهو باب التواصل والتراحم وباب شحدة البصله والكسره والتومه وكان رابط قوي ووثيقة محبه بين الجيران ...
والشعراء والفنانيين غنوا للنفاج واهميته ونتائجه اللطيفه الحنينه وقالوا فيه وكانوا بشكروا في شخص وفي كرمو واصله الطيب وكان سببو النفاج :-
ود باب السنط والدكه والنفاج
والحوش الوسيع للساكنين افواج
واللمه الربت جنا المحتاج
والنار والدقش والريكه جمب الصاج
الشاي باللبن براده لابس تاج
صينيته الدهب كشكش كبابي زجاج
والسكسك المنضوم حول الجبنه نجوم
والفنجريه تقوم تقهوج الحجاج
طق طرق يابن القهوه كيف ومزاج
خلي النعدل الراس ونحصل الترماج
الطاقه والنفاج كان بسهل علي الناس اللمه والونسه كان قعدت جبنه والا لمت فطور والا مشاط والناس زااااتهم كانت نفوسهم طيبه مافي زول قافلو باب من زول ولا في زول بقول فلان والا فلانه جو داخلين توشك لا احم ولا دستور وكمان من شدة ما كان سبب الالفه كان سبب في الزواج لكتير من الشباب ....ماشفتو عشوشه كانت مترقبه النفاج كيفن عشان دخلت عبدالله عليها منو ...
تعالي نيقن الاشواق بانو اكيد حانتلاقي
بكره حاتنفتح ابواب ونفاج ريد وكم طاقه
واشوفك كل ليل وصباح يعود تاني الوداد والحن
يعني الناس كان زعلت من بعض لاي سبب من الاسباب النفاج ده يبقالهم سبب ويرجع المياه لمجاريها . حليل الزمن ده وحليل زمن النفاج وزمن اماتنا الحنينات وزمن الطيبه ....
ياربي تاني برجع الزمن ده والا يخرب ؟

  رد مع اقتباس
 
 
 
 
قديم 10-11-12, 06:40 AM   #6
قريرابي مميز
 
الصورة الرمزية الواثق صلاح





الواثق صلاح غير متواجد حالياً

من مواضيعي :
افتراضي رد: الطاقه والنفاج

يا سلااااااااااام يا عمتي علي الكلام الحلو ده وعلي القصه العشته معاها بي كل تفاصيلا .. ربنا يديك الصحه والعافي وكل عام وانتي بي الف خير ..
كسره ؛ هسي بالله ده ما مشروع كاتبه جاااااااااااااااااااااهز .. ممكن تتعاقدي مع اي جريده ويدوك كاش رِكبي ..


توقيع :
القــريــــر تـــاج الوطـــن *** وفي الشمال عِز القبـيله
القـــريـــر غــالي التـمــن *** شايل اوصـافو النـبـيـله
القـــريـــر معروف للعــلن *** دُرّة النـيــــل الجـمـيـله
وليهو في الوجــدان شجـن *** وليـهـو وقفتـنا الجليله
  رد مع اقتباس
 
 
 
 
قديم 10-11-12, 09:44 AM   #7
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة الواثق صلاح مشاهدة المشاركة
يا سلااااااااااام يا عمتي علي الكلام الحلو ده وعلي القصه العشته معاها بي كل تفاصيلا .. ربنا يديك الصحه والعافي وكل عام وانتي بي الف خير ..
كسره ؛ هسي بالله ده ما مشروع كاتبه جاااااااااااااااااااااهز .. ممكن تتعاقدي مع اي جريده ويدوك كاش رِكبي ..
تسلم ياود اخوي وكل سنه وانت طيب
ياولد عمتك دي كلها مواهب لكن داسنها من العين عشان في ناس كدي عينم حاااااااااااااره ( انا قلت وجدي ) يقومو يطقونا عين مانعرف تاني نمشي وين ....

  رد مع اقتباس
 
 
 
 
قديم 10-11-12, 01:34 PM   #8
قريرابي ماسي
 
الصورة الرمزية عبد الرحمن (عطبرة)





عبد الرحمن (عطبرة) غير متواجد حالياً

من مواضيعي :
افتراضي رد: الطاقه والنفاج

يا سلاااام عليك يا حلبة لما تكوني راااايقة
و يا حلاة قولك طرانا زمن الناس بالحنان متلايقة
......
لكن الصورة و الزويل المستمخ دا مااافي أحلا من كدي و شفتي الزويلة دي مجتهدي كيفن حليل و حليل
حليل زمن ناساً تشد الحيل
تدق الباب يجوك فاردين ايدياتن مع التهليل
تعال لا جوا ريحة البن لينا دليل
نتونس نريح روحنا نتواصل بعد دقشينا .. خت و شيل

متابعين و في انتظار البليلي لما تنضج...
واصلي

  رد مع اقتباس
 
 
 
 
قديم 10-11-12, 10:02 PM   #9
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة عبد الرحمن (عطبرة) مشاهدة المشاركة
يا سلاااام عليك يا حلبة لما تكوني راااايقة
و يا حلاة قولك طرانا زمن الناس بالحنان متلايقة
......
لكن الصورة و الزويل المستمخ دا مااافي أحلا من كدي و شفتي الزويلة دي مجتهدي كيفن حليل و حليل
حليل زمن ناساً تشد الحيل
تدق الباب يجوك فاردين ايدياتن مع التهليل
تعال لا جوا ريحة البن لينا دليل
نتونس نريح روحنا نتواصل بعد دقشينا .. خت و شيل

متابعين و في انتظار البليلي لما تنضج...
واصلي
اهلين ودعطبره
انا والله مابروق الا لما ادخل المنتدي ده والاقي ناسو الطيبين ....بعدين الزول لازم يستمخ وهي لازم تجتهد ليه يعني باقيلك لو كان الزول ده ودابنعوف والا محمد يونس كانت بتخلص وتجتهد

  رد مع اقتباس
 
 
 
 
قديم 13-11-12, 09:22 AM   #10
قريرابي ماسي
 
الصورة الرمزية خديجة عبد الرحيم فضل الله





خديجة عبد الرحيم فضل الله غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة الواثق صلاح مشاهدة المشاركة
كسره ؛ هسي بالله ده ما مشروع كاتبه جاااااااااااااااااااااهز .. ممكن تتعاقدي مع اي جريده ويدوك كاش رِكبي ..
نكلم فيصل يوديك الاذاعة تاليف مسلسلات ...
لبينة حمد لله علي السلامة ...


توقيع :
.
  رد مع اقتباس
 
 
 
 
قديم 13-11-12, 03:44 PM   #11
قريرابي فضي





ام محمدوامير غير متواجد حالياً

من مواضيعي :
افتراضي رد: الطاقه والنفاج

الله عليك يالبنى سلمت يدك

وقلمك تغيبين وتجينا بالجميل

احوالك عساك طيبة


توقيع :

لا تقل
يارب لي هم كبير
بل قل
ياهم لي رب كبير
  رد مع اقتباس
 
 
 
 
قديم 13-11-12, 08:27 PM   #12
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة خديجة عبد الرحيم فضل الله مشاهدة المشاركة
نكلم فيصل يوديك الاذاعة تاليف مسلسلات ...
لبينة حمد لله علي السلامة ...
ما نكلم البروف طيب وماتقولي هو اصلآ طرحه فكره زي دي قبل كده....
الله يسلمك ياخدوج

  رد مع اقتباس
 
 
 
 
قديم 13-11-12, 09:00 PM   #13
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة لبني محمد وداعة
باقيلك لو كان الزول ده ودابنعوف والا محمد يونس كانت بتخلص وتجتهد
الله يسامحك يا لبنى هسع عليك الله كان ما اجتهدو لي انا وود ابنعوف تاني يجتهدو لي منو كدي فتحي عينيك سممممح وشوفي الزينا والبيشبهنا منو ما تقول لي ارنبو وللا غيرو

  رد مع اقتباس
 
 
 
 
قديم 13-11-12, 10:48 PM   #14
قريرابي نشط
 
الصورة الرمزية بت نعمة الله





بت نعمة الله غير متواجد حالياً

من مواضيعي :
افتراضي رد: الطاقه والنفاج

سلام عليكم لبني وكل عام وانتي بخير
ياتري الصوره الجميلة دي لسع موجودة في البلد ؟ اكيد المدنية اثرت في التعامل بين الناس بس ان شاء الله يكونوا محافظين علي النفاج والطاقة، انا بثني الراي البقول مفروض تكتبي مسلسلات ، يسلم يراعك

  رد مع اقتباس
 
 
 
 
قديم 16-11-12, 10:02 AM   #15
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة ام محمدوامير مشاهدة المشاركة
الله عليك يالبنى سلمت يدك

وقلمك تغيبين وتجينا بالجميل

احوالك عساك طيبة
هلا هلا بالغاليه ام الغالين
وتسلمي انتي وعشان انتي جميله بتشوفي كل الحولك جميل

  رد مع اقتباس
 
 
 
 
قديم 17-11-12, 07:16 PM   #16
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة محمد يونس مشاهدة المشاركة
الله يسامحك يا لبنى هسع عليك الله كان ما اجتهدو لي انا وود ابنعوف تاني يجتهدو لي منو كدي فتحي عينيك سممممح وشوفي الزينا والبيشبهنا منو ما تقول لي ارنبو وللا غيرو
والله صحي مافي زول بشبهكم وخاصه ودابنعوف

  رد مع اقتباس
 
 
 
 
قديم 19-11-12, 06:53 PM   #17
مراقب
 
الصورة الرمزية لبني محمد وداعة





لبني محمد وداعة غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة بت نعمة الله مشاهدة المشاركة
سلام عليكم لبني وكل عام وانتي بخير
ياتري الصوره الجميلة دي لسع موجودة في البلد ؟ اكيد المدنية اثرت في التعامل بين الناس بس ان شاء الله يكونوا محافظين علي النفاج والطاقة، انا بثني الراي البقول مفروض تكتبي مسلسلات ، يسلم يراعك
انتي ياختي وينك ووين اراضيك وكل سنه وانتي طيبه وكل الاهل ....
ياحليل الطاقه والنفاج يابت نعمة الله الناس في البلد صحي حياة المدينه اثرت عليهم كتير بس غايتو الله يديم المحنه

  رد مع اقتباس
 
 
 
 
قديم 19-11-12, 07:05 PM   #18
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: الطاقه والنفاج

لو استمريتي بالطريقة دي يا لبنى

يبقى لازم علينا نخصص ليك مكتبة بالمنتدى الأدبي

بس ضروري يشهدو ليك ود أبنعوف وود يونس

  رد مع اقتباس
 
 
 
 
قديم 19-11-12, 07:22 PM   #19
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة علي محمد أحمد (أبورنس)
لو استمريتي بالطريقة دي يا لبنى


يبقى لازم علينا نخصص ليك مكتبة بالمنتدى الأدبي

بس ضروري يشهدو ليك ود أبنعوف وود يونس
يا ابورنس بالغت عديل كدا هي المكتبة دربها طالق للدرجة دي ولو ود ابنعوف عرف الكلام دا بيبقى في كلام تاني :d

  رد مع اقتباس
 
 
 
 
قديم 20-11-12, 10:42 AM   #20
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: الطاقه والنفاج

اقتباس:
المشاركة الأصلية كتبت بواسطة محمد يونس مشاهدة المشاركة
يا ابورنس بالغت عديل كدا هي المكتبة دربها طالق للدرجة دي ولو ود ابنعوف عرف الكلام دا بيبقى في كلام تاني :d
شفتي يا لبنى .. دا الأنا خايف منو ..

كدا شهودك نقصو واحد ..

كدي ننتظر ود ابنعوف كان وافق ممكن نسمح ليك

تجيبي معاهو اتنين من الحريم ..

طبعاً خديجة حا تكون الأولى

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

---
شارك هذا الموضوع مع أصدقائك على الفيس بوك
Share

الساعة الآن »01:19 AM.


Powered by vBulletin® Version 2017
.Copyright ©2000 - 2017, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل