( خلاص الرمانة قامت)... دعوة ل... [ الكاتب : مامان ود المدير - آخر الردود : أم مؤيد - ]       »     ابوميسرة علي الكرسي الساخن [ الكاتب : زهير محمد سليمان - آخر الردود : ابو ميسره - ]       »     وداعا زينب حمزه [ الكاتب : متوكل طه محمد احمد - آخر الردود : محمد عثمان سرالختم - ]       »     البحر كسر وجسرو ماانجسر [ الكاتب : لبني محمد وداعة - آخر الردود : ابو ميسره - ]       »     عضو جديد يا أهلى العزاز بهديكم... [ الكاتب : عبد الماجد محمد أحمد - آخر الردود : ابو ميسره - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     سؤال برئ جداً [ الكاتب : أمين عبدالله - آخر الردود : أمين عبدالله - ]       »     عناوين صحف الخرطوم ( يوميا وحص... [ الكاتب : عوض علي حامد - آخر الردود : ود حمرى - ]       »     من غيرنا قــــــــــد سطع الت... [ الكاتب : سليمان عبد الله محمد نور - آخر الردود : ود حمرى - ]       »     إهداءات الخميس ..!! صور منقولة... [ الكاتب : ود حمرى - آخر الردود : ود حمرى - ]       »     القران الكريم .. يوميــاً .. ص... [ الكاتب : ود حمرى - آخر الردود : ود حمرى - ]       »     حديث اليوم .. للمشاركة [ الكاتب : ود حمرى - آخر الردود : ود حمرى - ]       »     نعى أليم.. على محمد سعيد الأعم... [ الكاتب : احمد عبدالله جقلاب - آخر الردود : عبد الماجد محمد أحمد - ]       »     مطلوب ركاب للطائرات الماليزية [ الكاتب : سليمان عبد الله محمد نور - آخر الردود : صديق الحسين طه وديدة - ]       »     مقيــل مع حمــد ود الشيــخ [ الكاتب : أبوذر الكامل - آخر الردود : أبوذر الكامل - ]       »     الحــنوط [ الكاتب : ميرغني النقي - آخر الردود : ابوالقاسم عكود - ]       »     مبروك ل عاطف إبراهيم [ الكاتب : بابكر محمد أحمد دفع الله - آخر الردود : بدوى عكود - ]       »     السر بشير جابولو بت [ الكاتب : سليمان عبد الله محمد نور - آخر الردود : بدوى عكود - ]       »     بقيــنا نكلكِل الدمعــات .. بع... [ الكاتب : ود حمرى - آخر الردود : بشيرعثمان بشير - ]       »     رحم الله الشاعر الفلسطينى سميح... [ الكاتب : عمر الشيخ محمد حسن - آخر الردود : زهير محمد سليمان - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > منتدى الشعر والشعراء > مكتبة الشاعر عمر قرافي
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 16-08-12, 10:51 AM
الصورة الرمزية عمر قرافى
عمر قرافى غير متواجد حالياً
قريرابي ذهبي
 





افتراضي مسدار البت السودانية (البت الحديقة)

مسدار البت السودانية
(البت الحديقة)

واحد أخونا قال لي العرس ده برّة برّة ( مغربية - شامية - مصرية - ان شاء الله حبشية) لانو السودانيات ديل ما بيعرفو يقطعو الظلط خليك من نعرسِّهم ...عاد الكلام ده زعلني بالحيل فكتبت هذا المسدار ردَّاً عليهو وعلى من يروج لمثل هذا الكلام ............

النص

طبعو ملائكة لكن عودو تب سوداني
راقي وذوقو بين الكل موزَّع وداني
يا قلبي الجريح بالله ما تاذاني
خليك فنجري وراسي وحكيم ويماني

بنات الناس كتر لكن هي بس محضورة
مضمورة الحشا الوصفوها بالنافورة
لا بتعرف تغش لا ناشرة حتة صورة
اسمها ساي جمال بيهو القلوب مسحورة

آه من ريدو آه والآهة ذاتا تعاني
مضمور الحشا السمُّوهو بس سوداني
اسمر وجد جميل ناير وكلو معاني
وا غلبي وشقاي لو ما سكن وجداني

آه يا خلة من نارو البقت في قلبي
وآه من ريدو جد سبَّب عذابي وغلبي
الخلاني أقول وامرق مكامن حبِّي
عشقاً في الفؤاد وفاراً لعب في عبِّي

بنية يمين وحات اسم الله مافي مثيلا
نوارة فريق الراقية ست في جيلا
البت كان تقول نسمع دوام لي قولا
وان نضمت يمين رائعة وتملِّي خجولة

من شوفتو انخلع قلبي ويدوبي كياني
أمواج المحيط ما بتطفي حر نيراني
يا رب يا كريم خالق الانام والجان
زولي الشفتو انسي ولا شيتاً تاني

ساكن قلبي تب زارع سهامو عميقة
لو ما شفتو يوم تمسك قليبي حريقة
نوارة البلد من نورتو يضوي بريقا
وا شوقا علي المزدان ووصفو حديقة

كان قبَّل عليك بتجيكا رجفة شديدة
وكان لاقن عينيك عينيهو جرسة أكيدة
هجَّام القلوب بي سهمو قاصد الصيدة
مهما قلت ما بتحويه أيِّ قصيدة

نوَّارة الفريق ماهو العنيد وأناني
نور القمرة منو يشيل ويسطع تاني
لو ما خوفي بكرة يقولو طشَّ جناني
كنت بشيل نداهو واكبو في شرياني

خليكم معاي لامن أتم القصَّة
والداير الجمال ما تفوتو أبدا حصَّة
جيبوها الكراريس والصفوف تترصَّ
شهرين نصرفهن ويادابنا بس في القُصَّة

مضمور الحشا الفي وصفو رايق وهاني
والسنا والسماح من برة او جوَّاني
مالكاهو البنية وزايدة فوقو معاني
وغير بت البلد مين البكونلك حاني

المن شوفو بهدل جوفي لخبطو كلو
هضليماً جموح تسكن عديل فوق ضلو
زي ورد الخميل فايحات زهورو وفلو
سوداني الأصل والغيرو ما بيوصلُّو

سودانية بت أصلا كريم ومؤصَّل
نورها الضاوي لا عند الثريا بيوصل
قمرة وفي الوصف كاملة وقوامها مفصَّل
شامخة وبت بلد والغيرها ديمة مكنصل

زي طلة قمر في الليل بيضوي حضورو
كل الشافو قال ما شفت تب زي نورو
فرتاق القلوب ساحر جمالو كجورو
ولو ما اللوم يمين في كل ساعة نزورو

ما تلوموني لو ما شفتو ريم الوادي
نوَّار البساتين المفرهد ونادي
لو ما خوفي ناس الفيس يقبلو غادي
كان وصَّفت ليهم وين بيلقو مرادي

في شارع فلان زولي المنوِّر قاعد
وجنب بيت ناس فلان نورو المفرهد صاعد
تركب ليهو باص مافيهو أي مقاعد
باص عجلاتو حب ومكنتو حلماً واعد

يا نبع الجمال والله مصدرو ديمة
زي نور الشمس لمَّن يفج الغيمة
مسحور بي هواهو وريدتي ليهو عظيمة
والشاري الغزال ما بتغلى فيهو القيمة

اكتبو انتو في ريدكم ورددو قولو
والله ما بتلحقو في الوصف تمثيلو
راقي وروعة كاملات الصفات الهيلو
حشمة وفي الجمال ما ظني القى مثيلو

يا زول هوي اقيف انا راسي ذاتو اتلخبط
من شفت الهضيليم الجمالو موهط
من يوم داكا جد كل العيون تتنطط
ووجداني اللئيم طوالي بس اتشعبط

بستاهل انا الفي قلبي واقد نارا
ممشوقة القوام عنوان شموخ وحضارة
سودانية قمرة وضاوية بي انوارا
قلبي هجر جواي وسكن عديل في دارا

يا العاشق كلامك روعة دائما واضح
ما اصلو الاناء بالفيهو دائما ناضح
تسلم يا حبيب لكن بدورو يصارح
عاشقني الحبيب ولا الغرام ما صالح

يمين لوجات علي تلقاني راقد بيشي
مسحور بي هواها بنيت عليهو عريشي
جيبوها وتعالو واقعو في تفتيشي
تلقوهو الفؤاد عمران ومرفوع شيشي

آه لو شفتو نظراتها وجميل الطلة
خلت قلبي معلول فيهو مليون علة
لو نطقت يمين تنصت معاها الحلة
ولو ضحكت قمر وسط النجوم اتجلى

يا ناس الغرام في قلبي قاعد جوَّة
رغم انو الحبيب عندو الغرام زي خوَّة
عاد انا شن نسو والدنيا فاقدة مروَّة
لا زول ينجدك وتلب براك في الهوَّة

خلوها الحنينة الرايقة تبسم لينا
نسَّامها العليل ينزل علي وادينا
يمكن ننصلح والدنيا تصبح زينة
وننسى الهم خلاص الغالي حنَّ علينا

خصلات الشعر من السواد بس فحمة
والطول العليهن زي صفوف الزحمة
دفسيبة ودفر أم المعارك تحمى
بس همَّ الجميع فتحة شبيبيك رحمة

النور البيهل من السنون برَّاقو
والكلمة الحنونة النازلة من أشداقو
يا رب يا كريم نتهنا بي أذواقو
يتمغص العزول يقنع يفوت سرَّاقو

من دون الحروف عاجبني حرفو واسمو
شاغلني الحبيب شاغلني صوتو ورسمو
يا رب يا كريم تحفظ رويحتو وجسمو
تفتح لي ضلف وقليبو ليَّا تقسمو

موفور الجمال سيد الغرام وأميرو
مكحول العيون سهمو المعبَّا نصيرو
صاد قلب العباد أبيض تملِّي ضميرو
بس ساعة الزعل قاسي ومجافي نفورو

آه انا من هواها الفي قلوبنا مجكَّن
حيران ليلي كلو وديمة ليا ممحَّن
سهران الجوى لامن نجومن فجَّن
عاد انا شن نسو يا خلة ريدها اتمكن

حرفها في الحروف ما زي حروف ناس ديكا
واسمها زي نغم رائع يرن حواليكا
نوَّارة الفريق الغالية كان جات ليكا
تتلخبط قسم راسك يكون كرعيكا

يا عالم يمين صاحبك ملخبط ضمَّة
شاغلاهو البنية الفارعة جاتو الحمَّى
خلتو زي يتيم يهتف يكورك يمَّة
كان ماها الظروف كان المراد انتمَّ

الخلاني ازح جنبو واباري طريقو
نورو الضاوي واشعاعو وتملِّي بريقو
قلبي الأصلو مسكين ديمة ناشف ريقو
عشمان في أمل يمكن محال تحقيقو

سيبك من مصر أو من اراضي الشام
وخليك في البنية الراقية مافي كلام
سودانية بس تملاكا أحلى غرام
مالك ومال قلق تفقد معاهو منام

ياخ الاجنبية تجيك ملانة بلاوي
تعصر أسرتك ليهم دوام بتلاوي
تتفلسف عليك تملاك قصص وحكاوي
أحسن ليك اخير تسمع كلام الراوي

اسمعو يا شباب لي قصَّة كلها حاصلة
نوَّارة بلدنا أخير وطاعمة وواصلة
ولو جارت ظروفي على بقت متواصلة
سودانيَّة بس والباقي نقطة وفاصلة


عمر قرافي

من مواضيعي :

توقيع :
ما نحـــــــن القرير نحن الشعر والقول
ضاوين فى الفريق ما فينا زول معلول
فرسان الشعر مــــــن بدرى لينا أصول
شايقية وعقب رجالة ديمــــــــــة فحول
آخر تعديل عمر قرافى يوم 22-08-12 في 10:51 AM.
رد مع اقتباس
 
 
 
 
قديم 17-08-12, 01:16 AM   #2
قريرابي ذهبي
 
الصورة الرمزية اسماعيل علي حامد





اسماعيل علي حامد غير متواجد حالياً

من مواضيعي :
افتراضي رد: مسدار البت السودانية (البت الحديقة)


نـضمك يا عـمر هـيج قـوافي النم
البارح العِصير قبل الشمس ماتلم
قـلته ارد ولـي مسـدارك انت اتـِم
الا الحروف مابيات حلفن يمين تترم

سودانيه ميه الميه .. هـاديه طِباعه زي النسمه
عوده يميل يحاكي البان تجيك تتنا فارده البسمه
لــوحـه فـريـده ... زاهـيـه تـضـوي زي الـرسمـه
خـلقه الله مـا مـكيـاج .. تـعرفه انت مـن الوسمـه

اعزرنـي بـس يـا خِلي مـابـقدر اجـاريـك تب
مـهما قـلته مهما زيـده مهما قلمي ذاتـو كتب
يـتضـائل امـامـك انـت .... يتــكسر يـوُقــع رب
وتاني اقوم المو أجيك بقايا حطامو القي هرب


توقيع :
  رد مع اقتباس
 
 
 
 
قديم 17-08-12, 08:57 AM   #3
قريرابي مميز





جبر الدار محمد جبر الدار غير متواجد حالياً

من مواضيعي :
افتراضي رد: مسدار البت السودانية (البت الحديقة)

العزاز قرافى وسمعه
مررت بنفس التجربه استهزاء بالسودانيات من احد الباحثين عن الجمال المزيف
جمال الكريمات والمساحيق حتى يبرر زواجه من الاجنبيه شن هجوما على السودانيات وصفهن باشع الاوصاف وقال فيهن حديث لا يليق فكتبت هذه المقاطع

مسكين يا غشيم المتلك ما بعرف اوصافه
السودانيه عفه وحشمه و زوق وتوبا قيافه
السودانيه عز .....جمال وادب معاهو ظرافه
ما بيكفينى كل مداد الدنيا لو اردت بس انصافه
.............
مسكين يا عاشق المساحيق ولمعة الكضابا
البلوزه والبنطلون الضيق ..اريتو لبس التابا
مكشوفه للبيعاين واضحات حتى معالم .....
دى الما معروف اصلها ..غاشّاك موية رهابا
..............
اسمع يا غشيم كفاك سخافا
واوزن كلامك خلى فيهو حصافا
السودانيه ريحتا حاشا ما بتتعافا
دى المعروف عطورها طلحّا وشافا
.............
اه يا غشيم انت وقعت ما سميت
واتوهدبت دابك وفكيتو راس الخيت
السودانيه تكرم ذويك حتى ان ما جيت
وزولتك باكر نسمع حرّمت ناس ابوك البيت
............
حقيقه ...السودانيه انت لا بدورك ولاكا نباها
تدور راجل الستره...... ...تدورو يبقى كساها
تدور راجلا زى ابوها.... .بعطفو وحنانو يتولاها
وتدور راجلا كلس فى قومو ..ما بتدور اشباها
.............
اسكت يا غشيم الليله توّر جنى
ولبانك البتلوك فيهو دا.... مجنّنى
السودانيه عاجبانا نقول فيها كمان ونغنى
وعليك الله شن ناقصك منها غير تسوى الحنّى

آخر تعديل جبر الدار محمد جبر الدار يوم 19-08-12 في 05:11 PM.
  رد مع اقتباس
 
 
 
 
قديم 17-08-12, 11:18 AM   #4
قريرابي ذهبي





احمد محمد صالح بادي غير متواجد حالياً

من مواضيعي :
افتراضي رد: مسدار البت السودانية (البت الحديقة)




الـقـال الكـلام دا، تـب مـا عـاقـل
وبطـبايـع بناتـنا، أيـضًـا جـاهـل
لوالجـمال بـيـتـم، جـمالـن كـامـل
وعَـقـُلِـن رجـيـح، وبَـالِِـن مـاهـل
***************
الـزواج من أجـنبـيـه كـلو غـلاغـل
تملى فى الطياره تـلقـا طالع ونـازل
لى قولة سلام، أوفى بلادا يـجـامـل
الحياه معاها بتستمر إلا ما بالساهل
***************
ذكـرت جـميع محاسن بـت بـلادنا
وما قصرت تب يا ود قرافى فـيها
وبينت الصفات الممتده من أجدادنا
وأنا بذكر عيوب التانيه، وبَجَـلِيها
***************
ما بتعرف تطبخلك أكله ذى أكلاتنا
وما بتاكـل معـاك ضمه بى إيـديهـا
تـَحَقـْب الراجل تقول عصا خـَرَزَانـا
وتـَجُرْفى الطرقات واحد شبح بَاريـِها
******************
مـابـتـخـلـى فـى جـيـبـو فـد مـلـيـنـه
وهى إن حبت تـديهـو منها، ما بيديها
طول ماعـنـدو فـلوس، دوام مسكـيـنه
وأول مايـفـلس تـدِّى عـجـاج كِرْعـيها


توقيع :
الغبشاوي
  رد مع اقتباس
 
 
 
 
قديم 22-08-12, 10:35 AM   #5
قريرابي ذهبي
 
الصورة الرمزية عمر قرافى





عمر قرافى غير متواجد حالياً

من مواضيعي :
افتراضي رد: مسدار البت السودانية (البت الحديقة)

اقتباس:
المشاركة الأصلية كتبت بواسطة اسماعيل علي حامد مشاهدة المشاركة

نـضمك يا عـمر هـيج قـوافي النم
البارح العِصير قبل الشمس ماتلم
قـلته ارد ولـي مسـدارك انت اتـِم
الا الحروف مابيات حلفن يمين تترم

سودانيه ميه الميه .. هـاديه طِباعه زي النسمه
عوده يميل يحاكي البان تجيك تتنا فارده البسمه
لــوحـه فـريـده ... زاهـيـه تـضـوي زي الـرسمـه
خـلقه الله مـا مـكيـاج .. تـعرفه انت مـن الوسمـه

اعزرنـي بـس يـا خِلي مـابـقدر اجـاريـك تب
مـهما قـلته مهما زيـده مهما قلمي ذاتـو كتب
يـتضـائل امـامـك انـت .... يتــكسر يـوُقــع رب
وتاني اقوم المو أجيك بقايا حطامو القي هرب

يا سمعة الحبيب قولك مرتب ديمة
يلاك ننصرها وننصر معاها نميما
سودانية بس والباقي ياخي هزيمة
بنوتنا الجمال والحشمة عاليات قيمة


توقيع :
ما نحـــــــن القرير نحن الشعر والقول
ضاوين فى الفريق ما فينا زول معلول
فرسان الشعر مــــــن بدرى لينا أصول
شايقية وعقب رجالة ديمــــــــــة فحول
  رد مع اقتباس
 
 
 
 
قديم 22-08-12, 10:40 AM   #6
قريرابي ذهبي
 
الصورة الرمزية عمر قرافى





عمر قرافى غير متواجد حالياً

من مواضيعي :
افتراضي رد: مسدار البت السودانية (البت الحديقة)

اقتباس:
المشاركة الأصلية كتبت بواسطة جبر الدار محمد جبر الدار مشاهدة المشاركة
العزاز قرافى وسمعه
مررت بنفس التجربه استهزاء بالسودانيات من احد الباحثين عن الجمال المزيف
جمال الكريمات والمساحيق حتى يبرر زواجه من الاجنبيه شن هجوما على السودانيات وصفهن باشع الاوصاف وقال فيهن حديث لا يليق فكتبت هذه المقاطع

مسكين يا غشيم المتلك ما بعرف اوصافه
السودانيه عفه وحشمه و زوق وتوبا قيافه
السودانيه عز .....جمال وادب معاهو ظرافه
ما بيكفينى كل مداد الدنيا لو اردت بس انصافه

جبر الدار أخوي زاد القلوب ومصافا
قولك خابرو تب راقي ومليتو لطافة
بنوتنا الجمال فيهن كسنو عفافا
شن جاب القمر للنجمة فرقو مسافة

  رد مع اقتباس
 
 
 
 
قديم 22-08-12, 10:44 AM   #7
قريرابي ذهبي
 
الصورة الرمزية عمر قرافى





عمر قرافى غير متواجد حالياً

من مواضيعي :
افتراضي رد: مسدار البت السودانية (البت الحديقة)

اقتباس:
المشاركة الأصلية كتبت بواسطة احمد محمد صالح بادي مشاهدة المشاركة



الـقـال الكـلام دا، تـب مـا عـاقـل
وبطـبايـع بناتـنا، أيـضًـا جـاهـل
لوالجـمال بـيـتـم، جـمالـن كـامـل
وعَـقـُلِـن رجـيـح، وبَـالِِـن مـاهـل
***************
ا

ود بادي الجميل اياك اسد في الحوبة
تنصر للبنات الريدتن مرغوبة
سودانية بس راقية ومحشم توبا
مالنا ومال أجانب عشرتن مضروبة

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن »02:12 AM.


Powered by vBulletin® Version 2014
.Copyright ©2000 - 2014, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل