أنواع الرجال................ [ الكاتب : إسحق محمد إسحق - آخر الردود : ام محمدوامير - ]       »     السلام عليكم [ الكاتب : ام محمدوامير - آخر الردود : ام محمدوامير - ]       »     البحر كسر وجسرو ماانجسر [ الكاتب : لبني محمد وداعة - آخر الردود : ام محمدوامير - ]       »     اخبار 2050 [ الكاتب : أحمد حسن - آخر الردود : ام محمدوامير - ]       »     تعالوا ياناس أفرحوا معايا [ الكاتب : أمين عبدالله - آخر الردود : ام محمدوامير - ]       »     حمار النوم... [ الكاتب : لبني محمد وداعة - آخر الردود : ام محمدوامير - ]       »     درمـــاس؟؟!!! [ الكاتب : احمد محمد صالح بادي - آخر الردود : لبني محمد وداعة - ]       »     خبر وتعليــق .. فساد فــى مــر... [ الكاتب : ود حمرى - آخر الردود : أمين عبدالله - ]       »     التهنئة لمحمد كمال وعضو المنتد... [ الكاتب : سيف الدين محمد الامين - آخر الردود : أمين عبدالله - ]       »     نبارك زواج إبنة سيد احمد علي خ... [ الكاتب : سيف الدين محمد الامين - آخر الردود : أمين عبدالله - ]       »     عاطر التهنئات لعضو المنتدى عما... [ الكاتب : سيف الدين محمد الامين - آخر الردود : أمين عبدالله - ]       »     التهنئات لبشير عثمان بشير ولمي... [ الكاتب : سيف الدين محمد الامين - آخر الردود : أمين عبدالله - ]       »     أحر التهنئات لعضوي المنتدى نصر... [ الكاتب : سيف الدين محمد الامين - آخر الردود : أمين عبدالله - ]       »     حافلات الهايس الخطر الماحق فى ... [ الكاتب : عبد الحليم حران - آخر الردود : عبد الحليم حران - ]       »     مشـــتاق للرســـول عليه افضل ا... [ الكاتب : ود حمرى - آخر الردود : ود حمرى - ]       »     عناوين صحف الخرطوم ( يوميا وحص... [ الكاتب : عوض علي حامد - آخر الردود : ود حمرى - ]       »     مــن بــريدى ..!! [ الكاتب : ود حمرى - آخر الردود : ابو ميسره - ]       »     ابوميسرة علي الكرسي الساخن [ الكاتب : زهير محمد سليمان - آخر الردود : ابو ميسره - ]       »     القران الكريم .. يوميــاً .. ص... [ الكاتب : ود حمرى - آخر الردود : ود حمرى - ]       »     اقرأ آية (واحدة) من القرآن الك... [ الكاتب : مجاهد الرفاعى - آخر الردود : ود حمرى - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > منتدى الحوار العام
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 30-07-13, 04:01 PM
الصورة الرمزية د. نجم الدين محمد الامين
د. نجم الدين محمد الامين غير متواجد حالياً
قريرابي نشط
 





افتراضي حلمنتيشيات: مجادعات الثلث الثاني

الاخوة أعضاء المنتدي .. السلام عليكم ورحمة الله
إليكم الباقة الثانية خلال للثلث الثاني من الشهر الكريم .. وهي باقة متميزة شارك فيها عدد من الحلمنتيشيين واصدقائهم واعضاء المنتدي .. يعني الحكاية وسعت .. ولهذا السبب تم الاختيار من بين الكم الهائل من المجادعات التي كتبت .. بطريقة تحفظ جماعية المشاركة وفكاهية النصوص وشمولية الأيام .. وللمعلومية: (المقطع باللون الأحمر في كل يوم من الايام المذكورة هو المقطع الرئيسي مبتدر النقاش ومطلق الشرارة الأولي لبقية المقاطع بحيث تكون الردود موجهة لذلك المقطع) .. كل سنة وانتو طيبين ونلاقيكم بنهاية الثلث الأخير، يعني يا يوم الوقفة اذا بقي رمضان تامي ويا يوم العيد إذا بقي رمضان ناقص (أصلو البتابعكم ما ظنيتو يتهجد)


الافتتاحية
أوَّلو رحمة أيامو انقضت بسعادة
وجاتنا التانية حازمة المغفرات بزيادة
يلَّاكم نَجُك فيها .. ونسوِّي بِيادة
نحزِم للأواخر ونستعد لي زادا
نغرف منُّو لي عتق الرقاب نتهادي

الأخ سيف (المستف العفشي)
ـــــــــــــــــــــــــــــــــــــــــــــ
اليوم الحادي عشر
أنا حظي التعيس لازَمني من يوم عرسي
بَنْدَه في الشيوخ الفي الزريبة وخُرْسي
يحفظنا الإله بي (ق) وآية الكرسي
يبعد مننا الحالة البِقَت في مرسي

متفرد

الحالة البِقت في مُرسي ماها صعيبة
كعب البِستمرْ في الفَلسة بعد الشيبة
كلْما يبدا مشروع .. يلقي ألف ضريبة
تلعب فيهو باصات، زي حمد والديبة

كدرابي

الحالة البقت في مرسي ما زَي حالي
كعب اليومي بِفطُر بوش، عشاهو تسالي
طاشّي نهاروُ، ليلو صراع، بعوض طوّالي
ما بضوق شخرة غير في كرسي بص الوالي

نرفزة

حداشر يوم قضيناها .. الزمن متسارع
نكابس نِحنا في درب المعيشة نصارع
وجمهور مصْر ده العامل مفتَّح وبارع
رئيسو الشرعي يا ناس انجدع في الشارع

متفرد
ــــــــــــــــــــــــــــــــــــــــــــــ
اليوم الثاني عشر
الليلة الأحد يا زول سخانتو تفوِّر
تلقي الزول رَقد زي الدبيب متكوِّر
مستغرب أنا وماسك كمِرتي أصوِّر
جِرسة شديدة والزول غير سِويتش يدوِّر

متفرد

الليلة الأحد يا زول سخانتو تعَوِّر
تشوفني تقول دا مجرم واللا تقول مزوّر
من زهجي وشلاقتي بقيت ألوص وأدوّر
رُحتَ خنقت بتّي ، خلاص بقيت متهوّر

نرفزة

متنرفز أخوي ليك منّي ألف ِتحيّة
فرحان بالصيام .. ومقاطعك الدولية
لي صيام الشهر يا خوي عقدنا النيّة
لو يبقى الفطور بلحة و بليلة شوية

متفرد
ـــــــــــــــــــــــــــــــــــــــــــــ

اليوم الثالث عشر
الليلة النهار أصبح جحيمو مولّع
ما بقدر يصوم فيهو الجنى المدّلِّع
شمس يا حمدي لو يمرق عليها مصلّع
يجهِّز تلجو بالحافظة ويشيل ويبلِّع

متفرد

شوف شمس الهجير لي روحي دايرة تطَلِّع
إن ضربت صديرك لي الضلوع بتشلِّع
لو مَرَق المخنفس فيها ببقى مصَلّع
في برميل عصير يغتِس ويابى يقَلِّع

حمدي (نرفزة)

من عز الصباح أنا روحي في وَحواحة
جَوعة وعَطشة كاربة وهضربة ونتَّاحة
شُفت البصلة قلت : أكيد تكون تفَّاحة
أشوف كِنتين عكاشة تكَنُّو (مول الواحة)

نرفزة
ــــــــــــــــــــــــــــــــــــــــــــــ
اليوم الرابع عشر
الليلة التلات الجو برودتو ظريفة
أهلا بيهو والجيب عادِم التعريفة
نحمد ربَّنا المولي وجيوبنا نضيفة
والفي جيبنا ما بجيب لي عيالينا رغيفة

متفرد

الليلة التلات والجو بديع ولطيف
فرحت الجميع عاد لا سموم لا زيف
الكل إنبسط، إحساس طبيعي وريف
إلا النكبة وين؟ الجيب طبيعي نضيف

مستك
ــــــــــــــــــــــــــــــــــــــــــــــ
اليوم الخامس عشر
انتصف الشهر والقمرا زايد نورا
والناس تنقسم ما بين حقيقي وصورة
واحدين في المساجد، سورة تِلو السورة
وناس: السوق ملوهو وولَّعوا البَنَضورة

(توضيح لأبناء العاملين بالخارج: البنضورة هي الطماطم)
كدرابي

انتصف الشهر وايامو جد محضورة
بي أملاك تَحُف في الدنيا تنشر نورا
خسران القِمِح من فاتحتا وكم سورة
ربحان الختَم قرآنو نالْبو سرورا

ود اب جني (عضو المنتدي)

انتصف الشهر .. سِبحة عباد مجرورة
والناس المطاميس في فرح وسرورا
الداير الأجُر .. جاييهو كابْ ماسورة
والكايس الهروب، ده فضايحو يوت منشورة

شاكر الرباطابي (صديق)

يوم الأربعاء يوم حار فريد من نوعو
اتجرّسنا جد من عطشتو ومن جوعو
رمضان فات خلاص بي رحمتو وبي خشوعو
خلاص العيد كبس باكر نضوّي شموعو

متفرد

يوم الأربعا التالت مدار اسبوعو
نُص شهر الصيام الجفَّ فيض ينبوعو
منَّ العطشة تلقى الزول ينوم في ركوعو
دا السبب البخلّي الواحد إلحَس كوعو

نرفزة

يوم الأربعاء تالت شهرنا الحالي
انقسم الشهر ، شهر الصيام الغالي
من حر الهجير أنا جسمي أصبح بالي
بصاتك بقت غير كندشات يا والي

مستك
ــــــــــــــــــــــــــــــــــــــــــــــ
اليوم السادس عشر
الليلة الخميس مليان سماهو غيوم
واحدين قالوا يا داب جانا جوّ الصوم
وواحدين بالفرح ديل كملوهو النوم
بي فارغ الصبر لا متين يتم اليوم
راجين الشَّواهي وقعدة الحَرُّوم

كدرابي

الليلة الخميس من فجرو أجمل يوم
والجو الجميل شهّاني كد الدوم
كتّاحة الصُبُح .. صحّتني من النوم
قبّال ما يأذِّن بدري حاج التوم

نرفزة

الليلة الخميس من دغشو باين يومو
جو الهمبريب ساهل ميسَّر صومو
خوف نص النهار الزول يمِد قدّومو
و تضيقْبُو الوسيعة يقِل مقيلو ونومو

مستك

أهـ أنا من خميساً شمسو بانت فاقعة
فعْلَها في الصليعة كأنّو فعل الصاقعة
قريت يس و طه و ص و سورة الواقعة
حتى رويحتي بعد العكرة راحت ناقعة

نرفزة

الليلة الخميس كان الفطور في الساحة
منبطحين نقرقر والنفوس مرتاحة
فجأة بدون مقدمة هبت الكتاحة
قلبت الجرادل والصحون وملاحا

نرفزة

متنرفز أخوي، يا زول أقول بصراحة ؟
الكتّاحة هينة وشطّة في ملاحة
كعب جرسة نهار من زول حياتو فصاحة
كاضم من دغش زي طيرة كاسرة جناحا

كدرابي
ــــــــــــــــــــــــــــــــــــــــــــــ
اليوم السابع عشر
يوم مبروك وفيهو النصر ولَّع شمعة
بدر الكبري جات ذكراها يوم الجمعة
ناس بقروها في القرآن بِنزِّلوا دمعة
وناس راجين صواني فطور ويَضرَبوا دمعة

كدرابي

دمعة لدمعة دي بتفرق كتير يا حُوَامَة
وتعرف إنو راجياك في النهاية قيامة
زول ايامو بالقرآن قضاها وصاما
وزولا صومو ما بين (البلي) و (الدَّامة)

متفرد

يوم بدر الرسول زاد فيهو شهرة وسمعة
صلي علي، يقيك الله ويزيدك لمعة
ورمضان باقي قيم الليل وجوة القلعة
افطر بالبلح واخْتَي القُرُص بالدمعة

شاكر الرباطابي (صديق)

تالت جمعة كانت جمعة جد معتبرة
في تاريخنا كانت فيها بدر الكبرى
ناس فرحانة تضحك وناس خانقاها عبرة
و أنا نص عمري ضايع بين هرماس وشبرا

نرفزة
ـــــــــــــــــــــــــــــــــــــــــــــ
اليوم الثامن عشر
الليلة السبِت وسبِتْنا ماهو يهودي
نطمع فيهو في الغفران من المعبودِ
ونجهز للعتق من نار جحيم موقودي
وليلة القدْرِ تبقي مُرادي هي ومقصودي

كدرابي

الشهر انتهي وانا لومي زايد (سي سي)
انشغل القلب بي وسوسة إبليسي
من قنوات جزيرة، حُرة، أو (ام بي سي)
ناس باروا اللعب والكورة (سيدا) و(ميسي)
سيبك من سياسة وانقلاب (السيسي)
أقبل للعبادة ان كان احصل ميسي

علي حمد (صديق)

الليلة السبت جدّدت فيهو عهودي
طهّرت النفس من سوء ظنون و حقودي
تنك السيئات فرّغت منّو وقودي
عبّيت فيهو جاز حسنات و قُت لها : قودي

نرفزة
ـــــــــــــــــــــــــــــــــــــــــــــ
اليوم التاسع عشر
الأحد العجيب من ليلتو جاب تبريدة
جانا الجو جميل جايِبلُو جَنَّة جَديدة
جنَّن جِنِّي جَرجَر قلمي سوَّا قصيدة
مَخْوَل مُخِّي خَلَّي خيالي زاد الريدة

كدرابي

الأحد العجيب أبواب سخانتو وَصيدة
صاد صيدة صبُرنا الماهُو قَصدو يصِيدا
صبَّت فيهو مطرة، صَبيب مُلاح في عصيدة
دا الخلاني اكتب كلْ دقيقة قصيدة

نرفزة

الليلة الأحد الجو حكايتو عجيبة
خلاص نزل المطر خلانا في ترطيبة
هجير (خرتوم) صعب فارِض علينا ضريبة
وانا (الخرتوم) دي كان قربت أمشي أسيبا

متفرد

الليلة الأحد الجو جميل يا احبة
وفي امدرمان هنا بشَّر مطَرنا وصبَّ
أخوي كُدُرابي من بعد اللهيب الشبَّ
دابْ فشفاشنا بالجو الجميل اتعبَّا

متفرد

اليوم الأحد حتحَتْ تُرابا شديدة
ما جو (عطبرة) عكسِ وحكاية عنيدة
ما بنعرف خريف وربيعنا شمسو فريدة
فوق للراس شِبِر داوشانا دَوشة شديدة
لا نقدر ندوبي لا نِتلَهِم بقصيدة
ننجع نوينا خلاص .. والنِّية زاملة سيدا

عبد الرحمن عطبرة (عضو المنتدي)
ـــــــــــــــــــــــــــــــــــ
اليوم العشرون
ليالي العتْق يا خوي تبدا منَّ الليلة
احزِم وانكرِب صِير لليالي خليلا
تشفيك من مرض إن كنت وَاهِي عَليلا
وفي ليلة القدُرْ تلقي العتِق من ويلا
نُوم من بدري راجياك ياخي ليلة طويلة
وابعِد من (كشاتِن) ديل و(قعدات) ديلا

كدرابي

من اولو مُنكرِب يا زول مصاحفي زميلة
ولي ليلة القدُر دي مطالبي ماها قليلة
مغروض ربي، ده اللي رويحتي دليلا
ما خاب من رجاهو وماهو عدمان حِيلة

عبد الرحمن عطبرة (عضو المنتدي)

ليالي العتْق جات، قيمو الليالي وصلُّوا
كتِّروا في الدعا يوماتي أوع تمِلوا
سيبو الدردشات في الفيس وما تِنسَلوا
ما يضيع الزمن، حتما تَميشوا تَجلُّوا

ابو طرطور الخيزراني

زولا حكيم راسي .. من ذنبو راجي فكاك
يتلو الكتاب يومو .. والليل صلاة وأنساك
مستثمر العشرة .. وربك محال ينساك
والغفلة بي ناسا .. في السوق تشوفا هناك
عمك سمين قاعد .. للجوطة والكوراك
راجي الفطور ولهان .. ما بطيقلو كلمة معاك
يضرب جداد ما بهم .. من ميكو أو من كاك

ود المبشر (صديق)

القفلة الحاسوبية
العشرة الأواخر جاتنا بي خيراتا
عشمانين نشوف ليلة القدر بي ذاتا
سووا الانكراب حلقة أضان وخياتة
خلوا الزهللة وما تبقوا فيها مياتا
نزلوا من فلاش التقوي كل الداتا

سيف (المستف العفشي)

العشرة الأواخر كتر وزيد أدواتا
دي الألفية قول واحد وجر حباتا
والتبروقة والابريق زايد الفوق بيبقوا تلاتة
أما الرابعة نفسك .. فرمت وزيل عثراتا

عبد الرحمن عطبرة (عضو المنتدي)

سوي دليت وامسح من فلاشك داتا
وبخس بالذكر حسدا معاهو غتاتة
العشرة القبل يومين دي حان ميقاتا
احييها بذكر .. صحي المصون وبناتا
لا يغرك كمان .. عطر العروس وحلاتا
علي قول (المستف) نادمين كسالة مياتا
وندمان الحرم بركة صلاة وخيراتا

ابو استياء القبوجابي (صديق)

من مواضيعي :

توقيع :
تعلق قلبي قطعة سكنيةُ مدبجة الأوراق محشوة الجُمل
رد مع اقتباس
 
 
 
 
قديم 31-07-13, 10:50 AM   #2
قريرابي نشط
 
الصورة الرمزية د. نجم الدين محمد الامين





د. نجم الدين محمد الامين غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

نعتذر عن عدم قدرتنا ايراد جميع المجادعات نسبة لغزارتها ولكننا رأينا ايراد بعضها هنا نسبة لأهميتها:

اليوم الثالث
شوفوا العطشة تهرس في عضامنا هريسة
متل الدابي أمشي تقول شربت مريسة
أكنكش في الرغيفة مع الفطور بي كيسا
زي أسد المغارة دا يوم قبضلو فريسة
نرفزة

اليوم الخامس
الأحد الختم سُدس الشهر خِلّايا
خامس يوم مسخِّن بس تقول قلّاية
ناس تحت الكنادش ، ناس يبِلّوا ملاية
و أنا تعبان مدَروخ نُمتَ في المصلاية
نرفزة

اليوم الثامن
يوم الأربعا الفوقو المتاقل بانية
حرا زمهرير واقف ديوش وزبانية
الراس الكبس متل الشرب شمبانيا
جهجه لي الخلوق في الباسفيك وألبانيا
المتربص أبداً

اليوم التاسع
يوم بُكرة الخميس ما عارفو كيفن شكلو
بتوقّع يكون حار في شرابو وأكلو
الناس في بعض ديل بالكتوف يتّكلو
في أبسط كلام من العطش يتشكلو
متفرد

اليوم العاشر
ناس فاطرين محاشي وأنا واجعني ضرسى
ناس ضاربين كنادش وأنا ضاربني كرسي
أنا منفوخ بلاوي كأنبوبة أبرسي
أنا حالتي بتَحنّن، زي حال سيدي مرسي
نرفزة

اليوم الثاني عشر
أنا عندي الأحد دا سخانتو جات مطبوقة
في ناساً كتار كاسرالا كم مخروقة
الناس بالعطش تعبانة ناشفة حلوقا
بخت ناس التلج الليلة ما يوم سوقا
متفرد

اليوم الثالث عشر
اليوم ناسنا قالوا يبدوا أول إصَلّوا
يرجعوا لي الفطور تاني و يدوسو يحلّوا
كبّروا لي الصلاة ،الكل وقف في محلّو
جات غنم الفريق لهطت فطورهم كُلّو
مستك المستكاوي

منعولة الغنم يا صحبي وين ما حلّو ا
بالحلومر كمان لي ريق لهاتن بلّوا
لهطوا فطوركم إنتو و شبعوا ثم انسلّوا
بي ورق الجرايد كيّة ليكم حلّوا
نرفزة

اليوم السابع عشر
موبايلي العنيد يا دوبو نَضَم العربي
تعليمو الكتير نقَّصلِي أكلي وشُربي
ميتين بول جَمَل من جيبي خانت دربي
كَتِّري في النضم، أوعاكي كان تنخربي
أبو طرطور الخيزراني
(توضيح: جابو ليهو جالاكسي 3 هدية وما عرف يشغلو عربي من اول رمضان .. ها ها ها)


توقيع :
تعلق قلبي قطعة سكنيةُ مدبجة الأوراق محشوة الجُمل
  رد مع اقتباس
 
 
 
 
قديم 04-08-13, 01:08 AM   #3
مشرف المنتدى الاسلامي
 
الصورة الرمزية سيف الدين محمد الامين





سيف الدين محمد الامين غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

التحية لك اخي نجم الدين ومعذرة لعدم المتابعة المتصلة معك في هذه البوستات الشيقة ، فقد انشغلنا كثيراً في هذا الشهر الكريم الذي نأمل أن يتقبل الله منا فيه الصيام والقيام . لعل بعض الرباعيات التي جاريتك فيها قد فقدت مني فهل جميعها لديك ؟؟ التحية لأفراد الأسرة ودعاؤكم لي بالتوفيق فأنا "توحّلت" في مشروع دراسي يزاحمني فيه الزمن


توقيع :

[ كل ابن أنثى وإن طالت سلامتُهُ * يوماً على آلةٍ حدباءَ محمولُ ]
  رد مع اقتباس
 
 
 
 
قديم 05-08-13, 12:26 PM   #4
قريرابي نشط
 
الصورة الرمزية د. نجم الدين محمد الامين





د. نجم الدين محمد الامين غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

اقتباس:
المشاركة الأصلية كتبت بواسطة سيف الدين محمد الامين مشاهدة المشاركة
التحية لك اخي نجم الدين ومعذرة لعدم المتابعة المتصلة معك في هذه البوستات الشيقة ، فقد انشغلنا كثيراً في هذا الشهر الكريم الذي نأمل أن يتقبل الله منا فيه الصيام والقيام . لعل بعض الرباعيات التي جاريتك فيها قد فقدت مني فهل جميعها لديك ؟؟ التحية لأفراد الأسرة ودعاؤكم لي بالتوفيق فأنا "توحّلت" في مشروع دراسي يزاحمني فيه الزمن
الأخ سيف .. السلام عليكم ورحمة الله

أولا: نسأل الله لكم التوفيق والسداد في مشروعكم الدراسي الذي وحلتم فيه .. وبالمناسبة يبث الآن في رمضان المسلسل الاذاعي (وحلان في الميدان) بطولة عبد الحكيم الطاهر بالاذاعة السودانية وهو حلقات شيقة تتحدث عن كيفية الخروج من (وحل الدنيا) إلي (سعة الدنيا)

ثانيا: جميع الرباعيات والخماسيات والسباعيات التي تصلني منك في الحفظ والصون بجهازي المحمول (برا) بغرض إعادة نشرها ضمن المنشورات (غير السياسية) بالمنتدي

ثالثا: سوف نقوم ببث مجادعات الثلث الأخير بمشيئة الله تعالي بنهاية الشهر الكريم ونتمني أن تكون عيدية شيقة لك ولأعضاء المنتدي عموم (كل سنة وانتو طيبين آآ ناس القرير)

  رد مع اقتباس
 
 
 
 
قديم 05-08-13, 01:29 PM   #5
قريرابي مميز





بت الملوك غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

وانت طيب وبالف خير وصحه وعافيه وكذلك اسرتك الكبيره والصغيره وكل أفراد حلمنتيش والتحيه لكل المجادعات ،،،،،،،،،،،،،،،،،،،،،،،،،،،،،،،،
لليلة الخميس مليان سماهو غيوم
واحدين قالوا يا داب جانا جوّ الصوم
وواحدين بالفرح ديل كملوهو النوم
بي فارغ الصبر لا متين يتم اليوم
راجين الشَّواهي وقعدة الحَرُّوم ............ ( بالله لسه في رمضان ده في قعدة حروووم ) ده اسمه سرطان السودان """

حقيقه كم هي رائعه وشيقه والله الواحد يتمنى انو ما تنتهي المجادعات ،، صراحة انتو مبدعين بالجد .. ومافي غير اقول ليكم ربنا يحفظكم " وياعين ياعنيه "
في الانتظار للعيديه على احرّ من الجمر .

  رد مع اقتباس
 
 
 
 
قديم 06-08-13, 11:00 AM   #6
قريرابي نشط
 
الصورة الرمزية د. نجم الدين محمد الامين





د. نجم الدين محمد الامين غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

يا بت الملوك .. شكرا علي الاطلالة
وأسمعي مني كشف الحال وشرح الحالة
الحروم بقن دايرات قصيد ومقالة
شادات الشواهي، ململمات رِجَّالة
سادات الشوارع وكل برندة وصالة

  رد مع اقتباس
 
 
 
 
قديم 10-08-13, 11:29 PM   #7
قريرابي ذهبي





أم مؤيد غير متواجد حالياً

من مواضيعي :
افتراضي رد: حلمنتيشيات: مجادعات الثلث الثاني

دكتور نجم الدين والمتداخلين
كل عام وانتم بألف خير وينعاد علينا وعليكم بالخير والبركات
امتعتونا بابداعاتكم ونحن في انتظار المزيد
لكم الف تحية

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع


الساعة الآن »09:30 PM.


Powered by vBulletin® Version 2014
.Copyright ©2000 - 2014, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل