"عيونك كانوا فى عيونى تحياتى ع... [ الكاتب : عمر محمد علي ترتوري - آخر الردود : درماس - ]       »     السلام عليكم ورحمة الله وبركات... [ الكاتب : درماس - آخر الردود : درماس - ]       »     ياا حليل حبوباتنا المريودات ..... [ الكاتب : عمر محمد علي ترتوري - آخر الردود : عبد المنعم عبد الرحيم حضيري - ]       »     اسبوع الراحل عبد الله محمد خير... [ الكاتب : سليمان عبد الله محمد نور - آخر الردود : محمد يونس - ]       »     العيد في منتديات القرير [ الكاتب : علي محمد أحمد (أبورنس) - آخر الردود : درماس - ]       »     آجماعة وينن ،،،، [ الكاتب : درماس - آخر الردود : درماس - ]       »     شقيق الغبشاوى في ذمّة اللّه [ الكاتب : عمر محمد نور - آخر الردود : فتح الرحمن احمد - ]       »     حليـل الكــان بيهدى الغير [ الكاتب : احمد عبدالله جقلاب - آخر الردود : درماس - ]       »     مالك ياكبوش عجلان مودع راحل [ الكاتب : عمار محمد ادم - آخر الردود : درماس - ]       »     العفو والعافية تحياتي عمر ترتو... [ الكاتب : عمر محمد علي ترتوري - آخر الردود : درماس - ]       »     "صلو على النبي يا جماعة" [ الكاتب : عمر محمد علي ترتوري - آخر الردود : درماس - ]       »     عفواً سونا.. بقلم الأستاذ [ الكاتب : عمر محمد نور - آخر الردود : درماس - ]       »     أريحيات شيخ العاشقين.. بقلم حس... [ الكاتب : عمر محمد نور - آخر الردود : عمر محمد نور - ]       »     ماها لابسه تياب للسماح ..السما... [ الكاتب : عمر محمد علي ترتوري - آخر الردود : عمر محمد علي ترتوري - ]       »     نفّـــــــاج: [ الكاتب : عمر محمد نور - آخر الردود : عمر محمد نور - ]       »     الكرفين والشربكة في الكرعين . [ الكاتب : عبد المنعم محمد توب السوق - آخر الردود : عبد المنعم محمد توب السوق - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     يا عين يا كافرى يا نصرانيه اخر... [ الكاتب : عمر محمد علي ترتوري - آخر الردود : عمر محمد علي ترتوري - ]       »     اصوات فقدناها . [ الكاتب : عبد المنعم محمد توب السوق - آخر الردود : عبد المنعم محمد توب السوق - ]       »     فوائد ودرر [ الكاتب : فتح الرحمن احمد - آخر الردود : فتح الرحمن احمد - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > منتدى التوثيق > منتدى منحنى النيل الادبي
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 06-08-17, 05:12 PM
الصورة الرمزية سليمان عبد الله محمد نور
سليمان عبد الله محمد نور غير متواجد حالياً
المشرف العام
 





افتراضي اسبوع الراحل عبد الله محمد خير في منتدى منحنى النيل

السلام عليكم ورحمة الله وبركاته

من مواضيعي :

توقيع :



رد مع اقتباس
 
 
 
 
قديم 06-08-17, 05:13 PM   #2
المشرف العام
 
الصورة الرمزية سليمان عبد الله محمد نور





سليمان عبد الله محمد نور غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

كتب الاستاذ السر عثمان الطيب :
بسم الله الرحمن الرحيم
الإخوة والأخوات في قروب منتدى منحنى النيل الأدبي وكل أعضاءه وكل الحاضرين وغير الحاضرين الآن السلام عليكم ورحمة الله تعالى وبركاته أنا أخوكم السر عثمان الطيب .

في البدء نترحم على روح حبيبنا واخونا الراحل الشاعر الكبير عبد الله محمد خير ...
نسأل الله أن يتغمده بالرحمة والمغفرة ويدخله فسيح جناته بقدر ما قدم وأعطى من فن وأدب رفيع .

شكراً لاخواننا في منتدى منحنى النيل الأدبي لاهتمامهم بالتوثيق للراحل عبد الله محمد خير ويشرفني أن أكون مشارك معكم ببعض الاضاءات حول الراحل عبد الله محمد خير .

الحقيقة كنت قد اتكلمت عن الشاعر عبدالله وسجلت في مقاطع عديدة وبحثت عنها ولم اتمكن من إيجادها كانت بتوفر الكثير من الجهد والوقت وتساعد في كون أن المسألة تكون موحدة لان الذاكرة ما عادت كالسابق ...

سأقوم بالتسجيل من جديد وأكرر شكري للجميع وسأكتفي بهذه المقاطع لانها تنسق الوقت وتحافظ عليه وتحافظ على ترتيب الأشياء وحفظها والاستفادة منها في المستقبل بحيث نقوم بإنزال المواد والاستفادة منها في المستقبل ...

طبعاً الكلام عن أستاذنا وحبيبنا الراحل عبد الله محمد خير كلام حقيقة يطول كتير جدا جدا خاصة ونحنا زاملناه وصادقناه وجايلناه كشعراء وكاخوة وأصدقاء وناس منطقة وحده ... أنا عتبر إنو عبد الله عليه رحمة الله واحد من أبرز شعراء أغنية الدليب وابرزهم على الإطلاق وأنا بقيس دا بي الكم الهائل من الشعر والإبداع الكتبو عبد الله محمد خير وبقيسو برضو بالكيف لانو عبد الله كان عندو أسلوب متفرد بسيط جرئ وغزير أنا بقول إنو عبد الله كان واحد من أولاد جيلنا الما بتكرر زيو تاني ابدا شكّل هو وذلك الجيل نحنا اتعاصرنا يعني في بداية السبعينات هو ومحمد سعيد دفع الله وإبراهيم إبن عوف وإذا اجزتم لي أن أكون رابعهم فبها وإن لم فلا عتب هذا الرباعي انا بفتكر انو هو الأحدث الانقلاب أو الثورة الهائلة في أغنية الدليب بكل ما تحمل كلمة ثورة من معاني دا بي ثنائياتهم مع اخواننا صديق ومحمد جبارة ومحمد كرم الله وغيرهم من الفنانين تلك المرحلة من كانو قبلنا بقليل ومن جو بعدنا ...
يعني الجيل دا عبدالله ومحمد سعيد وإبراهيم إبن عوف والسر عثمان الطيب إن شئتم دا جيل أعقب رواد الغناء اب شيبة ومحمود خضر ونور الهدى كنه وعبد الله كنه واستاذنا وحسن الدابي وعدد كبير جدا من الشعراء المجال ما بيسمح انو نعددهم أو قد يفوت إسم واحد منهم ...
ديل نحنا السبقونا ديل اتعلمنا منهم كل واحد فينا شقا طريقو بما اوتي من قدر من معرفة ومن وموهبة .

عبدالله محمد خير عليه رحمة الله كان من أبرز المجموعة الأنا ذكرتها دي ودا والله أنا ما بقولو لا مجاملة ولا حاجة لكن دي الحقيقة وأنا كنت بتمنى إنو اخوانا في إدارة المنتدى يعني يستكتبو وستنطقو أخونا أهم حاجة اخونا الحسينابي واخونا دكتور توفيق شايفو برضو موجود وإخونا طارق عباس وبرضو الناس الجايلو اخونا عبد الله من الدارسين والنقاد والباحثين فشعر عبدالله محمد خير كشاعر عليه رحمة الله ودراسة شعرو وتحليلهو وعرضو الناس ديل بشوف إنهم أكتر الناس عندها القدرة على إلقاء الضوء عليهو ...

واواصل معكم واقول نحنا في بداية السبعينات دي أنا أتذكر أول ما أنا سمعتا بي عبدالله محمد خير عليه رحمة الله وزي ما أشار اخونا حسين حمد الحسين وعبد الله محمد خير محمد خير فأنا أول ما سمعتا بي أخونا عبد الله محمد خير كان من أخونا دكتور زكريا علي أحمد من أبناء الجابرية سكنا فتره سواء في كلية التربية وكان عندو جيتار وبرضو زكريا كان بدق الطمبور وانا كان عندي طمبور وزكريا كان عندو جيتار فكنا شنو أنا سمعتا كنتا إنو حبيبي سيب الصدود سيب الجفاء كدا يعني في أوائل بداية ظهور أخونا عبد الله محمد خير فكنا بنغنى حتى فيها كدا من البريد جاب لي حقيقة ومشرفة وقال تومتي وصلت بالسلامة قضارفا .. فعلى أي حال دي كانت بداية والزمن داك سمعنا بي عبد الله محمد خير دا بي إسم عبد الله عبدون وزكريا يقولي عبد الله عبدون تاني بعد داك ما زمنن بعيد يعني قريب من الحكاية دي كان في أخونا الله يرحمو اصدقاءنا واخواننا ناس القلعة القرير اسمو عبد الله محمد خير قمبور عليه رحمة الله فيوم أنا في بيتهم في الموردة فقام قالي والله انا سمعت في فنان اسمو صديق أحمد في الإذاعة غنى أغنية وقال انو الاغنية دي من كلمات عبدالله محمد خير
فعبدالله محمد خير قمبور عليه رحمة الله كانت عندو محاولات الت شعر قمت قلتا ليهو إنت صديق دا لاقيتو بتعرفو ولا اديتو حاجة قالي لا لا لا فقلت خلاص المسألة ياها اخونا عبد الله عبدون او عبد الله محمد خير دا الكان حاصل يعني
الزمن داك برضو عبد الله محمد خير كنا بنعرفو بي عبد الله عبدون .. وصديق لما ظهر زاتو كان مرات نقول صديق أحمد التاجر ومرات نقول صديق الدبه إلى أن أستقر الإسم أخيرا الفني الثابت حاليا صديق أحمد ....
أنا أواصل بعد داك اهو في دروب الفن دي والناس جو الخرطوم وامدرمان وكدا يعني بقت الناس تتلاقى في أحيان كتيرة في جلسات الغناء والقعدات في الحفلات وبقى عبد الله هو واخونا صديق أحمد متسيدين الساحة في المناسبات العامة في المناسبات الخاصة وكدا ... بقى عبد الله يعني هو واخونا صديق الله يديهو العافية متسيدين الساحة في الغناء وبعد داك جات الأغنية بتاعت اتغربت في حبك كتير واتعذبت بالريد يا أمير ودي كانت عليه رحمة الله عبد الله قال فيها يا حلم السعيد ما كان أخير تسيب الريدة تنساهو القرير تنسى عذابك القاسي المرير وتسيب اشعارك الفوق الحفير وبعد داك قال فيها ماك عارف العلي أنا يا السرير بشوفك قبلي بالاهات خبير ود الدابي استاذي القدير وغلبت الحيلة وجيتك مستشير ودا كان من أجمل وأروع الاخوانيات التي تبودلت في ذلك الزمن وقام عبد الله كتب تاني ود الدابي مالك ساكت ما شفت الجلا السواها شال محبوبتي سافر بيها كيفن عاد أعيش لولها حسن قام ردا عليهو بي قول صحيح يا عبدو أخوي قولك حقيقة وكتير الطفشا الجلا من فريقا ...
لما الكلام دا اتكتب نحنا ما كنا لحدي الزمن داك لما الاغنية دي مرقت وكدا وحسن ردا وكدا ما كنا لاقين عبد الله محمد خير شخصيا يعني
ما لاقيناه الا بعدها بزمن طويل جدا جدا لكن أول مره نلاقي عبد الله محمد خير ونشوفو كان الكلام دا في عرس اخونا واستاذنا وخالنا محمد سعيد دفع الله في القرير سنة 1976 ونحنا قمنا مشينا وكان عرس لامي لمه كبيرة شديد خلاص ونحنا نزلنا مع محمد سعيد كلنا وبعدين طبعا زمان العرس بالأيام مرات يكون بالاسابيع الليلة دوره المناسبة تطول شديد جدا جدا وغايتو يوم العصر نحنا قاعدين في بيت ناس محمد سعيد دفع الله كولنا شباب كدا ومحمد سعيد محنن بلا كان في مامان والمرحوم حسن الدابي ومجموعة من ناس البلد والناس الضيوف حنه العصراوية كدا كنا أنا ومامان بنغني شايلين لينا طمبورين وكانت أفضل ثنائية بالطمبور كنا قاعدين نغني في أغنية العطبراوي نسانا حبيبنا الما منظور ينسانا قام جاتنا فكره كدا قمنا قلبناها دليب قلبنا إيقاعها دليب وبقينا نغني فيها وبالمناسبة التسجيل دا لحدي اسع موجود تلقو عند مامان وعند محمد سعيد دفع الله نفس التسجيل من سنة 1976 لحدي الآن قاعد نسانا حبينا ما منظور ينسانا مالو روح ما طرانا حليل الخوه الما قدر عشانا ونغني فيها بي ايقاعنا والله طلعت حاجة جميلة خلاص ان شاء الله مامان تكون عندو أظنها عندو والله على اي حال نحنا على نهايات الأغنية قام وقف لوري في بيت ناس محمد سعيد بس فوق الدرب الليل الواري زمان زمن الدرب كان بي تحت ...

ووقف اللوري عادي اللوري أصلا بقيف يعني ينزل الركاب وينزل الجايين الرايحين الكدا يعني جاء نازل منو زول والله أنا اذكر الحظة دي لحدي الآن زي القدام عيني جاء داخل جلابية كبيرة كدي دا عليه رحمة الله كانت جلاليبو كدا يد الجلابية دائما يسويها كبيرة ومرات تكون انصارية عليه رحمة الله المهم جاء داخل ووقف كدا ختا ايدو قال والله أنا غايتو المحنن دا عرفتو محمد سعيد دفع الله ودا عرفتو يبقالي دا حسن الدابي والشايلين الطنابير ديل غايتو قد يكونو السر ومامان المهم ياخي بي اريحية شديدة جدا وبي حس صادق جدا جدا تقريبا عرفنا كلنا كدا يعني ما شافنا قبل كدا ما اتلاقينا فقام قال أنا عبد الله محمد خير والدنيا دي جاطت اهلا اهلا اهلا والناس رحبت بيهو وقمنا سلمنا عليهو وقضو معانا أيام العرس كتر خيرو ودي المناسبة في نفس الليلة ديك أنا كنتا كاتب القصيدة بتاعت بسم الأرض واللوبا والعيش ريف لي خالنا محمد سعيد بي مناسبة زواجو بعد داك عبدالله في نفس الأمسية دي قدم قصيدة لي محمد سعيد بي مناسبة عرسو وكان القصيدة إنما قصيدة يعني كانت مشاركة نادرة الحدوث تنم عن مدى صدق المشاعر والعلاقات بين الناس في ذلك الوقت كشعراء وكاخوة وكدا يعني بعد داك بعد العرس أنا قمت سافرت السعودية العرس كان شهر 6 تقريبا وأنا سافرت السعودية شهر 9 سنة 1976 ...

أواصل معكم بعد داك تشتت بنا سبل الحياة نحنا اغتربنا ومامان اغترب ومحمد سعيد اغترب وعبد الله محمد خير عليه رحمة الله برضو اغترب وواصل مسيرتو البارزة وبعد العودة بعد رجعنا كلنا رجعتا أنا ورجع محمد سعيد ورجع عبد الله برضو بقينا نتلاقي لماما إلى أن حلا بي أخونا وحبيبنا عبد الله محمد خير المرض وأنا بفتكر إنو المرض دا كان مؤثر بارز جدا جدا على مدى قدرة هذا الرجل على التحمل مرات نحنا نتكلم معاهو يا عبدالله دي لا مبالة ياخ ما معقول إنت لا تبالي في صحتك كدا يعني وشجاعة غريبة جدا جدا وأنا بفتكر دا توكل ونوع من التوكل على الله وقدرة على التحمل عجيبة جدا جدا وقلما تتوفر في إنسان لكنو كان صامد وكان قوي وشجاع في رحلة مرضو دي ابدا ما هزتو في مسار الرحلة دي كنا متواصلين معاهو وأذكر كان رقد في مستشفى أحمد قاسم عليه رحمة الله وأنا والله اليوم داك حقيقة ما بنساهو تحديدا نحنا مشينا ليهو كم مره لكن اليوم الداير أحكي عنو دا ما بنساهو خالص خالص دي يعني من الذكريات المؤلمة جدا جدا قمنا مشينا ليهو كدا كلنا أنا والمرحوم حميد الله يرحمو مشينا المستشفى زرناهو قعدنا معاهو صنقر مع إنو كان مرهق شديد وتعبان لكن بشه في وشنا وانبسط شديد جدا جدا وقعدنا نتونس نتونس شايف المسألة دي نحنا كنا بي إنو الموقف كان يعني حقيقي هزانا هز شديد دايرين نمرق من جمبو ما قادرين نحتمل إنو نشوفو يعني في تلك الحالة وهو عكسنا كان وكان قوي شديد جدا جدا وكل ما ندور نقوم يمسك فينا ويقعد يبكي في النهاية اضطرينا قمنا وغلبتنا الحكاية قمنا مرقنا برا وبعد مرقنا أذكر جملة قالا لي حميد بي صوت مقطع كدا قالي والله يا السر أنا خايف كدا زي قريت يعني لكن قمتا قلتا ليهو خايف من شنو قالي يا السر ياخ خايف عبد الله دا يموت قالي يا السر أنا شايف حياة عبد الله دي شايفو متشجع كيف لكن عبدالله دا ممكون فقلتلو الأعمار بيد الله المهم شجعنا بعضنا وقمنا مشينا قام بعد داك مشى الأردن وبقينا على تواصل معاهو أنا بتذكر فيهو بالتلفون ونوع الناس الممارضنو برضو لما حصل أمر الله وعرفنا بالوفاة في نفس لحظتها تقريبا وانا قمت مشيت علي حميد عليه رحمة الله ومشينا قعدنا انتظرنا الجثمان لحدي ما جاء المطار وكان في جمع غفير جدا من الناس وتم الدفن في مقابر أحمد شرفي الفي شارع الوادي دي ..

عليه رحمة الله نحنا ندعو له دائما والله وعز علينا رحيلو جدا جدا وأنا بفتكر إنو دي يعني إرادة الله واقدارو ونسأل الله له الرحمة والمغفرة وإنا لله وإنا إليه راجعون ...

وشكرا للاخوة كلهم القائمين على أمر هذا المنحنى منحنى النيل الأدبي وشكرا للحضور وأنا اكتفي بهذا القدر واستودعكم الله وأتمنى لكم التوفيق وبارك الله فيكم كلكم جميعا مشاركين وحضور ومستمعين وكل أحبابه عبد الله واسرته أسأل الله ربنا يصبر الناس على فقده .


أخوكم السر عثمان الطيب


توقيع :



  رد مع اقتباس
 
 
 
 
قديم 06-08-17, 05:15 PM   #3
المشرف العام
 
الصورة الرمزية سليمان عبد الله محمد نور





سليمان عبد الله محمد نور غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

*السلام عليكم ورحمة الله تعالى وبركاته ... مساء العوافي عليكم .*

ونسأل الله المغفرة والرحمة والقَبول لأستاذنا الراحل الأديب الشاعر الجميل الشيخ العاشق عبد الله محمد خير ..

نسأل الله العظيم رب العرش الكريم أن يجعل قبرة روضة من رياض الجنة ...

يمكن والله أنا أصغر بي كتير وأقل أولا أن يطلق من لساني إسم عبد الله محمد خير أو أعلق على مسيرة الراحل عبدالله ...

مسيرة كانت زاخرة بالألق والجمال ...
واهذب الكلمات وعبد الله محمد خير يمكن أصدق من يتحدث عنه هو القامة صديق أحمد لعل عبدالله وصديق أحمد كانت تربطهم علاقة كعلاقة عينان في رجل واحد أو وجهان لعملة واحدة المسيرة يمكن كانت مُشّكلة في ثنائية بين صديق وعبدالله ويمكن %95 من قصائد الاستاذ الراحل عبدالله رددها القامة صديق أحمد ..

فيمكن تزاملو في الدبة وهاجرو إلى المملكة العربية السعودية وقضوا عصارة شبابهم في المملكة . عبدالله كان كتاب مفتوح لعشاقو ولأغنية الطمبور وكان زول قريب جدا من الجمهور وكان تربطو الجرافة ويربطو شارع الدكاترة أم درمان ...

والشباب العاصرو عبد الله محمد خير في الأيام الاخيرة منهم الفنان ياسر الحجير ومنهم الاستاذ الشاعر عثمان عوض عثمان ضرار الشاعر الجميل الذي سطر
*زي لون الفرح زي نسمة زي طعم السعادة أماني ومن عينيها أول نظره دوبت العناد في كياني*

*باكر بجيك قاطع مسافات العشم وشايل معاي هوى العيون وآهاتي في أجمل نغم*

*سمرا عذراً سمرا*

*حدثتني سحابة عنك وكلمتني وقالت إنك كل جميل في الدنيا منك الصباحات ماخدة لونك والظلال الوارفة حنك*

*تجمعني بيكي ظروف وأنا وإنتي والأحباب بين الأماني نطوف*

وكتير من قصائد الجميل عثمان عوض ضرار يمكن كان تربطو الجيرة ويمكن معظم دواوين عبدالله محمد خير كان يرتبها ويحفظها ويصيغها الأستاذ عثمان ضرار
واستاذنا الجميل عبد الله عبدالرحيم أبو سير كان تربطة علاقة جيرة حيطة بالحيطة في الجرافة مع عبدالله محمد خير
وعبد الرحيم أبو سير شقيق الأستاذ الجميل علاء الدين ابسير تربطهم علاقة طيبة جدا بالراحل عبدالله ...

وأيضاً المحامي والمستشار القانوني الأستاذ عبدالرحمن الحسينابي ...وأيضا الفنان الجميل ...
*عافي منك وراضي عنك*

*حبي أنا ليك كان زادي*

*لا بايدك ولا بايدي*

*عبدالرحيم أرقي*

وأيضاً من أبناء أرقي الشاعر الجميل عباس عيسى فيمكن كل هؤلاء سيضيفوا كتير لمسيرة أستاذنا عبدالله محمد خير

وكان تربطو ثنائيات كتيرة جداً جداً ومناكفات ومجادعات بينو وبين أستاذنا الجميل حاتم الدابي ..

*دمتم ودام النيل ودام المنحنى ودام الخير لشمالنا الحبيب وشكراً على التأشيرة تأشيرة الدخول لهذا الأسبوع الذي سيكون زاخر بالجمال والإبداع*
*مع بالغ حبي واحترامي للجميع*

محمد ابراهيم غالب (ود إبراهيم)

  رد مع اقتباس
 
 
 
 
قديم 06-08-17, 05:18 PM   #4
المشرف العام
 
الصورة الرمزية سليمان عبد الله محمد نور





سليمان عبد الله محمد نور غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

كتب المحامي الاستاذ عبد الرحمن الحسينابي :

عبدالله عبدالله محمد محمد خير...اشتهر عبدالله والده ب(عبدون)..وترك الاعلام اسم والده وجده الاول..والحقه بجده الثاني (محمدخير)..فهو اكثر شعراء المنحني القابا...هو عبدالله محمدخير ~ عبدالله عبدون ~ عبدالله الشاعر ~ولقبه ابناء جيله ب(النجيفي)..ومعروف بين كبار القريةب(الخليفة)..وهو من عناه صاحبه الدرويش في قوله
(خلت منجلا ومسكت وظيفة
..وظيفة ما اتلقتلك يا الخليفة).
من عجائب القدر ان الشاعر يعد خلاصة منتقاة من كل قري وقبائل الشمالية تقريبا..وهذا ما لا يعرفه عنه الناس...فأمه زينب الخضر..الخضر من الهاجماب من تنقسي الجزيرة...وجدته لامه فاطمة بنت محمد نور جدتها لابيها من ارقي...من اسرة (كودي)..واصلهم دناقلة..وجدته لابيه خديجة بت سيد احمد.وامه فاطمةعبدالوهاب سليك من السالكية..وكانوا يقيمون بالزومة..اماجده لابيه فأمه .محسية خالصة..اذن كما تمدد عبدالله شعرا علي بقاع الشمالية..فهو متشعب نسبا واعراقا في اصولها ...
البيئة التي نشأ فيها تتنفس الشعر...وقداشتهرت به حتي قال جيرانها ان جد الحسيناب دعا الله ان يصيب ذريته بالغني....فجعلها الغناء خطئا...فاستجاب الله دعوته وابتلاهم بالغناء...
كانت والدته ست زينب بت الخدر شاعرة..وكانت من
حليفات اشهر شاعرات المنطقة(عاشة بت عبيد.). وكانت جدة والده (طيبة بت فضل) شاعرة يهابها الشعراء..
وفي اخر ايامها قالت:
بعد ما كنت منجمي
انوم في بيتي متلمي
بقيت هم لي ولاد امي..
وشقيقها محمد ود فضل المشهور ب(ودحسين) اشهر مداح منطقة الدبه واكثرهم نظما...وعمته ستنورعبد الواحد..المراة التي جاءت بالحداثة في شعر النساء من الجزيرة..قالت:
انت يا عوض الكريم بالحالة تدري
انت ربيت لي الصغارحتي البيقرا
يابا اخيك تاه مع( الكنكان والبصرة..!!)
و☆لاتنسي عمته البقيع..واخته الشقيقة خديجة بت عبدون
...ولن يسع المقام من نشأ الشاعر بعدهم او بعض من عاصرهم..او جاءوا بعده.
☆☆☆☆☆☆☆

عبد الرحمن الحسينابي

  رد مع اقتباس
 
 
 
 
قديم 06-08-17, 05:26 PM   #5
المشرف العام
 
الصورة الرمزية سليمان عبد الله محمد نور





سليمان عبد الله محمد نور غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

الرحلة الفنية 1968-2010م افرزت اكبر منتوج بين شاعر ومغني..حيث لحن صديق احمد اي كلام كتبه عبدالله محمد خير...والنتيجة اكثر من ثلاثمائية اغنية بلغة فوق المحلية ودون الفصحي فكان ان ارتقت هذه المدرسة باغنية الطنبور..واخرجتها. من دارجيتها الممعنة في المحليةووضعتها جنبا الي جنب مع اغنية الوسط ال
مفهومة والمستساغة للجميع دون ارتباط بمنطقة معينة.
عبدالله محمد خير بعد عودته من الدويم لم يجد احدا من اقرانه واصحاب نشأته ودفعة مدرستة قصيرة الاجل....تفرقت السبل بالجميع..منهم من واصل تعليمه..ومنهم من نفته الحاجة الي العمل وتوفير لقمة العيش كحال. الشاعر..فركن الي هذه الشلة الجديدة..وجميعهم يصغرونه سنا...وتستهويهم مسألة ظهورهم كفرقة فنية لصديق احمد..واصدقاء لشاعره....وكحال تلك الايام كان لكل منهم حبيبة يراسلها سرا..ويناجي طيفها....والشاعر يعرف تفاصيل كل ذلك بحكم مساكنته لهؤلاء الشباب...ويداعب الطرفين..(الحبيب والحبيبة) بالاغنية والرسالة..بل ..ويصرح بالاسماء..وتنفجر المفاجأة في اقرب مناسبة فرح.....ولعل المتتبع لشعر النجيفي يجد فيه من اسماء النساء والرجال والقري مالا يجده عند اي شاعر اخر.....والناس امام هذه الظاهرة منقسمون الي قسمين..قسم يفهم ما احاط بمولد القصيدة...وما تحتويه من اسماء....وياخذ الامر كما يفهمه..وقسم يتساءل كيف يغني شاعر واحد لكل هذه القري بنسائها ورجالها....غير ان الفريقين متفقان علي ان مقدرة عبد الله محمد خير علي نظم مثل هذه القصائد لا تقاس بمقدرة الشاعر المعروف الذي يعبر عن مكنونات نفسه ولواعج اشواقه...
عبدالله محمد خير لم يكن شاعرا وحسب..بل كانت ملكاته الشعرية تتفوق علي احاسيسه الشعرية..وتفيض لتعبر عن الاخرين...ولعلك تلحظ ان عبدالله لم يقف امامه حرف من حروف العربية الثمانية والعشرون ليصعب عليه...بل حوت قوافيه اي حرف تكلمت به العرب...كأنه لم يسمع بالقوافي الحوش.....وهي الحروف التي يشق علي الشعراء اتخاذها قافية..او حرف روي....نحو الشين.والجيم..وغيرها..
وحتي ما كتبه بهذه الحروف انساب رقة وسلاسة لم يشعر مستمع بخشونتها...مثلا:
الحن نار عويش....
العيد المضي...
ماخلاص سيبيهو ماتسويهو حجة...
ولعله تعجب هو نفسه من ذلك حيث يقول:
فيك طوعت الحروف طاوعني حرفي

☆☆☆☆☆☆☆☆☆☆☆☆☆

السمة العامة لشعر عبدالله محمد خير
هو انه نظم بلغة وسطية حديثة وبسيطة...بمعني انه خلع عنه ثوب استاذه حسن الدابي الذي اسس للمدرسة التصويرية في غنائنا هذا..وانشغل برسم المرأة في حركاتها وسكناتها..وحزنها وفرحها...وحتي اشارتاتها الغزلية...
طريحة وبيها يتبلم...
اظنو علي هلاكي عزم....
او:
الصدير نتقاتو ربن لي خوفا..
او:
تاق لحظني.وجفل الجموح....
وتخلص من لغة استاذه المحليه في نحو قوله:

مسخت عوم البترطن في جروفا
اه يا خلايا فجولي اللشوفا..
ثم نسج علي منواله بلغة اقل كثافة وانعم ملمسا...
فقصيدة الدابي اعلاه تتطابق مع قصيدة النجيفي:
تعلي صديرا قداما تخلي سبيبا يدلي
تخلي الدارة فوق نيرانا تتقلي....
وخاصة في قول الدابي:
بروقيها الدارة برجلي لي صفوفا
خلي عزالك عديل تخضع انوفا...
هذه البساطة والتلقائية تقدمت بهما مدرسة الدابي وتلميذه علي كافة .


عبد الرحمن الحسينابي

  رد مع اقتباس
 
 
 
 
قديم 19-09-17, 08:36 PM   #6
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

اهلا وسهلا بيك يااستاذه وبالحضور الكريم
شغلكم نضيف وجميل اي تمام ده شغل القروبات التمام تحفظ حق المبدعين وتعلم الاجيال من هم مبدعيها ومفكريها شكرا لكم لفته جميله ولايعرف الفضل الا اهل الفضل
الاستاذ عبدالله كان جمعيه ادبيه متحركه في الرياض يعرف كل منطقه وكل جمعيه وناسا شوايقه ودناقله ومحس دخل كل هذه الجمعيات في الرياض وخلق بينها تعارف هو من اسس لكيان الشمال هو من بدا طريق شريان الشمال له علاقات ممتده مع كل السحنات ولوف جدا يحب كل الناس اي زول يقول ليك عبدالله صاحبي شديد ومميزني براي
جانا في الرياض زياره ومعه الاستاذ صديق في شارع الريل كانت جمعيه ابناء نوري وكان يحب نوري شديد
كان ينثر الفرح والطرب كل خميس لي ابناء السودان اما في استراحه او جمعيه تخص المنطقه
عبدالله محمد خير غفر الله له كان صديق لي وحبيب
جاء زياره الي دارنا في الرياض بشارع الريل ونظم الينا جلسه شعريه جميله
وفي تلك الليله قال لي شرومي عبدالله رحب بالضيف
وقلت له
اهلا حباب عبدالله جانا الليله عيد
اهلا حباب سيد النضم سيد القصيد
اهلا حباب سيد عصرو اللبق الفريد
عصرك زمان وسط القمم ندك لبيد
شرفت دارك يالعزيز والريل سعيد
طبعك سمح تصل القراب تصل البعيد
أكرمتنا واكرمت نوري بي قدومك ياالعبيد
الليله زينت المكان وعطرتو بالشعر المفيد
استاذ ترات يحلو التراث بي وصفك السمح السديد
عبرت عن ألم البعاد زينوبه مابيت القصيد
مجدت وطنك بالشعر وغنيت للماضي التليد
من بدري تمدح في الجمال وصفا مشبع وكيف نجيض
زارتنا بركه نقول حباب والكل سعيد
عبدالله كان يقول الشعر متي مااراد وفي اي زمان واي مكان عبدالله ممكن يرتجل قصيده عصماء بس انت حدد ليه وابعد
عرف كره الاستاذ الدابي للبواخر فكره البواخر وسار مع استاذه الدابي علي نفس النهج ولو مدح الدابي واداه طرف المدح لكان قلب مركب سرور ام فلق بابور بحر

عبد الحليم عقيد

  رد مع اقتباس
 
 
 
 
قديم 19-09-17, 08:42 PM   #7
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

كتب الصحفي *الحبيب عمر ترتوري*:

؛-؛-؛-؛-؛-؛-؛-؛-؛-؛-؛-؛-؛-؛-؛؛-؛-؛
*التويمات وقريباتى وعبدالله محمدخير وصديق أحمد*
؛"-؛"-؛"-؛"-؛"-؛"-؛"-؛"-؛"-
الشاعر المبدع : *عبد الله محمد خير*
كل أشعاره أسهمت في تشكيل وجداننا فكانت وستظل خالدة في وجداننا والكثيرين غيرنا الذين عشقوا هذه المفردة الرائعة الأنيقة ... لقد شكل الشاعر *عبد الله محمد خير*مع الفنان القامه *صديق أحمد* ثنائية للإبداع والفن لن يجود الزمان بمثلها مرة أخري ....
حقيقة المبدع عبد الله محمد خير كل قصائده تنبض بالأحاسيس والمشاعر وتتلقاها الأفئدة كما الدماء التي تغزي الشرايين ..
يتميز شعر هذا المبدع ببساطه وتلقائيه عجيبه .. تتسرب مباشرة الي القلب دون أستئذان..
وتعجبنى جدا كلماته *التومات* التى كنا نرددها كثيرا و كانت تطلب من الفنان صديق فى كل مناسبه ..واتذكر جيدا قريبتى التى كانت تدرس بالمرحله الثانويه و شقيقتها بالمرحله المتوسطه و كانت هى واختها صديقتان لا يفترقن أبدا ولكن تزوجت الصغرى وكانت اختها تبكى ليلا نهارا لفراقها وتردد هذه الاغنيه من كلمات المبدع عبدالله محمدخير واداء الفنان :صديق احمد
؛-"؛-"؛-؛"؛-؛:-؛"؛-؛"-"؛-
خلهن سوا لا تفرقن
يالله توماتى انا بعشقن
دوره دوره انا بنتاوقن
لحظة مابقدر أفارقن
ليه عيونى الشوق حارقن
والدموع دايرى تغرقن
والدن قال ما يمرقن
خايف النظرات تلحقن
وخايف العين ما تعوقن
كان زمان لى شتلو يسقن
ومره فى اللوبى يورقن
ديمه بالقعده ينقنقن
ويحلفن لو ابي ما يصدقن
هن وين تانى بيتلقن
وليه يحفظن الخالقن
يا عيونى انا لا تزهجن
ولى مشاعرى انا لا تزعجن
لى خيوط السعد انسجن
يمكن التومات يخرجن
خطوه ... خطوه ... بيندرجن
وفى عذابكن بيتفرجن
انا ما بخاف الموت والسجن
والله جسمى الصبى يتعجن
هن مالن ابن ما يجن
ويا الله مالى انا ماشى اجن
ما بصح يا الحاج اب شنب
ولسه ديل ما بقو للادب
فى المعاملة ما تكون صعب
انت ما تقسى على العنب
وما تعكر موية الدهب
شمعتين اوعه من اللهب
ونحن يا الزينيين لينا رب
متلى كم زول مات بالشجن
وقبلى ود الزومه انسجن
من ضفاير بتموجن
من خدودا بتوهجن
من تويمات اتخرجن
من عيون اترابن نجن
فوق عروش الحيا توجن
لى مريضن ما عالجن
قلبى نيرانو اتاججن
وكل اعصابو اتبنجن
مالى قبلاتى اتعوجن
امشى وين يا نور الدجن
**************
ما كفاى يا التومات اذى
وما كفاى انا لعب الخذى
هو طيف ! ويلاوز لى ملاوزه
ما التويمات انا حاجزه
وحاجه غيرن ما عايزه
يا الجمالكن بقى معجزه
السن النقاد عاجزه
انت جيب اوصاف موجزه
يا قليبى انا حبزه
تبقى حالتنا مجهزه
ولحظه تأخير ما جائزه
***************
ليه يضايقونا الناس كده
والغرام .. سنه .... مؤكده
أنا قلبي من اول ما بدا
بى غرام التومات شدا
والعيون مويته جامده
البعاد الطال سهده
البكى المكتوم شاهده
ليها سته شهور شارده
من زمان فارقت الندى
ما بتشوف ناس هاديه
لا زيارات .... لا معايده
لا صدف عن ساعه الغدا
انا قلت بالصبر ازوده
على البعاد يمكن اعوده
تانى ترجع متمرده
تعيد اشواقه تجدده
روحى دركت ........ منو ينجده؟
بلا التويمات الرايده .


تحياتى عمر محمد علي ترتورى

  رد مع اقتباس
 
 
 
 
قديم 19-09-17, 08:45 PM   #8
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

بسم الله الرحمن الرحيم
اهﻻ باﻻخوة بمنتدي منحني النيل اﻻدبي ونحن نستصحب السيرة العطرة للشاعر القامة المرحوم عبدالله محمد خير عرفانا منا لما قدم للمنحني والمكتبة السودانية وانا في هذا المقام ﻻ ادعي معرفة به ﻷسردها لكم وﻻ اظنني استطيع اضافة كلمة واحدة علي كﻻم هؤﻻء العمالقة الذين سبقوني وعطروا البراح بذكراه العطرة وسيرته الذاتية واشعاره وصحبتهم له والمواقف المشتركة والنقد اﻻيجابي واﻻدبي ﻷشعاره من خﻻل المعرفة انا كل ذلك ليس فيه ولكنني ساكتب عن حبي لهذا الرجل ومعايشتي لفترة ازدهار اغانيه فقد تلقينا اغانيه بأداء الفنان المبدع صديق احمد ونحن شباب في مقتبل العمر وقد كان من حسن حظنا ان واكبنا تجربة الثنائي عبدالله محمد خير وصديق احمد فهي ثنائية ﻻ تقل بأي حال من اﻻحوال عن الثنائيات التي عرفت في تاريخ الغناء السوداني كوردي واسماعيل حسن وعثمان حسين وبازرعة فقد ظهرت ثنائيتهما في اواسط السبعينات كتجربة مختلفة في اداء الفنان صديق احمد ولونيته المتفردة واسلوبه الجديد نوعا ما وايضا عبدالله بطريقته التلقائية واسلوبه ولونيته وبصمته الخاصة فقد تكامل هذا الثنائي وقدم للمنحني ثروة ضخمة من اﻻغنيات الخالدات فقد كان صديق نقطة تحول ثانية في مسيرة غناء المنحني وبرز كظاهرة فنية مهولة ظهورا استثنائيا هو و رفيق دربه عبدالله فقد كان عبد الله كما قال وردي عن اسماعيل حسن في احد اللقاءات التلفزيونية ان اسماعيل حسن كان مشهورا ونجما معروفا للجماهير كالفنانين او اكثر وعبدالله كان كذلك فقد سارت بسيرته المجالس واحاديث العشق وقد تمثل الكثيرين اشعاره واستعانوا بها في مناجات من يحبون حتي لقب بسلطان العاشقين او شيخ العاشقين ،، ممايدل علي حسن تعبيره عن احاسيس اﻻجيال وتشربه للبيئة وصدق مشاعره وساهم في كل ذلك حسن خلقه وطيب معشره ونحن ﻻ نملك اﻻ ان نرفع اﻻكف بالدعاء له بالمغفرة والرحمه وان يجزيه الله بماقدم خير الجزاء وان يتقبله في الصالحين

علي ادم

  رد مع اقتباس
 
 
 
 
قديم 19-09-17, 08:49 PM   #9
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

منحني النيل والقائمين علي امره شكرا جزيلا فقد ملأتم كل المساحات التي تراجعنا فيها وكانت ساحات للادب والشعر...الآن زحفت الحياه بجاحفلها من هموم وسياسه وبلاوي لتحتل ساحات كانت نضيره بالجمال والالق الليالي الادبيه والثقافيه ..رابطه مروي بالجامعات ونادي الطمبور الخ ...حلت محلها اخريات مشوهه وغثه وكدنا ان نفقد البوصله حيث انزوي بعيدا اصحاب الفكر والرأي والادب زاهدين في كل شئ وكاد حبل تواصل الاجيال ينقطع تماما ومع اخر تو كان هذا القروب الممتع الجميل...انا شخصيا كنت افقد هذا التواصل والمعرفه بتاريخنا وشعرانا وفنانينا وادبائنا ...وخير مثال حسين حمد الحسين كنت اعرفه من خلال لافته في الكلاكله اللفه...حسين حمد الحسين المحامي لا اكثر ومثله كثر...الان بدأت تتفتح اعيننا علي تراث ضخم من الشعر والادب..ابحرت معكم في سيره ثلاثه شعراء الدابي وحميد والشيخ العاشق وننتظر المزيد القائمه حبلي بمبدعي بلادي ...شكرا لكم فقد اعدتم فينا الحياه بعد ان اصبنا بالجفاف العاطفي والتبلد الحسي وحصرنا انفسنا في قفه الملاح وسدينا آذاننا من ضجيج الاواني الفارغه ...نشكركم مجددا ونسعد نحن في الككر والحسيناب والجابريه ان فتحتم هذه النافذه لابداعات ابونا عبد الله محمد خير..الرجل صاحب القلب الكبير وان كان لي من اشاره في هذا الشأن فقد كنت قريبا من الشاعر في ايامه الاخيره حيث كنت اتابع معه السفر للقاهره والاردن ووجدت في الرجل شجاعه منقطعه النظير في تعامله مع المرض لم يهتز ولم يوهن ولم تفارقه الابتسامه ابدا ولاول مره اجد شخص يسخر من المرض ويهزمه ...جاؤنا يوما بالمكتب لامر ما ومغروس في جسده النخيل قسطره غسيل الكلي وتجمع حوله الزملاء وطلبوا منه ابيات من الشعر فجلس والقي علينا عشره قصائد بمناسباتها في اريحيه وسرور وكان بينه والغسيل دقائق معدوده..ووجب الاشاره هنا الي الاستاذ عبود تبوري فقد كان رفيق الشاعر في تلك الايام ماذهبنا مكان الا وكان معنا بعربته الخاصه وادهشني تبوري بانسانيته ووقوقه الي جانب الرجل..عبد الله محمد خير كان رجلا شجاعا وصنديدا علي الحياه وعلي المرض ..رحمه الله رحمه واسعه ...الرجل تجمعني به محبه صامته من ايام الصبا الباكر حيث كنت اذهب مع عمي ونجلس معه الليالي الطوال علي ضوء الرتينه وازيز ماكينه الخياطه لانمل حديثه العذب السلس والرجل متحدث لبغ ...ولفارق العمر ماكنت غير مستمع وظل اعجابي بالرجل من بعد ذلك ممتد ولكن في احترام ووقار العمومه الي ان جمعتني به الظروف في السنوات الاخيره من عمره وكنت علي تواصل معه حتي قبل يومين من وفاته وسبحان الله اتصلت عليه في القاهره اسأله وكان يطمني انه بخير...وعندما عاد وذهب للاردن اتصلت عليه وسألته عن صحته فقال لي بعد ضحكه انا هذه المره لست بخير وشعرت بغلق شديد فاعدت عليه الاتصال ولكن كلمتني زوجته وقالت لي سبحان الله عمك دا اسه سأل منك وقال لي ابراهيم دا جا هنا متين وبعدها اخبرتني بصعوبه التكلم معه...وهكذا مضي الي ربه عبد الله محمد خير ...نسأل الله له الرحمه والمغفره..ونشكر لكم هذا الاحتفاء بموروثه الكبير وهذه الاضاءه علي جوانب حياته المختلفه

في هذه السانحه البسيطه اريد ان اضئ جانب في حياه عمنا عبدالله محمد خير...فالرجل لم يكن شاعر وحسب فهو كاتب ومحلل سياسي وله باع طويل حيث كنا نتابع مقالاته في جريده الخرطوم لسان حال المعارضه يومها والرجل ايضا دلف الي عوالم الشعر السياسي (اديني الامان يانوره داير امسك درب حميد) لم يكن بعيدا عن الوطن ومعاناته (القيم العشقتك من خلالا ماقدرت اعيش بدونا وماقدرت اقولها لالا) كان يتوق لحريه الوطن والمواطن (نفسي ارجع والفح الحريه شاله والبس التوب المطرز بالعداله) كغيره من مبدعي بلادي كانت حريته منقوصه في وطنه ولولا كل ذلك ما كانت الغربه خيارا استراتيجيا ولانني لست ممن يملكون ناصيه الكلام والكتابه اتمني من المتحدثين القادمين والسابقين اضاءه حول عبد الله محمد خير الرجل السياسي وتفكيك بعض الرمزيه في شعره السياسي (احلم بي عشرين متر من مليون ميل
في الكرمته او حوض ابو ادم
انشاء الله تكون في مجري السيل) ولكل ماذكرت عن عدم مقدرتي في في فتح كوه علي هذه الجزئيه اترك المجال لمن يستطيع...ولكن لابد من اشاره خاصه عن شخصيته فقد كان متحدثا لبغا ورجل منابر من الدرجه الاولي يستطيع بكاريزمته وحضوره شد انتباه الحضور جميعا لما سيقول حتي اذا استبان انصات الكل وللرجل مقدمات ومشهيات لابد ان يبدأ بها لجذب انتباه الجميع فقد كان رجل المسرح الاول...والرجل يتمتع بذكاء وزاكره خطيرتين جدا...فقد شهدناه بام اعيننا تقرأ عليه جواب او قصيده او قطعه نثريه لمره واحده حتي يسمعها لك دون ان يفط سطرا واحدا وكنا نحن صبيه نتلصص لهذا التحدي بينه واقرانه علي ضوء القمر في ليالي القريه التي كان يأمها بين الفنيه والاخري...رحم الله عبد الله محمد خير فقد كان سفيرا للككر والجابريه في كل المحافل.
ودمتم بخير


ابراهيم أحمد

آخر تعديل محمد يونس يوم 19-09-17 في 10:28 PM.
  رد مع اقتباس
 
 
 
 
قديم 19-09-17, 09:00 PM   #10
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

حبابكم

الكلام عن عبدالله محمد خير دائما ما يمثل اضعف الإيمان لصعوبة الإحاطة به وتلخيصه وحصره بين قوسين
هي محض محاولة أتمنى ان تصيب ومسؤولية
عبدالله محمد خير
إسم شاء له الشعر أن يظل عالقا في الثريا وشاءت له ميزاته الشخصية ان يظل عالقا في ذاكرة من عرفوه وعرفهم فهو فارس برتبة شاعر أو شاعر برتبة فارس والفروسية بالمعنى القديم ماعون ينضح بالفضائل من كرم وشهامة وشجاعة ونبل
عاش الحياة شاعرا وعاش الشعر الحياة لم يختبئ خلف التردد أو مراجعة الذات كان مقداما في قصديته ومتصدرا في المسائل الإجتماعية والقومية لايرضى لنفسه أن يسير خلف أحد كائنا من كان
عندما طلب مني سليمان المشاركة في اسبوعه قلت له أنا مدان لعبدالله على الرغم من انني اقل الناس معرفة به من واقع أن معرفتي به جاءت متأخرة إلا انها كانت كافية لتلخص لي أي رجل عرفت وأي علم أرافق وأي معلم حظيت
كان يرحمه الله عنيدا لا يسمع إلا صوت نفسه ولا يتراجع عن أمر بدأ له وهذا يفسر جرأته في الهمس جهرا في اشعاره بأشواقه وإن كانت حسية تتعلق بهندسة الجسد غير عابئ ولا متخف خلف جدار اللغة الشفاف تورية او رمزا او إشارة ربما لقراءته نزاز قباني باكرا وخلوصه إلي ان الشعر يجب ان يكون صوتا غير قابل للتجزئة لكل مايعتري النفس من رغبات وغير قابل للكبت مثله مثل صرخة الزين في عرس الزين التي لا حابس لها طالما أن هناك جمال
وحسية عبدالله جزء يسير فيه أيام عنفوانه بخاصة وانه توافر على مشاهدات كثيرة بحكم تنقله وصادفته أشياء لم يكن يألفها فلم يمنعه شئ من الصراخ
الشئ الآخر غيرية عبدالله مكان دراسة لا أنفيها كما أنني لا أثبتها عليه ذلك لكونه عاشقا بالفطرة وان أية قصيدة كتبها لصديق او زميل كانت بإحساسه فهو قد حاز على مشاعر جياشة سهلت له مهمة الكتابة ويقيني ان غيريته ليست سوى إهداء مشاعره للآخرين تطيبا لخواطرهم إذ اننا لم نلاحظ في شعره ضعفا او صناعة
فتكلف الشعر يضعفه ويفككه
كما انها ـ اي غيريته ـ كانت في مقتبل الشعر واي شاعر في ذلك الزمان يلجأ اليه العشاق لأسباب موضوعية وقتها منها صعوبة وربما إستحالة التواصل مع الحبيبة فيصبح الشاعر هو المفرغ الاول لأشجان الغير بواسطة شجنه الخاص لأنه جزء من ذلك الحرمان
أكثر ماميز عبدالله موهبته الضخمة فالموهبة مقاسات وأحجام بالإضافة إلي قراءآته المبكرة والقراءآت المبكرة تفيد في أنها تترك أثرا أكبر على الإنسان من القراءآت المتأخرة بالذات القراءآت الحرة تلك التي يختارها الميول وينسجم معها الوجدان فهى تصب مباشرة في ماينتجه الشخص وترتقي بقاموسه الإبداعي وطرائق كتابته لذا تفوق عبدالله على أقرانه ممن واصلوا تعليمهم بالسهل الممتنع والثراء اللغوي الأدبي والتنوع والغنائية العالية ولاعجب إن كانت قصائده الأولى من شاكلة
من الأزاهر أندى ياضو القمر
يا المنو صافي وأهدأ
يازينة العمر

و
حبيبي عود سيب الصدود سيب الجفا
حبيبي اصلو الحب عهود الحب وفا
وهى قصائد ذاتية بحتة عبرت عن وجدان الشاعر المحب للجمال بشكل واضح وبشرت بميلاد شاعر ضخم تملأ سيرته الآفاق
وماساعد شاعرية عبدالله على الإنطلاق بأريحية وبدون تعقيد شخصيته القوية وإيمانه أن الشاعر (صعلوك) لايهمه شئ سوى السير خلف رايات الجمال وعبدالله يدرك معنى (صعلوك) بحكم قراءته للأدب العربي لذلك يصف بها تمرده ولايخشى إن إلتبس الأمر على البعض وأنزلوها منزلة غير منزلتها بخاصة وأنها في الفهم الشعبي تعني ماتعني
لم يعش احد حرا كما عاش عبدالله كتب ماأراد ان يكتب بدون توجس او تردد وتحدى المرض فرفض ان ينصاع له وتمسك بنهج حياته حلا وترحالا وبعد رحيله كتبت
لو كان لرجل ان يهزم الموت لكان عبدالله محمد خير
الموت لم ينتصر وإنما أراد الشاعر أن يكتب عن تجربة الموت وأن يظل فيه إلى حين
ولو تسنى لي لقلت أن موت عبدالله كان إختيارا
تحدث الكثيرون عن عبدالله محمد خير وربما من هذا الجيل من لم يسمعه لذا سأفرد قدرا من حوار اجريته معه في أخريات أيامه لصالح مجلة الخرطوم الجديدة وقدمت له ب
( من الأزاهر أندي ..... ) كان هذا قبل أربعين عاما .. شاب في مقتبل العشق يتحسس مقدرته على التعبير عن الجمال لينفس عن مشاعره المهتاجة في ليل ملئ بالأشكال واللوحات والصور وملئ بالنوافذ التي تطل عبرها الأقمار والفراشات على قلب تتهدج نبضاته ويعلو صوته بالإنشاد
إلى ذلك الحين لم يكن الفتى يعتقد انه شاعر غير انه كان يختبئ في زاوية من زوايا وجدانه الشفيف ويقرأ بحب وعن حب (قالت لي السمراء) وطفولة نهد وإلى تلميذة وشكرا لحبك فهو معجزتي الأخيرة بعد ماولى زمان المعجزات
وهذه القراءآت الثرة التي حظى بها الفتى في بواكيره هذبت شاعريته ومنحته قاموسا إنتقائيا شديد الإبهار وأتاحت له التعرف على أشكال اللغة المختلفة
وقد إستطاع ذلك المجذوب بالجمال والمسكون بالعشق والمفتون بالوجوه الوضيئة أن يبصم على حنجرة رفيق دربه الفنان صديق احمد بعشرات الأغنيات التي تحمل قلبه وجرأته في مخاطبة الحبيبة أو اية فتاة تدخل من باب الجمال وتخرج من بين اصابعه قصيدة تشغل الناس زمانا إلى أن تشغلهم عنها أخرى.

يقيني ان عبدالله لم يجد مكانته التي يستحقها بين شعراء الغناء السوداني رغم تميزه عليهم لقصور في اغنية الطنبور او لوضعها في الزاوية المعتمة اعلاميا وإعتبارها اغنية منطقة
والطنبور بقدرما اسعد عبدالله ظلمه وقد سألته سؤالا صريحا ألا تعتقد ان حصر اشعارك الجميلة في الطنبور قد ظلمها
فقال
نعم لقد ظلمتها وكان بإمكانها ان تكون جزءا مهما ومؤثرا في الأغنية السودانية الحديثة ولكني احب الطنبور
في العام 2005
والخرطوم عاصمة للثقافة العربية قال لي عبدالله ان الطيب صالح في الخرطوم سأبحث عن رقمه واحدد معه موعد ـ خليك جاهز ـ وفعلا
ذهبنا له مساء في فندق قصر الصداقة وكان بمعيته الكابلي والجزلي وخالد فتح الرحمن فإستقبل عبدالله إستقبالا حميما دافئا وهمس له انو مدعو للعشاء في منزل د الباقر وطلب منه مرافقته وهناك وجدنا لفيفا من اهل الفن والأدب يتقدمهم وزير الثقاقة آنذاك عبدالباسط ووردي وان هناك برنامجا معدا على شرفه فما كان من الطيب صالح إلا وان قال لهم نحن في حضرة عبدالله محمد خير وطالبهم بالإستماع فصار يطلب وعبدالله يقرأ وأذكر ان عبدالله ترك بيتا في احد قصائده تأدبا وهو .......
فجاء به الطيب صالح بصوته الفخيم
وصدرو تقيل تقيل يالله يتخمالو

ثم قال لعبدالله ياعبدالله نحنا ماعندنا شغله بي زول

وبعد ان خرجنا قال لي عبدالله انه شعر بالحرج لأن الطيب صالح فرضه على الناس
ذات حوار قلت لعبدالله ماملابسات العلاقة الحميمة التي تربطك بالطيب
قال
هو ابن بلد وصديق وكروائي عالمي وعبقري أجدني أتشرف بهذه العلاقة وهي ليست قائمة على الندية والتساوي في الإبداع وفي الوضع الإجتماعي
هي فقط علاقة اولاد بلد
الطيب صالح مصاب بالفشل الكلوي وانا سبقته في ذلك
فهو يغسل ثلاث مرات اسبوعيا وانا كذلك وهذه علاقة اخرى
وقد ظلم السودان كثيرا بغيابه عنه ولكنه يتحسر الآن على ذلك الغياب ويتحسر على الأصدقاء الذين غيبهم الموت وقد كانوا يشجعونه على زيارة السودان

قلت لعبدالله
ولكنه يحفظ اشعارك ويستشهد بها
فقال
لن يبلغ بي الغرور لأقول انه معجب بي وبأشعاري وإن كان يحفظ ويستشهد فهذا شأنه

قلت له قابلته معك في زيارته الاخيرة ورأيت كيف إحتفى بك .. إذن لماذا تتهرب من خصوصية هذه العلاقة
قال
أنا لا أتهرب ولكن اخشى ان يفهم الناس أنني أتجمل بهذه العلاقة وقد إجتمعت به في مناسبات كثيرة خارج السودان. وكان قد كتب بعد احدى زياراته للسعودية في بابه المقروء نحو أفق بعيد بمجلة المجلة انه إلتقى هذه المرة بالأمير الشاعر خالد الفيصل وبالأمير الشاعر بدر بن عبدالمحسن وانه إلتقى ايضا بالشاعر السوداني عبدالله محمد خير وهذا ايضا امير في بلاده واعتقد ان مقولته اتت من باب التغريط والمجاملة

عبدالله كان يرى أن أغنية الطنبور ترهلت معترفا ان هناك مد لأغنية الطنبور ولكنه اضر بها. وقال بعض الشعراء والمطربين خرجوا عن بالغناء عن وظيفته بتناولهم لقضايا هشة وبضعف لايغتفر والغناء والشعر اصبحا جلابية مزخرفة وطاقية ملونة وشال موشى فالقصائد اضحت مثل (الجلاليب) التي يرتدونها ذات الوان صارخة ومتداخلة ولكنها بلامضون

اوردت رأى المرحوم في ماآل إليه حال الغناء وكان شديد المقت لظاهرة الأغنية القصصية او كما يسميها البعض الإجتماعية التي راجت في الفترة الأخيرة وتناولت مواضيع يرى عبدالله انها ليست لها علاقة بالغناء

عبدالله كان يرى ان المرأة بجمالها وسحرها هي مادة الغناء لذلك حتى ادب الرحلات الذي برع فيه كان تعقبا لحسن آسر وجمال فريد




عثمان عوض ضرار

  رد مع اقتباس
 
 
 
 
قديم 19-09-17, 09:10 PM   #11
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

عبدالله محمد خير له الرحمه والمغفره
وهو لايموت داخلنا فهو الانسان
الاب الاخ الصديق الكريم البشوش
المسامح المعلم الذي عرفته منه الكثير وجمعتني به الغربه والكلمه تعلمت منه كلمات وتعلمت منه كيف اخاطب قلوب الجماهير هو الاب الروحي الذي ادعو له كما ادعو لي والدي عبدالله مدرسه متفرده واغلب قصايده قصايد ارتجاليه او وليدة لحظه وحينما كان البطحا كان باب الشايقيه للدخول للسوق وكان باب الرحمه للمساكين وكان عبدالله حتي الهنود والبنقلاديش بحبو عبدالله وتلقاهم متلمين في الدكان
ويجونا في البيت في فتر من الفترات سكنا ان والاستاذ في منفوحه تقاطع العشرين فوق من صراف الراجحي وكان وقتها يزورنا وينزل عندنا كثير من الناس عبدالله كان يوصينا علي اسمه وعلي سمعته بين اهله اما بالنسبه لميلاد القصيده المزكوره كانت في مستشفي الحرس الوطني وكان وقتها يمنع المرافق للمريض وكنت انا ارافقه
لانه بالنسبه لي المعلم والمربي والاب الا رحم الله الاستاذ القامه عبدالله محمد خير


بدر الدين الشعدينابي

  رد مع اقتباس
 
 
 
 
قديم 19-09-17, 09:15 PM   #12
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

بسم الله الرحمن الرحيم

الشكر الجزيل لكم أحبتي في منتدى منحنى النيل الأدبي ...
الحديث عن الراحل عبد الله محمد خير ذو شجون ...
والحديث عن عبد الله محمد خير ممتع ...
وعندي مداخلة إن شاء الله حتعقبى مداخلات معليش كنت عاوز أكتب لكن الكتابة مرات ما بتعبر زي ما الزول يدي الكلام دراً أو شفاهةً
استميحكم عذراً في إني سجلتا ما كتبتا ...

حقيقة الشاعر عبد الله محمد خير له الرحمة كان ذو حضور طاغي وكان في أي مجلس إذا كان موجود بكون المجلس كلو متمحور حوله ...
وأذكر قابلتو كان في جده الحفلة كان عاملا أخونا حمد الله ختم بدوي مناسبة حضور أولاد عادل عثمان الطيب وكانت فيها لفيف من الإخوان وطبعا بزعامة الأستاذ السر وكتير من الإخوان وكانت في( أبحر ) عبد الله محمد خير اتوجهت ليهو الدعوة من الرياض عشان يجي اتذكر لما جاء أول مسكوهو تقديم الحفل وهو راجل ماشاء الله مفوه وبقى يشكر في الناس وكان من ضمن الناس الشكرن عبد الرحيم محمد سيد عبدالرحيم كبو الله يرحمو فيذكر في الناس فردا فردا أشكر فلان أشكر فلان حتى أنا زاتو اضافني للشكر قال الذي أتى خصيصا من القصيم لمشاركتنا الناس الحقيقة اتحرجت مع إنو ما ذكر عبد الرحيم ففي الآخر قام التفت على عبد الرحيم قال أما عبد الرحيم فلولا عبد الرحيم أنا زاتو ما كنتا معاكم هنا ...
الزمن داك في حاجة اسمها جواب الكفيل إذا الكفيل ما مديك جواب تسريح تنقل ما بتقدر تمشي حته قال جيت المطار وما عندي جواب كفيل ما عارف كفيلو مسافر ولا الحاصل شنو فقال جيت المطار وشايل تذكرتي ورجعوني مشيت قال احرمتا وجيت راجع تاني وبرضو رجعوني وانتظرت الوردية دي لما انتهت وجات وردية تانية وبرضو الوردية التانية الظابط رجعني قال أنا في المعمعة دي جاء عبد الرحيم قال لي يا عبد الله إنت ما سافرت قلتا ليهو حاصل كذا كذا قال عبد الرحيم غاب بره من الزمن وإذا بمكرفونات مطار الملك خالد كلها بصوت عالي على الراكب أو المسافر عبد الله محمد خير مقابلة ظابط أمن المطار جيت قال على ظابط أمن المطار بلا القى ( الكونتبراس ) عندو يسلمني يقولي اتفضل امشي فالراجل كان بيدي الناس حقها بالتمام والكمال الله يرحمو ...

الموقف التاني أتذكر أنا جاي من الشمالية ومعاي واحد راكبين نحنا جينا فالراجل قال لي ياخ نفطر قمنا الصباح الوقت كان معقول كدا قالت ليهو نفطر في الملتقى قالي لا نفطر في الحميدي أنا بعرف لي مطعم هناك اكلو سمح جدا جدا وعندو مشاوي نمشي نفطر هناك فجينا الحميدي لما وصلت الحميدي والله يا اخوانا غير شعوريا لقيت نفسي بردد في قصيدتو ...
نكتر الله الحميدي الظهر حاضر في الحميدي

فأنا عندي تلفونو دقيت ليهو تلفون سلام عليكم أستاذ عبد الله عليكم السلام والرحمة في العاصمة إنت قالي بي قعيدة كدي في المستشفى يا زول سلامات كفارة قالي والله أنا في مستشفى أم درمان وطيب طبعا هو راجل جلد جدا وزول وصبور في مسألة إنو يتحمل فانت وين قالي قلتو والله أنا في الحميدي لكن صراحة قصيدتك الكتبتها ما شكرت الزول دا ياخي إنت تقول نكتر الله الحميدي والله طوالي ختفا مني قالي كمان الظهر حااااااضر في الحميدي طيب إنت الزول دا ضيعتو كلو كلو نحنا اسع اتحركنا وقاعدين اسع نفطر في الحميدي قالي إنت راكب شنو والشارع الجيتبو دا شنو أنا ساعة كتبت الكلام دا لا لي العربية الانت راكبا ولا لي الشارع الانت اسع جيتبو دا الكلام دا مكتوب لي زمن فعلا الكان يصل الظهر في الحميدي دا إنجاز .
له الرحمة والمغفرة



هاشم شنان

  رد مع اقتباس
 
 
 
 
قديم 19-09-17, 09:18 PM   #13
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

عليكم السلام ومرحب اهل المنتدي ولي الشرف اكون ضيفكم وضيف المنتدي ف حضرة شيخ الشعراء المرحوم عبد الله محمد خير
المرحوم الاستاذ عبد الله محمد خير عليه الرحمه ..انا شخصيا تعرفت عليه كاسم من خلال استاذنا صديق احمد والاغاني الكانت بتوصلنا ..واول مره اشوفو كان ف زواج استاذنا محمد سعيد دفع الله ...
بعد المعرفة (شوف من بعيد)بقينا نتعرف عليهو من خلال القصايد وارتبطنا بيهو ارتباط وثيق وهو استاذي من علي البعد وهذا جميل لا ينكر
كنا نتنفس نار عويش ايام الشباب وكنا نشهد علينا الزمان ف ي زمان بالله اشهد وكل الدرر التي تنثر من ساحات الغنا

حاتم الدابي

  رد مع اقتباس
 
 
 
 
قديم 19-09-17, 09:20 PM   #14
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

الاخوه في منتدي منحني النيل الادبي لكم عاطر التحايا وانتم تحملون هموم الإبداع في منطقتكم العامره بالمبدعين
الاستاذ المقيم في الانفس والوجدان عبدالله محمد خير .الشاعر
المبدع المرهف الحساس حامل هموم الغير .الملهم الذي ما إن التقيت به إلا وادخل عليك الفرح والسرور نتمني لقيته نحس بالارتياح لوجوده يدخل عليك كالنسيم نستمع له عندما يتحدث لاتسمع ضوضاء ولا صوت غير صوته الكل يكون سكوتا الصمت يسود المكان لانسمع اشعاره فقط بل تتسرب عبر المسام واحيانا نشربها وتمتزج بدواخلنا . تعرفت عليه عام 1969 كنت في أولي اوسطي الدبه الاميريه كنا نزورهم من وقت لآخر أنا والمرحوم هاشم احمد التاجر شقيق صديق في منزل استاذنا صديق احمد الممرض بمستشفي الدبه المستأجر من محمد محمد خير ومحمد محمد خير تغريبا هو خال الاستاذ عبدالله واصلنا زياراتنا لهم سنوات المدرسه وكنا نسمع اشعار الاستاذعبدالله وألحان صديق ولطول المده لا أتزكرها بالترتيب وبعد ان انتهينا من سنوات الدراسه لم ننقطع منهم اقصد عبدالله وصديق لان الاستاذ صديق تربطني به صلة علاقة رحم وهو إبن خالي وفي بداية السبعينات كنا نسمع من الاغاني .زينة العمر وعبله وسلوي كربكان والنجمه ديل تشهد علي سهران وحيد . وحسن جا . وتقبل ولا ماتقبل مجبور ترضي باللحصل . وتوب الحد كسيتي وسامه والتويمات وعندما . وام طبعا رقيق ي بوزيد عليك الله انت داري شلتو رحلت فايت بيهو دارا ماها داري .
والنجمه ديل تشهد علي سهران وحيد . وعندما كتب التوفيق الاولي داير اقوم بالتوفيق غفر . كنت انا من اكتر المعجبين بها وكنت مازلت صغيرا وعندها حاولت الكتابه مجاريا له فكتبت ود ابو زيد تاني زازا
دخل أرقي وشال لزازا
وعرضها علي الاستاذ عبدالله وشجعني علي الكتابه . كانت كتاباته جميله وقويه ولها مدلولاتها ودائما تجدها تلامس مشاعر غيره حتي يجعلك تحس بان كلماته كتبت لك وهذا إن دل علي شئ انما يدل علي خياله الواسع وقراءته دواخل غيره مما جعل اقرب الناس له يطلق عليه شاعر الغير رغم ان اغلب اغانيهو كتبها لنفسه والدليل مخاطبة من يغني لها مخاطبه مباشره مثل اغنية حسن جا وحسن ماجا وحسن ياحلوه ماعارفه الزهور راجا
واغنية اللمبه . انا المعجب . والتي يقول فيها انقص عمري 10 سنين اقول يمكن يكون انسب وأدلي دلوي مع العشاق يجوز أكسب .
واغنية الخليجيه خطاب مباشر . ايش فيك ياخي بتعاين .
وحليل دارا قصاد ود البصير وهي مصقط راسه وكثير من النصوص . سوف اواصل معكم متي ما سنحت لي فرصه لاني الان مع اخي المقداد مريض بالخرطوم ومشغول .اتمني استطيع المواصله معكم لان الكلام عن الاستاذ عبدالله كلام زو شجون . لكم مني كل الود .

كنا نرفع شكاوينا للاستاذ عبدالله في شكل قصائد متواضعه نشتكي له جفوة الحبيب وكان يشجعنا علي الكتابه حتي ولو كانت اشعارنا ضعيفه .
وهذه إحدي الشكاوي التي رفعتها له وكان رده لي بطريقه غير مباشره او لم يرد علي بقصيده ولكنه قال لي اسمع اغنية البريد وسوف تجد فيها ماطلبته مني . رغم ان اغنية البريد سبقت شكواي وفعلا بدأت اشعر بأن الاستاذ عبدالله يكتب النص لنفسه ويكون النص يشمل غيره
[( أخوي عبدالله )
أخوي عبدالله صحي النوم
انا جايي من الزمن مظلوم
من ريد اتقلب لي هموم
........
من سنوات رفع شكواي
وريتك مكامن ازاي
بدورك تتلفت لي جاي
حديثك ينصف المظلوم
..........
قبلي ورد مشارع الريد
وياما كتبت فيها قصيد
قولي كان شربت رويت
ولا ربيعه جاك سموم
........
زمان العامه والتعليم
عرفت الريد معاهو قديم
القدر حول حياتي جحيم
هو سافر وركه طاير البوم
........
قبل ماتهجر الكلمات
تعال أفتيلي في ابيات
دحين في دنيتي الجايات تكون أكتر من الرايحات
ولا حديثي ما مفهوم
........
اخو ابو عبدا صحي النوم
انا جايي من الزمن مظلوم ومن ريد اتقلبلي هموم

عباس عيسى علي

  رد مع اقتباس
 
 
 
 
قديم 19-09-17, 09:23 PM   #15
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

الف رحمة ومغفرة
للراحل المقيم الاديب (عبدالله محمد خير)
تسري مفردته في عروقنا كانها من مكونات الدم ....

لنا معه ذكريات وصولات وجولات في ارض المهجر والرحمة والمغفرة ايضا لصاحب الصدي الرطب (عبود تبوري)والصحة والعافية للاستاذ /صلاح الرشيد ...
كانت ايام له ايقاع
اول من كتب بكائية في نفس يوم رحيله
وقتذاك
ونشرة علي صحيفة الوفاق
لعلي اتذكر بعض الابيات لكم الان
بعد مرقت دموع العين مشت سابقانا
شان ترثيك---
براهو الدم فصل نفسو وقعد يبكيك---
قوافيك للنخيل والنيل رافعه كفوفه تندهليك----
بتستغفر مع الاسحار تلوت الليل وترسل ليك----
ان شاء الله قريبا سوف انزلها لكم كاملة


معتصم داسوقي
نوري

  رد مع اقتباس
 
 
 
 
قديم 19-09-17, 09:25 PM   #16
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

الاحبة الاعزاء ...السلام عليكم ...

التحية لكم وانتم تتنسمون عبير حديقة من اعظم الحدائق التي اتت أكلها ولم تظلم منه شيئا.... كنت اتمنى أن اكون كما اود لاحكي بعض الخواطر عن استاذي وصديقي عبدالله محمد خير....كنت اسعد الناس إذ ياتي من الدبة ويمكث معي بمروي ايام لقضاء بعض الحوائج بمكاتب الحكومة ..وآخذه ماتبقى من نهار وليل انهل من معينه وحكاياته ....سعدت كثيرا عندما اهداني نسخة من كتابه اشجان الشيخ ..العاشق قبل ان ينزل المكتبات ....سعادتي كانت اكبر وانا شاهد على مولد .....سمحة فوقا العافية سمحة...ومازالت ....مقطع وعندما قلت له اعجبتني ..قال لي بمحبة وابوة صادقة(كملا)وسعادتي اكبر لمعرفتي للملهمة ...عذرا لظرف خاص لا استطيع المواصلة ...ولكن احببت ان اشارك واكتب عن أروع شاعر عرفته وكم أنا معجب بجرأته ودخوله لعوالم خاصة صنع بها لنفسه عالما وكونا (ملك)..واعترف أني رغم فارق السن وبعد المنطقة إلا انه ادخل في نفسي حب الشعر والدخول لعوالم الشعر الجرئ.ورقة الكلمة وبساطتها وعمقها والاتيان بالمفردات والأخيلة المبتكرة ..واستخدام لغة الوسط........تعاتبنا ...صحيح بالله شفت النار....لو بتذكر...انا المعجب...العيد المضى ...وهنا لابد ان اضع يدي على كتف الاستاذ صديق احمد محييا لحمله هذه الأمانة ..وتسليمها لنا كماهي...... مخلصكم دوما.....

عبد القادر محمد عبد القادر

مروي

  رد مع اقتباس
 
 
 
 
قديم 19-09-17, 09:27 PM   #17
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

السلام عليكم ورحمة الله تعالى وبركاته ...
الأخوات الماجدات الفضليات الإخوة الأفاضل أهل منحنى النيل وما أدراك ما النيل هذا المنحنى الجميل الرائع الذي به من القامات والهامات العلى ...
حقيقة أنا تحضرني ذكريتان للمرحوم الشاعر الفذ عبد الله محمد خير .... احداهما في منتصف التسعينيات او في النصف الآخر من التسعينيات 96 او 97 او 98
او قبل ذلك المهم في التسعينيات لا أذكر بالتحديد
في ينبع الصناعية حيث الشاعر الهامة القامة صاحب الكلمة النضيدة المرحوم الأستاذ عوض فضيل هنالك في داره حيث كنت في زياره في العمرة عند إبن خالتي محمد بن عبد المنطلب الشهير بأبو كلوه في ينبع البحر وعزمنا في بيت الضيوف في بيت الكرم بيت الشاعر صاحب الكلمة المموسقة أخونا عوض فضيل لضيافة الشاعر الفذ عبد الله محمد خير يا لها من ليلة وتلك كانت أول مره أرى فيها الشاعر عبد الله محمد خير قيل في تلك الليلة من القصيد من الكلم ما هو طروب وكله
كان يهيم بغناء الربابة ففكرة فيها كل من غنى لعبد الله محمد خير وقال عوض فضيل من شعره الفذ المتناسق رغم أنه كان غطاس في لغة الفرنجة الإنجليزية وكان ذو بحور أيضا في العربية ..
المره الثانية حينما ذهبت للرياض موظفا أو مشرفا عاما علي احدي مدارس الأميرة منه بنت عبد الله الفيصل فسمعت إنو الشاعر عبد الله محمد خير في الرياض فقلت لأحد زملائي وأصدقائي من أولاد البركل أريد ان ازور هذا الشاعر فساقني الي منطقة البطحاء والبطحاء هي سوق قديم في وسط الرياض ينقسم لي جزئين جزء شرقي وجزء غربي وشاعرنا الأستاذ المرحوم عبد الله محمد خير في الجزء الشرقي في إحدى اسواقه الكبار مقسما السوق إلى مجموعة من الأسواق ويجلس في احدي هذة الساحات داخل السوق على ماكينة خياطتة حيث كان مشهورا لدى كل السودانيين في ذلك السوق كان يخيط الملابس الرجالية فقط لانه سمعت من خلال هذا المنتدى أنه يجيد الخياطة للجنسين .. لكن حيث كان هناك كان يخيط الجلاليب والعراريق والشالات والعمم الرجالية وجدناه جالسا خالفا رجله فوق رجله ومحدر طاقيتو وخاتي يدو في حنكو وكوعو على سطح ماكينة الخياطة فسلمنا علية وأنا سالتو قلتا ليهو ياخي إنت في حته مشهورة قالو قلت قصيدة وكنت جالس في هذا المكان قال نعم قال جات احدي السعوديات بنقابها لم تظهر سوى عيونها وأنا كنت سارح في نفس هذه الجلسة قامت سألتني قالت لي ايش بك بطالع يعني علي ماذا تناظر بتعاين لي شنو ...
وقال قصيدتو المشهورة وهو جالس وهي تسمع فوقفت وسألته ان يكررها مره أخرى فكررها وفهمها معانيها فإذا هي تتبسط في إنو رجل بهذه البساطة وانو يجلس في هذا المكان ويقول مثل هذا الشعر وليد اللحظة ويقال أو هكذا قتا كافاته بعشرة الف ريال في حينها والعهده له وبلسانه
الا رحم شاعرنا الجليل عبد الله محمد خير وكل شعراء المنطقة الحيين منهم والميتين لهم الرحمة .


دكتور سيف جحا

  رد مع اقتباس
 
 
 
 
قديم 19-09-17, 09:34 PM   #18
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

الاخوة الاخوات. في منتدى منحنى النيل الابي الثقافي
احييكم واسلم عليكم واحد واحد. يا. من جنتم انفسكم لخدمة اهل المنحنى في بتجرد ونكران زات وبدون مقابل لا يدفعكم لذلك إلا واجب. الانتماء والوفاء لاهلكم وطالما جعلتم خدمتهم والوقف معهم في كافة المهمات والمدلهمات واجبكم الاول ....في زمن صعب... الزول ما قادر
يضاير مشاكله الخاصة اشهد لله انكم من الصالحين فجزاكم الله عن اهلنا كل خير
اخوة واخوات
......
ان. تكتب عن الشاعر الملهم عبد الله محمد خير لا بد ان تكون ملم بكل عناصر ومقومات الكتابة
الخاصة والعامة وما بهمنا في هذا الجانب التركيز على رسالته الفنية اللي بعتبرها ساهمت مساهمة فعالة في نشر تراث وتقافة اهل المنحنى بل وكل الشمال الغنائية وكانت رافد مهم ومعين للمكتبة الغنائية السودانية شخصي. الضعيف. لم التقي بالشاعر عبد الله محمد خير إلا مرة واحدة في المدبنة المنورة جاء اليها
لزيارة المصطفى صلى الله عليه وسلم وحاجيكم لتفاصبل هذه الزبارة لاحقا
لكن لا اخفي عليكم انا من المعجبين المتاسيرين باشعاره وبعتبرو صاحب رسالة فنية سامية واداها كما يجب ... لمن نسمع كلماته يرددها اهلنا في كردفان من خلال بلوم كردفان الصداح عبد الرحمن عبد الله واهلنا في االجنوب من خلال الرائع عبد الله دينق في متين يا ربي انا يتحلى قيدي ... و متين يا يمة تفرحي بي جديدي ...
لمن نجد كلماته منتشرة من خلال رفيق دربة ومترجم احساسه الرائع دوما بلوم الشمال الغريد
صديق احمد في كل مكان
داخل وخارج السودان والله يكفيه فخرا واسرته
ذلك الاعجاب الواسع الذي صنعه بهذه الالحان الخالدة ..انجاز نوعي حلق بهم فوق هام السحب
الراحل المقيم عبد الله محمد خير رحل عن دنيانا
الا ان اعماله تمشي بيننا
باحساس واعين وقدمين
وحتظل. الى ان يرث الله الارض ومن عليها


ادعو له ان يرحمه الله ويغفر له ويسكنه فسيح جناته في عليين. ويجعل البركة في ذريته ...... في ما يخص الحديث عن سيرته ومسيرته من الصعب ان نحصي مآثره وانجازاته الفنية الادبية في هذه السانحة الرجل منذ بدايته الاولى بدأ متميز
كوّن مدرسته الخاصة به
لا قلّد. ولا يتقلّد له اسلوبه الخاص به حتى لو انك استمعت لنص كتبه تعرفه دون ان يقال لك لعبد الله محمد خير ....
واذا جبنا اول نص من بداياته واخر نص كتبه قبل وفاته وضعناهم في ميزان المقارنة نجد انه كما بدأ متميز انتهى كذلك
الاخوان السبقونا استرسلوا في سرد سيرته العطرة بالمام وتمكن لم يتركوا لي ما اضيفه قدر ما اكتب ساجد نفسي مكرر لما تفضلوا به وحقيقة امتعونا حد الامتاع ما يكون باضاءات
اضافة لمعلومتنا الكثير
وكان لا بد نشارك ونكتب ولو بجهد المقل من باب الوفاء لاهل الوفاء والعطاء لمن اجزل العطاء. سهر الليالي ليسعد الاخرين تألم ليصنع الفرح ويرسم الابتسامة على وجهوه. الحزانا. وفي ما يخصه كنّا نرى السعادة والرضا والشعور بالراحةعلى محياه ... اسناء ترديد المطربين لالحانه واعتقد كان يكفيه ان يري اعجاب الجماهير واشادتهم بما يكتب لم يكن يطمع في اكثر من ذلك ويكفيه فخرا انه اضاف لمكتبة اغنية الدليب الطمبور اجمل النصوص الهادفة المستمدة من تجربته الخاصة وكتاباته المعبرة عن تجارب الآخربن
عبدالله. حسب. ما علمت ان اشعاره لم تختصر علي تجربته الخاصة فحسب بل كتب بما يعبر عن اشواق الآخرين في بداياته خاطب المرحوم الشاعر حسن الدابي ولم يراه ولا يعرفه الا من خلال اسمه كشاعر
فولدت ...ود الدابي مالك ساكت ..
بابور البحر مو عارفي شايلي اعز. زول جواها .....
ما هماها حالي البيّ ما دام نوّره وضواها.....
يا. لروعة وصدق هذه المخاطبة .... وكذلك
لا زال الكثير منا يردد

حليل داراً قصاد ود البصير ...
فيها شربنا شربات العصير ....
شفنا الحسنو معدوم النظير ...
واصبح قلبي من يوم داك اسير ...
شوفوا كمية الشجن والتشويق في هذا الوصف السلس الانسيابي الرصين الممتع .....
وفي نص لو بتذكر يقول

ما صدقت لمن قالو لي الناس وصالك تاني بتعذر....
وما بلقاك لو قاسيت جحيم وسهر ....
بدورك تاني في ساحاتنا تتبختر...
نشوف الدنيا في خديك لمن بالخجل تحمر ...
نشوف عينينا في عينيك بتحاور هناك حور.....
كانما اراد. ان يبرز حوار العيون..... بشفافية واضحة ....
وفي نص اخر يثور ويحتج وينتقد ظاهرة غير مألوفة في المجتمع السوداني .... يقول
اما المفاهمة
يا ظريف فضروري انك فاهمة.....
بس بي عيونك كلمه ....
وكلّم عيونك تعزمه ...
ومعلعون ابو كل العيون
الماتعرف الترجمة.....
ثم. يصوّب سهامه فيقول مستهجناً
طول بينا يا ليل السواد ..
وشبعنا في خم الرماد ...
لمن نحصل قوم عاد..
وكان الله في عون العباد..
لم يعجبه الحال ....
وما اجمل ان تستمع له وهو يقرأ اشعاره
طريقة الالقاء عنده لا تقل تشويقا والقاً عن الاستماع لاشعاره ملحنة.
رحمة الله عليه ..

حسب. متابعتنا لمسيرة عبد الله محمد خير الفنية كشاعر وككاتب قصة قصيرة اعتقد انه شكل قوافي من جميع حروف العربية من الالف الى لام الالف والياء كل هذه الحروف صنع منها قوافي
لم يستثني ولا حرف ولو لا مشاغل الدنيا وجريها الما بتلحق كنت جدولت
كل هذه الحروف بيان بالعمل واستخلصت قوافيها من الالف الى الياء و عبد الله واحد من قليلين وظفوا جميع حروف العربية
قوافي ... من خلال السهل الممتنع كلنا استمعنا الى
يا فتنا ...
يا البعد الله منك كان مخافتنا...
اكان حيين وما متنا....
لو حنّا القدر والدنيا لمتنا....
زي ما كنا تاني الحلة ضمتنا ...
نحلف ليك بزمتنا...
اسعادك مهمتنا...
بلاك قامت قيامتنا...
....لاحظوا الالف. والميم والتاء. والنون .والالف
قافية رباعية مرنة متجانسة تجبرك للمتابعة .فيها الكثير من التشويق واللحن الطروب
معظم قصائد عبد الله تجد فيها بيت او بيتن لا تخلو من عنصر الابهار
زي في مناجاة الحسن لمن يقول
شفاهك لي دعاية الحسن رواجا....
وسواد عينيك يزيد الحمى سهراجا....
ايه يعني الحرير يا اغلى ديباجا......
ويا دهب المدينة الجابو حجاجا.....
عبد الله يمتلك ثقافة عامة واسعة جداً
لا تتوفر حتى عند حاملي الدكتوراه رغم تواضع تعليمه لربما لم يكمل المرحلة الابتدائية الرجل موسوعة ...استمعت لمقطع فيديو للاديب العالمي الطيب صالح قال انه استمع الى مجموعة من اشعار عبد الله محمد خير نالت اعجابه ووجد في الكثير منها نشأته وطفولته ....بعد حكم الاديب الطيب صالح نحن ماذا نضيف يكفيه فخرا اشادة الطيب صالح
معظم النصوص التي كتبها عبد الله اظهر فيها عدم
توفيقه في الجانب العاطفي
زي
انا زول عنيد
يعرف يريد
يعزل عزل
الا البريده مكجنا...

وزي انا المعجب
انقص عمري عشرة سنين
اقول يمكن يكون انسب ...
ادلي دلوي مع العشاق
يجوز اكسب. ..
وفجأ يعود صوابي الغاب
اشوف آ نفسي متلك وزي وليد. يلعب ....
يجري وراء سراب ورهاب بعيد لي الليلي ما قرّب ....
و. في وصف اغاني الدارة يقول
يومو داك في الدارة بلحيل ضيقه...
حيّر الناس قالو جلى الخالقه...
الكفوف مطلية حنة مطبقة ....
لونه زي قمحا مصوبر في التقه...
نازله زي الليل ضفايرو مفرتقه.....
الشفاه يا سيدة خمرة معتقه....
إلا بس عينيك سيوفه مطرقة ....
وعبد الله كان عندو مشكلة كبيرة مع البواخر الزهرة. ...كربكان .. الجلا

جروح قلبي اللبت تبرا
زولي الشالتو الزهرة
وعنده بيت شعر ابرز فيهو جانب روحي
مشوار الم ...
وعلي قسم ....
زولا يقوم في كربكان من اهلو تب ما عندو راس...
اماً يكون بحاري شغال فيها شده ملاحو ولي قراصتو عاس.....
واتكرف الجرف المفوّح زيفو واتجرعلو كاس ...!!!

ولمن توقفت البواخر
حوّل على الباصات صابر جرا وفيصل وعوض عابدون والتوفيق دائما مغبون من كل وسائل المواصلات قال نقلن السمحات وفي ذلك خلّد اسماء لسواقبن واصحاب باصات .ما كنا لنعرفهم لو. لا حضورهم في هذه النصوص
عبدالله خلد نفسه من اوسع الابواب حتظل كلماته يرددها كل. المعجبين جيل بعد جيل
وما وقف في منبر الا. وكانت ارقي حضور عنده كمية من الوفاء. لارقي واهلها. لا يوصف
ارقي يا رحمن في السماح
مافي بلدا بتجاكرا ....!
مافي فيها حاجه كل زول فوق بلدو. بيقول وصفه لبلدته ارقي مشروع. من باب الوفاء ترعرع على ارضها ولعب فوق قيزان رمالها شليل وباربور ويا لبلب وقمر قمر بنيته بينات التغر يحمل جواه كل ذكريات الطفولة
له الرحمة والمغفرة
قدر ما كان عبد الله متغرب...
كان لاحبابه. متقرب ...
كان محق.. وعبر بصدق
عندما قال يا زينوبة
اصلو ابوكي حالو بره...
لو قاري العلم هو.. ولاهو سيد خبرة.....
مو زول غربة لكن الظروف جابره..... .
مالو ان كان صبر كل الخلوق صابره.....
الصابرات روابح لو يجن قماح....
صوّب سهامه في عين الحقيقة واصاب المغتربين في مقتل
الصابرات روابح لو يجن قماح كلام كبير ديرلو قعدة
هجرته عن ارض الوطن بالجسد .....! جاءت متأخره وما كان ليغترب ويكتوي بنار الغربة لو لا الظروف التي ذكرها.. وعبّر عنها .. حين عانه من قيودها.. عندما قال

اروح القيف تلوت الليل
ومرات اطلع الساقي....
ولا في مرور يقولي اقيف ولا دورية بتلاقي...
وبدل رديف هدوم الصيف
كفاي سروال وعراقي....

احساسه كونه.. مكبل بقيود واجراءات
يصعب الفكاك منها إلا بالعودة الى ارض الوطن .
افضي بهذا التعبير الصادق
واسالونا نحن المغتربين عن هذا الاحساس المؤلم واعتقد انه في هذا الجانب ترجم
احساس ملايين المغتربين ...
زارنا في المدينة المنورة سنة 1985
معه الاستاذ صديق احمد
الزيارة لم يكن القصد منها رحلة فنية بقدر ما كانت لزيارة مقام النبي صلى الله عليه وسلم وكان موجود معنا بالمدينة وقتها الاخ والصديق الشاعر عبد المنعم ابونيران تشاورنا مع بعض وقررنا ان نعمل لهم حاجه في شكل ضيافة الاخوان حجزوا استراحة
وقد كان التقينا معهم وكان سيّد هذا اللقاء وفاكهته ونكهته الشاعر عبد الله محمد خير كنا نميل و نفضل الاستماع لاشعاره منه بنفس الاهتمام لسماعها ملحنة من خلال صوت الفنان المبدع صديق احمد وشاركه في تلك الليلة الشاعر عبد المنعم ابو نيران بقراءة بعض النصوص واذكر عندما استمع لنص من عبد المنعم ابو نيران قال له
تجاوزت الخطوط الحمراء. بهذا. الغزل الصارخ وانت حفيد واسق الرجل الصالح الشيخ ابو نيران...!!
وكانت ليلة لا تنسى
بعدها بفترة اصدر كتابه
بعنوان انا المعجب به مجموعة من القصائد اختارها بعناية ..وصلتنا منها مجموعة قمنا بتوزبعها. انا والاخ عبد المنعم ابو نيران في حدود 50 نسخة تقريبا بعدها اتصلت على عبد الله بالتلفون واخبرته ان كمية الكتب قمنا بتوزيعها كاملة ارسل لنا من يستلم المبلغ ليرسله لك وقد كان ... وفي كلامه معي سالني. انت من وين من اهلنا في الشمال قلت له انا من الكرو جراها يا سلااااام الكرو كانت. مملكة لبعانخي حكم منها مصر والسودان قلت له ده كلام صح ثم قال والله متمني. ازور اثار الكرو وان شاء الله اصلها وذكر لي بعض معارفه من الكرو
ووعدني. بزيارة المدينة مرة اخري وبعدها بسنة غادر بصفة نهائية للسودان بعد وصوله داهمه مرض الكلى اللعين ولم يمهله طويلا
رحمة الله. عبد الله واسكنه فسيح جناته ..


احمد العوض....عيدابي

  رد مع اقتباس
 
 
 
 
قديم 19-09-17, 09:43 PM   #19
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

كنّا ندعوه لفعاليات روابط مروي وكانت مشاركاته قوية سواء ان كانت ليالي طرب وشعر كليلة مروي الكبرى والتي كانت تقيمها رابطة مروي بجامعة القاهرة الفرع أو رحلات مروي التي تقيمها رابطة مروي بجامعتي الخرطوم والقاهرة وكان وقتها يدير سيوبر ماركت في امتداد ناصر وفِي عام ١٩٩٠م تصادف ان كنت متواجد في البلد فترة قضيت معظمها مع صديقي الراحل المقيم عبدالهادي احمد عثمان والملقب بعبود سندول المحامي والذي أرجو ان تفرد له إدارة الموقع مساحة كهذه المساحة وهو بلا شك يستحقها أيضا وفِي تلك الايام حل بل هل علينا الشاعر أو أمير العاشقين عبد الله محمد خير عايد من غربته في اجازة يبحث عن شتول نخل لزراعتها في الحسيناب وهي قريته قضينا أسبوعين في كريمة كانت من اروع الأيام وللاسف لم يكن الأخ صديق احمد في كريمة في تلك الأيام تحدث عن الشعر والرسائل الستة واذكر أني ترنمت في حضوره وبصوتي الأجش بأغنية كانت رائجة ايّام دراستنا في كريمة الثانوية ايّام صولات وجولات الفنان صديق احمد 1976-1979م تقول الغنية يا زول عليك سيدي الحسن الساو جبل توتيل ضريح وعليك ابوك ألما حصل غلط عليك من قمت من شبت في دارو الفسيح كلمنا كان حابينا كان خادعنا بس خليك صريح وإلا وانتصب الشاعر جالسا قال لي والله الغنية نفتش فيها أنا صديق زمن ما لقيتا ليه اثر وللاسف ما كنت احفظ منها غير ذكرت وهذه الواقعة ثم التقيه في محله العامر في الرياض والذي كان في منتصف التسعينات مقصد لابناء المنحنى تعرفت عنده بالاخ صلاح الرشيد وقابلت الاستاذ محمد سعيد دفع الله والاخوة د مامون عبد الحليم ود سليم احمد بابكر ود توفيق الطيب وغيرهم كثير ثم ادينا فريضة الحج لعام ١٩٩٧م والتقينا بعد اداء الفريضةبمنزل الشاعر السر عثمان الطيب وكنا مجموعة من أبناء المنحنى نلتقي لأول مرة على صعيد واحد منذ ان افترقنا بعد التخرج د ود توم ود ود بادي وعبود وَعَبَد الهادي الخليفة رحمهما الله واخرين وهذه الليلية مسجلة عندي ولكنها في شريط كاسيت ثم جمعتنا مدينة الخرمة بدعوة من د سليم احمد بابكر من أرقي حيث كان كان يعمل طبيبا في الخرمة أتى الشاعر عبد الله محمد خير واخرين من الرياض وذهبنا من جدة والسر عثمان الطيب وشقيقه الفنان عادل وانضم إلينا من الطايف د ود توم ود زكريا من العفاض وقضينا خميس وجمعة غاية في الروعة في هذه المدينة التي تشبه الى حد مدينتي كريمة والدبة بالتأكيد لا تحتاج شاعرية عبد الله محمد لشهادة مني ولكني اشهد بان كل الأوقات التي جمعتني به وبمن ذكرت كانت ممتعة خالدة في الذاكرة نسال الله ان يتغمد الشاعر الفذ عبد الله محمد خير برحمته ويسكنه فسيح جناته وشكرا لكم على أفراد هذه المساحة لهذا الشاعر الكبير والذي ترك في نفوسنا اثرا طيبا وساهم مع غيره في تشكيل وجداننا رحمه الله

موسى الحسين

  رد مع اقتباس
 
 
 
 
قديم 19-09-17, 09:50 PM   #20
قريرابي ماسي
 
الصورة الرمزية محمد يونس





محمد يونس غير متواجد حالياً

من مواضيعي :
افتراضي رد: اسبوع الراحل عبد الله محمد خير في منتدى منحنى النيل

اخوتي في منتدى منحني النيل الادبي
لكم كل الود والتقدير
وبعد
فالكتابة عن هذا الهرم الوطن الاستاذ الراحل عبد
الله محمد خير طيب الله
ثراه تحتاج لاستعداد ذهني وبدني لان هذا الرجل الوطن الكتابة عنه صعبه بكل المقاييس ..
زارني في القرير اكثر من
مرة وزارني في الكلاكلة
صنقعت اكثر والتقيته عدة
مرات في مناسبات عديدة
عبدالله محمد خير
يجذبك اليه من دون ما
تعاني لانه يملك قلبا رقيقا
ومشاعر متدفقه تجذبك
اليه والي التقرب منه ..
عندما ذهبنا لزواج الاخ
عبدالرحيم ارقي فقد استقبلني هذا الانسان
استقبالا يصعب ان اصفه
لكم بعد هذا الاستقبال
الرائع بدينا نتونس ونتجاذب بعد بعض اطراف الحديت وكنت
سعيد سعادة بلاحدود وانا
اجلس مع هذا القامة الوطن طلبت منو ان يقرأ
لنا *من طريف ادينا لمحه*
ابتسم ثم نظر من حولنا
فكان بالقرب منا صبيا في
سن ال 18 وال 20 ولم
يستجيب لطلبي وفهمته ..
سألته عن الاخوانيات فقال لي البيني وبين حسن الدابي واللا حاتم
والآخرين .. قلت كلها علي
بعضها وبطريقه ذكية حولي السؤال ..
وقلت رايي وقد اعجبه ردى.

*ونواصل*

عبدالله محمد خير
ساهم مساهمة فعالة في
انتشار اغنية الطنبور
فأذا كانت اغنية الطنبور
ترتكز علي اربع ركايز فهو
واحد من هذه الركايز وقد ساهم بأشعاره
الرائعه بنقل اغنية الطنبور
من المحلية للقومية عبر
صوت الرائع فنان الاجيال
وكل الاجيال صديق احمد
فقد وجد شاعرنا الرقيق
ضالته عبر صوت صديق
احمد ليقدمو لنا اروع
الاغاني ويثرو مكتبة
الاغنية السودانية بروائع
الاغنيات شعرا ولحنا واداء وقدمو لنا اروع ثنائية في اغنية الطنبور
بينه وبين الفنان صديق
احمد .. ثنائية ثالثة في
خارطة الفن السوداني
كرصيفاتها بل تفوقهن في
كمية ماقدموه عبد الله
محمدخير وصديق احمد
ولو عملنا حصر لما قدموه
حسين بازرعا وعثمان
حسين واسماعيل حسن
ومحمد وردي نجد ماقدمه الراحل عبدالله محمد خير وصديق احمد اكتر
بكتير من ماقدمه حسين
بازرعه وعثمان واسماعيل
حسن ووردى واتحدى من
يقول غير ذلك وبالارقام ..

*نواصل*

لو تحدثت عن ما قدمه من اشعار
للفنانين غير صديق احمد :

قدم اربع اغنيات للفنان
الراحل عثمان اليمني وهي
1 /لما الاقي البريدو
اضاعف ريدى وازيدو
2/ مابتلاقي عيوني شوف
حالا البقي
انت من فارقتها النوم
فارقه
3/ يا ريتني انا ماتلفت
وكته مسك دربي فته
4 /صلاة النبي عيني باردى
علي الشايلي الصفيح
واردى ..
وهنا اتحدث عن هذه
القصيدة الاستاذ الراحل
اليمني بدل في مطلع
القصيدة وقال علي الشاقي الصفوف واردي
بدل علي الشايلي الصفيح
واردى 4 غنيات عند اليمني ..

الراحل محمدكرم الله
قدم اغنيه واحدة هي
تراني حلفت بي الله وتاني
بقول وحاة الله
من الفنانين الشباب تغنى له
الراحل عبود تبورى اغنتين
عبد القيوم الشريف اغنية
كانت رد لاغنية ابراهيم
ابنعوف والفنان الشاب
محمداحمد مسلم المعروف
بود احمد اغنتين واسم
وداحمد سماهو عبدالله
محمدخير لانو كان متبنيه
وسجل له شريط كاست
تحت رعايته بعنوان المشاعر ماكل شئ ..
وعذرا اذا نسيت فنان ما
ذكرتو او اغنية عند فنان
آخر

*نواصل*

عبدالله محمدخير من
الشعراء المظلومين اعلاميا
ولو ان الراحل عبدالله محمد
خير كان من اي منطقه غير منطقة منحني النيل
لكان من اعظم المشاهير
في السودان والوطن العربي ..

عبدالله محمدخير من اميز
شعراء جيله تجده يختار
اصعب القوافي
مثل حرف الشين وحرف
الجيم وحرف ض
تجده في نار عويش
نجده في ماخلاص سيبيها
ماتسويها حجة
الرقيص بعدك وقف ياستو
ادى الدارة خجة
ونجده ايضا في اغنية
حسن ماجا
وحسن ياحلوه ماعارف
الزهور راجا
نجد حرف ال ض في
اغنية طولت شايله الذكرى
في عينيا للعيد المضا وهي كما تعلمون من اصعب القوافي واندرها .
عبدالله محمدخير شاعر
مجيد يجيد كل الوان
الشعر ، الشعر الوطني والقصصي والاجتماعي والغزلي .. نجده يميل للشعر الغزلي والوصفي
واجزم انه من اميز الشعراء في الشعر الغزلي
بجانب شيخ الشعراء حسن الدابي وعوض عابدون وثلاثتهم يجيدون
هذا اللون من الشعر وهم
اقرب لشعراء الحقيبة بل
يفوقوهم في كثير من الاحايين وفي مواضع عديدة ..

يقول شاعرنا عبدالله محمدخير في قصيدته
المشهور العقد :

لومره جاد زمني وسعد
وبقيت متلك ياعقد
ارتاح وفوق صدرو انسند
واتفرا مرات وانجبد
وامزح علي كيفك واجد
لابتسعل لابتنشد ..
وتستمر القصيدة في قمة
الوصف الحسي
حتي يقول :

خلو العقد وخبر العقد
وخايفك تكون ياقلبي رد
جسمي المصلصل كيف ورد
ونارى الابت ما تتخمد
والله مالي فيه ند
ويمكن اكون للزيو جد

كما ذكرت آنفا في مطلع كتاباتي انه يجيد هذا النوع من الشعر
يقول في اغنية عند اليمني
ياريتني انا ما اتلفت
وكنت مسك دربي فتا
فوق صدرو اتنين فرتا
من قدامن شردتا
انا اتجنن واللا ردتا
ذى حريته وبردتا

وفي اغنية حديثك شوقنا
ليك :

آية في رقصك ياجميل
لما ايديك يتفدعو
وصدرك الدافر حبتين لما
يتهزو يبدعو
انت فيها براك صول وجول في الرقيص ورينا الاصول
خلي كل الناس فيك تقول
قالو الما تلحقو جدعو ..

كذلك في اغنية نار عويش
يقول شاعرنا :

العجب العجيب ايدو
الملاني غويش
شفنا التلا لكن مافي حس
كشكيش
ومن اشعار الغزل الرائعة
عند شاعرنا
من الازاهر اندى
يا ضو القمر المنو صافي
وانده يازينة العمر
حبك عقيدة ومبدا
ريدك لي طريق انا منو
لازم ابدا
بحسب جفاك مودة
واترغب لقاك مهما تطول
المدة
ويواصل فيها ان ان يقول :


آه من شذاك ياوردة وآه انا من عيونآ للسلاح تتـــحدى

فى هوانا ايه الجدا ؟ ليه قلبك نســـانا وجــار علينا وصدا


كتابه عن شاعرنا عبدالله
في الزمن بدل الضايع
عبدالله مخمد خير كان
ترزيا بارعا رجالي وستاتي
حضرت له حسناء في الدكان بعد السلام سألته
وين حسن
قال حسن طلع قبل شويه
وحسن كان زميله في الدكان
البيت مشت وجات لتقول
حسن ماجا
قال حسن ماجا
فكانت اغنية حسن ماجا
حسن ماجا
حسن ياحلوه ماعارف
الزهور راجا

وقصيدة :
تعال كلمني عن رؤياك
ومافيها
صحيح بالله شفت النار
وشفتني ياجميل فيها
قول لي كان شعورك كيف
هل حاولت تطفيها
واللا كمان رضيت بالحال
وقلت اسيبو في الفيها
دى مااحلام ولاده منام دى
حاجه خفيه مااظنك
تعرفيها
وحاتك ظاهره في عينيك
لو حاولتي تخفيها

في ختام حديثي عن هذا
الرجل الوطن اقول
هو شاعر مثقف من كل
النواحي رغم انه لم يجد
حظه من التعليم الكافي
فقد استطاع ان يثقف
نفسه بنفسه ويثقف من حوله في منطقة منحنى النيل عموما ان لم يكن كل مناطق السودان..
كذلك هو رجل شجاع لايخشي في الحق
لومة لآئم ورجل صبور مؤمن بالقضاء الله وقدره خيره وشره
عبدالله محمدخير رحمه
واسكنه فسيح الجنات مع
الصديقين والشهداء
ولكم الشكرالجزيل علي هذه السانحة ولكم كل الود والتقدير.

مع عاطر تحياتي
اخوكم محمد محمد الحسن ودالمساعيد

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

---
شارك هذا الموضوع مع أصدقائك على الفيس بوك
Share

الساعة الآن »06:51 PM.


Powered by vBulletin® Version 2017
.Copyright ©2000 - 2017, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل