آخر عناقيد جيل الكبار بالقرير [ الكاتب : عمر محمد نور - آخر الردود : عمر محمد نور - ]       »     حكمــــــــــة اليـــــوم [ الكاتب : احمد عبدالله جقلاب - آخر الردود : احمد عبدالله جقلاب - ]       »     عُــــدنا ***والعـــــود إن شا... [ الكاتب : احمد عبدالله جقلاب - آخر الردود : بابكر محمد أحمد دفع الله - ]       »     المتواجدون [ الكاتب : درماس - آخر الردود : بابكر محمد أحمد دفع الله - ]       »     دفتر الحضور اليومي [ الكاتب : عبد المنعم عبد الرحيم حضيري - آخر الردود : بابكر محمد أحمد دفع الله - ]       »     بريق الوحل [ الكاتب : ابو ميسره - آخر الردود : ابو ميسره - ]       »     اقرأ آية (واحدة) من القرآن الك... [ الكاتب : مجاهد الرفاعى - آخر الردود : يس بابكر الشيخ محمد - ]       »     عبد الوهاب كاره يودع المهندس ا... [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     سجلوا دخولكم بالدعاء لي لبني م... [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     مـرعـام كأنـه أعـوام !! [ الكاتب : يس بابكر الشيخ محمد - آخر الردود : يس بابكر الشيخ محمد - ]       »     "حــد الريــد" ماتــت ،، و الح... [ الكاتب : يس بابكر الشيخ محمد - آخر الردود : عمر محمد علي ترتوري - ]       »     "سفيرنا بمصر يزور مامان الآن" [ الكاتب : عمر محمد علي ترتوري - آخر الردود : يس بابكر الشيخ محمد - ]       »     في ذمة الله صلاح محمد عثمان [ الكاتب : عبد المنعم عبد الرحيم حضيري - آخر الردود : يس بابكر الشيخ محمد - ]       »     توثيق ندوة حاج الماحي [ الكاتب : محمد يونس - آخر الردود : محمد يونس - ]       »     "عمر ترتورى يكتب : وااا حلالى ... [ الكاتب : عمر محمد علي ترتوري - آخر الردود : عمر محمد علي ترتوري - ]       »     "يااا حليلك يا بلدنا (عمر ترت... [ الكاتب : عمر محمد علي ترتوري - آخر الردود : عمر محمد علي ترتوري - ]       »     اجر وعافية يا ترتوري [ الكاتب : عبد المنعم عبد الرحيم حضيري - آخر الردود : عمر محمد علي ترتوري - ]       »     المختار من خواطر المستشار [ الكاتب : عمر محمد نور - آخر الردود : عمر محمد نور - ]       »     "عمر ترتوري يكتب عن فوز بروف ك... [ الكاتب : عمر محمد علي ترتوري - آخر الردود : عمر محمد علي ترتوري - ]       »     استراحة ما بعد الظهيرة [ الكاتب : أم مؤيد - آخر الردود : ابو ميسره - ]       »    

تسجيل خروج البحث تحكم العضو التسجيل الرئيسية


 
 
العودة   منتديات القـريـر > قــــائمة المنتديــــات > المنتدى الأدبي > منتدى الرواية والقصة القصيرة
 
 

الإهداءات

إضافة رد
 
أدوات الموضوع انواع عرض الموضوع
 
 
  #1  
قديم 10-02-09, 12:53 PM
الصورة الرمزية علي محمد أحمد (أبورنس)
علي محمد أحمد (أبورنس) غير متواجد حالياً
قريرابي ماسي
 





افتراضي ورد شاربة من موية المجاري !!!


(1)


كعادتنا .. نحن في السودان .. سيد الدكان يبقى صاحب بيت .. حتى ولو كان مستأجر الدكان .. تلقاهو يدخل ويمرق .. متلو متل ناس البيت .. يشارك في أفراحهم وأتراحهم .. وإذا كان ضيف على المنطقة .. تلقى أهل البيت والجيران .. وناس الحلة كلهم .. يتعاملو معاهو .. كأنو واحد منهم .. وإذا حصلت ليهو مناسبة في المنطقة الجاي منها .. تلقاهم يتجمعوا .. ويمشو ليهو .. ويشاركوهو مناسبتو .. ودا شيء طبعا معروف للجميع .. وهي عادة متأصلة فينا ..
المهم أخونا (س) كان من الجماعة ديل .. نزل ضيف على منطقتنا بجبرة .. وساقتو الأقدار .. عشان يستأجر البقالة الموجودة عندنا بالبيت .. وبصراحة كان إنسان محبوب .. حلو اللسان .. في فترة وجيزة .. عمل علاقات مع كل الجيران ..
بالرغم .. من إنو ما وصل مراحل عالية في التعليم .. إلا تلقاهو ملم .. بأشياء كثيرة .. ويستطيع التفاهم مع جميع فئات المجتمع .. من الغفير إلى الوزير ... عندو طرق ودريبات .. يستطيع من خلالها .. يمشي كل أمورو .. ويقضي حوائج كل من يقصده .. وبالطريقة دي .. دخل قلوب الجميع ..
علاقتي بيهو .. تحولت إلى صداقة .. يعني نظام نحكي أمورنا لبعضنا .. نمشي مشاوير خاصة سوا .. وكدا ، كان مولع جداً بالشيخ البرعي .. لدرجة انو في مرة من المرات .. جاب لي صورة للشيخ .. وأصرّ أني أرسمها .. بحجم كبير .. وقد كان .. أخد الرسمة وعلقها في وسط البقالة .. وسمى البقالة ( بقالة البركة ) .. قال عشان ربنا يبارك ليهو فيها !!!

في يوم من الأيام .. أثنا عودتي من العمل .. قابلني قدام البقالة .. وقال لي .. أدخل جوة البقالة .. عاوزك في موضوع مهم .. دخلت البقالة وسألتو ..

- خير الحاصل شنو ؟؟
- ما في حاجة .. بس في زول دايرك تشوفو ..
- ياتو زول دا ؟؟
- واحده كدا .. حا تجي بعد شوية ..
- ماشي .. يا سيدي .. وأنا في الانتظار !!!

قعدت مع صاحبي .. نشرب في البارد .. و(نسولف) .. بعد شوية .. جات واحدة .. سبحان الخالق .. ( لازم أشير هنا .. أنا ما من طبعي البصبة .. عشان ما تفهموني غلط ، يعني صاحبي طلب مني حاجة .. أقول ليهو لا !!!) ... المهم .. البنت غاية في الجمال .. وكمان الميزه الفيها .. الهدوء والرزانة .. وقفت .. دقائق معدودة .. باحترام شديد .. طلبت الحاجات العاوزاها .. شيء بالإشارة .. وشيء بكلمات موجزة .. وأخذت طلبها .. ومشت .. وتركت خلفها .. علامة استفهام كبيرة .. غير طبعة رائحة العطرالزكية .. التي غطت .. على رائحة المواد التموينية والصابون والزيت ..

- يا زول .. دي منو ؟؟ أنا أول مرة أشوفها في المنطقة .. ( بالرغم من إننا كنا عاملين فيها مقددنها .. وحافظين جبره كلها ) ..
- دي .. يا أخوي .. واحدة سكنت .. هنا ليها كم شهر .. في بيت ناس عمك فتح الرحمن ..
- انت .. ناس فتح الرحمن رحلو .. ولا شنو ؟؟ .. ياخي .. أنا شايف ولدهم أمبارح دا !!
- لا ياخي .. أصلهم أجّرو .. نص البيت ..
- هسع .. كدي خلينا .. من ناس فتح الرحمن .. وريني الحكاية شنو ؟؟؟
- أمشي .. اتغدى غداك .. وبعدين .. بجيك .. أفهمك القصة كلها ..
- ماشي يا عم .. حا انتظرك .. بس ما تتأخر علي !!!

من مواضيعي :
رد مع اقتباس
 
 
 
 
قديم 10-02-09, 12:59 PM   #2
قريرابي ماسي
 
الصورة الرمزية طارق عبدالرحيم الأسطى





طارق عبدالرحيم الأسطى غير متواجد حالياً

من مواضيعي :
افتراضي رد: ورد شاربة من موية المجاري !!!

ابورنس ياخي ورينا الحاصل ، ما تغيب كتير

  رد مع اقتباس
 
 
 
 
قديم 10-02-09, 05:46 PM   #3
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة طارق عبدالرحيم الأسطى مشاهدة المشاركة
ابورنس ياخي ورينا الحاصل ، ما تغيب كتير

العزيز .. طارق

خليك معاي .. التقيل جاي لوراء !!

  رد مع اقتباس
 
 
 
 
قديم 10-02-09, 05:53 PM   #4
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(2)


أنا طبعا مشيت .. وفي بالي مليون حاجة وحاجة .. وإستفهامات كثيرة ..
يا ربي ..الزولة دي مني .. وقصتها شنو .. وصاحبي دا لازم يشغلني كدا .. ما كان يكبو لي كلو في قعدتنا ديك .. غدا شنو ياخي .. هسع الغداء ذاتو نفسي مرقت منو ..

بعد صلاة العصر .. رجعنا سوا من الزاوية .. وقعدنا قدام البيت .. تحت النيمة .. وقبّلت علي صاحبي .. وعاينت ليهو كدي .. قال لي عارفك ما عندك صبر وأنا حا أدخل ليك في الموضوع طوالي .. استعدلت كويس .. وشرفت اضني .. وبقيت ما بسمع إلا صوتو .. وبدا أخونا (س) يحكي قصتو ..
قصة صاحبة الحسن والجمال .. وإنو كيف عجبتو .. من أول يوم شافها فيهو .. وبقى يشكّر في أخلاقة .. وتهذيبها .. ودي هي البنت .. الكان متمني .. يرتبط بيها .. وعييييييييييييييك .. غايتو قال جنس كلام وحكى جنس حكي !!! في نهاية حكيهو .. قال لي ..
-أنا يازول البت دي .. أكان فاتتني .. ياني المكتول كمد !!
- طيب يا سيدي .. خليني النسألك .. وجاوب بكل صراحة .. يعني انت خلاص .. حزمت أمرك, .. بقيت عليها تب ..
- أيوه يا خي .. دي عاوزه سؤال كمان !!
- لكن .. انت اتكلمت معاها .. وضحت ليها .. مشاعرك وكدا ..
- هو يعني .. أنا كان ما اتكلمت معاها .. وظبَطّ أموري كلها .. كان جيت وحكيت ليك ..
- يا راااااااااااااجل .. الكلام دا كلو .. وأنا ما جايب خبر .. دي صحبة شنو دي .. يعني أكون آخر من يعلم ..
- أبدا والله .. ما آخر من يعلم ولا حاجة .. انت أول واحد يعرف الحكاية دي .. وأنا يا دوب اتكلمت معاها أمبارح ...
- شوف بالله .. وهي جايه البقالة .. كأنو مافي حاجة حاصلة .. شغل دكاكيني يعني !!!
- هاهاهاها .. ما لازم طبعا .. مش بيقولو .. أقضو حوايجكم بالكتمان ..
- أيوه .. سويها لي أمثال .. ما علينا .. آها .. الحكاية دي .. عاوزنها .. تشوف النور .. ولا لسع بدري عليها ..
- بدري شنو .. أقول ليك أنا ما صدقت لقيتها .. بس .. خليني .. أنجض الموضوع .. معاها .. وأدخل على أهلها .. وانت طبعا حا تكون متابع معاي ..
- متابع .. والله دي حكاية دي .. انت فوّت عليّ البداية .. وكمان عاوز تضيع باقي الأحداث .. يا أخوي .. أنا معاكم .. حتى في أحلامكم .. وكدي أقدر دس مني حاجة .. ولا أعمل خطوة .. ما تكلمني بيها ..
- ما تخاف .. هو أنا عندي منو .. غيرك هنا .. بفضفض ليهو ؟؟؟
- أنا عارف !!! .. شايف أصحابك .. كترو اليومين ديل !!!
- أصحاب شنو .. ديل كلهم معارف ومصالح .. وتمشية أمور .. أهو .. نخدم ويخدمونا .. والدنيا عاوزه كدا .. حكاية تكون براك ماشي وتدافر ما بتبقى .. ومافي حاجة بتمشي ليك ..
- كلامك صاح .. الدنيا عاوزه كدا .. المهم .. ركز في موضوعك دا .. وخلينا في الصورة ..
- ماشي .. يا حبيب .. وبمناسبة الصورة .. راح أجيبك ليك صورتها .. عشان تبدع لي فيها ..
- يازول هيييييييي .. كلو شيء .. ولا صور الحريم .. انت داير تجيب لينا الهوا !!!
- عالم جبانات بشكل ..
- أيوه جبان .. خليك انت .. في موضوعك .. وربنا يسهل ليك ...
- الدعوات دي .. ياها الأنا عاوزه .. كتّر لي منها .. عليك الله ..

(نتابع بإذن الله )

  رد مع اقتباس
 
 
 
 
قديم 11-02-09, 11:08 AM   #5
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(3)


استمر أخونا (س) في لقاء حبيبة القلب .. (أخوكم طبعاً متابع ) ودخل صاحبنا في أمور الهدايا .. واتعرف على أسرتها .. وكمان .. عرفني بيها !!! والحقيقة .. هي إنسانة مذهلة .. تتحدث بكل أدب واحترام .. حتى مشيها في الشارع .. ما زي باقي البنات .. ( طبعا بقيت كل يوم أشوفها .. التقول صاحبنا دا .. كان عامل ليها سحر وداسيها من عيون الناس ) .. وأشيل وأدعو ليهو .. إنشاء الله ربنا يسعدك بيها .. وما يجي ود حلال ويحيرك فيها !!! .. واحده متل دي .. معقولة .. ما يترقبوها .. ويحاولو يصطادوها .. والله دي كان حصلت .. صاحبي إلا يشرب موية الغسيل .. وعقلو يشتت ضمه .. غايتو .. ربنا يتمم ليهو على خير .. ويخليهم بعيدين من عيون الحساد ..

مضى على الحكاية دي حوالي شهر .. وصاحبي تشوفو .. الفرحة عاوزه تنط من عيونو .. كل شوية يجي يحكي لي .. سوينا وعملنا .. تركنا وفعلنا .. واتفقنا وقررنا .. وأنا ( متااااااااااابع ) وأقول .. الله يستر عليك .. عقلك ما يفلسع قبال ما ينتم مرادك ..

بدأ يجهز .. للعرس .. وبالطبع كلم أمها .. واتفق معاها .. (هو أنا ما قلت ليكم ؟؟) أصلو البنت عايشه مع أمها وزوج أمها .. أما أبوها... ولا أقول ليكم أحسن أخليهو هسع .. قصتو بجيها بعدين ..

المهم في الموضوع .. بدينا نستبشر خير .. وبقيت أناديهو بالعريس .. والكلمة دي طبعا .. كانت بتبهجو للطيش (جات كدا .. أقبلوها) وبقينا نعدد في الحاجات .. طبعا المواد التموينية مضمونة .. فضل موضوع الدهب والملابس .. ومشكلة الريحة ( مشكلة كل عريس ) ...

مرت الأيام .. وفي يوم جيت ماشي على البيت .. وألقالكم صاحبي .. قاعد قدام البقالة .. وخاتي أيديهو على جضومو ومتحير .. ربنا يستر .. الحكاية ما يكون فيها عصلجة ..

- السلام عليكم ..
- عليكم السلام ..
- شنو الحكاية .. مالك قاعد كدا ومتحير ؟؟
- والله .. أنا الفيها .. تحير بلد بحالها ..
- يا ستار يا رب .. كدي قول بسم الله وريني الحاصل ؟؟
- أقول ليك .. شنو بس .. دي حاجة .. ما عارف أحكيها كيف ..
- حاجة شنو .. ما تكون اختلفت مع الجماعة ؟؟؟
- يا ريت لو كان اختلاف .. كان الموضوع بقى ساهل ..
- ياخي .. وغوشتنا .. قول الحاصل شنو ؟؟؟ شكلك دا .. بيقول في مصيبة حصلت ..
- هي .. مصيبة نصاح !!!
- لا إله إلا الله .. ياخي .. ما تتكلم .. قول .. طلع العندك ..
- العندي .. ما بينفع أقولو ليك هنا .. يلا .. ندخل غرفتك جوه .. وأحكي ليك المصيبه الأنا فيها ..


(نتابع بإذن الله )

  رد مع اقتباس
 
 
 
 
قديم 11-02-09, 10:21 PM   #6
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(4)


دخلنا الغرفة .. وقفلنا علينا الباب .. وبدأ صاحبي في الإسهاب ..

- خير يا صاحبي .. قول بسم الله .. واحكي لأخوك ..
- أنا بصراحة في ورطة .. وما عارف .. أسوي شنو ..
- اللهم طولك يا رووووح .. بالله عليك قول .. وبعدين نشوف .. كان بقت ورطه ولا حاجة تانية ..
- انت طبعا .. عارف العادات .. في حكاية العرس ..
- ياتو عادات .. العادات عندنا كتيرة ..
- قصة .. لازم تسأل عن العروس وأهلها .. وأصلها وفصلها ..
- طيب .. دي ما حاجة عادية .. أي زول بيعمل كدا .. المشكلة وين هسع ..
- ما هي دي .. يا ها المشكلة .. أخوك طبعا حب يطمئن .. ويعمل شوية استخبارات عن العروسة .. وقلت دا شيء ما بيضرها في حاجة .. وأحسن الواحد ياخد معلومة عن أسرتها .. وانت سيد العارفين .. أنا معرفتي ليها هنا وبس ..
- برضو ما شايف في مشكلة .. يعني هي دلوقتي .. عملية السؤال دي .. أزعجتها .. لامتك وقالت ليك ليه عملت كدا ؟؟؟
- البنت .. ما عندها خبر بالحاصل دا .. وشغالة تستعد للعرس ..
- جميل .. لحدي هنا والأمور كويسة .. آها .. حصل شنو خلاك بالحالة دي ..
- أنا عشان أعرف .. أخبارها .. مشيت سألت عنهم حاجة (فلانه) .. ونصحتني .. أمشي لواحدة تانية .. وقالت لي بتلقى عندها الخبر .. أصلهم كانو ساكنين جنبهم .. قبال ما يجو جبره .. أخوك ما صدق .. أخدت منها الوصف .. ودربي عديل على المرا .. ولما قابلتها .. وحكيت ليها الحاصل .. وعرفت إني زول عرس .. قالت لي .. أخير يا ولدي أقول ليك الحقيقة .. ودا شيء بسألوني منو يوم القيامة ..
- وقالت ليك .. شنو .. خلتك جيت مقلوب بالشكل العجيب دا ...
- ...... ............ ......................
- ما تسكت تعاين لي كدا .. قول بوظت أعصابنا ..
- انت عارف .. إنها عايشة مع زوج أبوها ..
- أيوه عارف .. وانت القلت لي الكلام دا ..
- بس .. انت ما عارف أبوها منو !!!
- حا أعرف من وين !! انت عرفتو ؟؟؟
- يااااااااااااا ريتني .. ما عرفتو ..
- مالو .. طلع مجرم ولا حاجة ..
- أبدا .. يااااااااااااااريت
- أحكي بالله !!!!!
- يازول .. أقول ليك وأمري لله .. البنت .. طلعت نتيجة علاقة ما شرعية !!
- تقصد .. إنها بت ....... ؟؟؟
- أيوه .. بت ..........
- انت متأكد من الكلام دا .. إمكن المرا دي .. تكون أدتك معلومات غلط .. أصلو في حريم كدا .. يحبن العرقلة .. وبتاعات فتن ومشاكل ..
- لا يا أخوي .. أنا سألت كم واحد من نفس المنطقة .. وأكدو لي المعلومة ..
- والله .. دي مشكلة صحيح .. معقولة الجمال والتهذيب دا كلو .. وتطلع بت ..... ، سبحان الله .. وهسع ناوي تعمل شنو ..
- ما أنا المجنني .. ومحيرني .. ومخليني ما عارف رأسي من رجلي شنو !!!
- أوعك تكون عاوز .. تقول ليها الكلام دا .. تكون جبت أجلها .. تلقاها هسع ما عندها خبر ..
- ياخي .. معقوله أقول ليها كلام بالشكل دا .. انت ما نصيح .. وأنا زيك متوقع يكون ما عندها خبر ..
- دي بالجد مشكلة .. ومشكلة عويصه كمان .. ودايره منك تفكير شديد .. وما تستعجل ...
- أفكر بياتو عقل .. هو فضل فيني شيء أفكر بيهو .. كدي انت قول لي .. أسوي شنو ؟؟؟؟



(نتابع بإذن الله )

  رد مع اقتباس
 
 
 
 
قديم 14-02-09, 09:07 AM   #7
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(5)


جلسنا أنا وصاحبي واجمين .. وكل واحد يعاين للتاني .. ما عندنا شيء نقولو .. ونحن في تلك الحالة .. سمعنا صوت سيارة شحن وقفت .. قدام البقالة بعد شوية .. جاء أخوهو الصغير ودق الباب ( فاتني أن أذكر ليكم .. إنو كان معاهو أخوهو الأصغر منو .. بساعدو في البقالة ) .. فتحت الباب ..

- مرحب اتفضل ..
- لا ماشي .. (س) الجماعة جابو البضاعة ..
- استلمها منهم .. وأنا بجي بعد شوية .. ما فايق ليهم هسع ..
- قالو عاوزنك انت تستلمها منهم .. عشان عندهم كمان باقي حساب ..
- قوم يا أخوي مشي مصالحك .. وإن شاء الله ربنا بيعدلها .. والفيهو الخير بيكون ..
- والله .. أنا هسع ما عندي أي مخ ليهم .. دايرين ينزلوها ينزلوها .. ولا كمان خليهم يمشو ..


أصريت عليهو يقوم يشوف شغلو .. وقلت ليهو الكلام ملحوق .. والشغلة دي ما دايره ليها استعجال .. في الأخير قام مشى عليهم .. وخلاني أنا عقلي يودي ويجيب .. دي حيرة شنو دي .. وبقيت كأني أنا المعني بالقضية .. وبقيت أفكر وأدور .. أجيب ليها الحل من وين ...

صاحبي خلص شغلو .. وجاني تاني وسألني ..
- آها .. قلت شنو .. ما أديتني رأيك !!
- بصراحة .. ما عارف أقول ليك شنو انت معاي .. إنو البنت ما عندها ذنب .. وكمان انت عارف كويس أخلاقها .. إنسانة ملتزمة ومافي شيء يعيبها ..
- معاك في الكلام دا كلو .. بس لكن ..
- ما فيها لكن ياخي .. سيبك من الكلام دا .. وأنسى كل الموضوع .. واتوكل على الله ..
- في رأيك كدا .. يعني أطنش ..
- طبعا تطنش .. هو انت الوداك شنو .. تمشي تبحت لمن تمرق العقارب ..
- دا كلام شنو .. قبيل ما قلت لي تصرفك سليم .. وما فيها حاجة ..
- أنا قايل الموضوع .. بيقلب لغم بالشكل الكئيب دا ...
- أقول ليك كلام .. أنا ما راح أعمل حاجة هسع .. وبمشي أدور الشغلة دي في مخي مرة تانية .. وزي ما قلت إنت .. الفيهو خير ربنا بيسويهو ..




(نتابع بإذن الله )

  رد مع اقتباس
 
 
 
 
قديم 14-02-09, 09:16 AM   #8
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(6)


تاني يوم .. لاقيت (س) .. وبعد السلام .. وشوية كلام .. سألتو السؤال المحرق روحي .. وإن كان الجواب باين من عنوانو ..

- خير .. سويت شنو ؟؟
- مافي جديد ..
- كيف مافي جديد .. قلت حا تفكر في الموضوع .. وتصل فيهو لقرار ؟؟
- أيوه .. بس ما قادر أصل لقرار نهائي ..
- قابلت الجماعة ؟؟
- قابلتهم .. وعندهم شك بأنو في حاجة ...
- شيء طبيعي .. البيشوف وشيك دا .. بيعرف إنو في قنبلة راح تنفجر .. .. فسرت ليها سبب العكننة شنو .. ولا طنشت ؟؟
- ما فسرت ليها أي حاجة .. اتخارجت منها بشوية كلام .. لكن هي شعرت بأنو في بشيء ما تمام .. ووعدتها إني راح أشرح ليها الحاصل ..
- ماشي يا أخوي .. بس ما تطول على الزوله دي .. لازم تحسم أمرك ..

انتهي الحديث عند هذا الحد .. ومشى كل واحد لحال سبيلو .. مرت حوالي ثلاثة أيام وما في جديد .. لحدي في يوم بعد صلاة المغرب .. ونحن راجعين من الزاوية .. قال لي (س) .. أنا وصلت لقرار وداير أشوف رأيك فيهو ..
قلت ليهو خير .. ومشينا على ميدان الرابطة (ملعب كرة القدم بجبرة) .. اليوم داك كانت في مباراة .. ومازال .. غبار اللعيبة ودفيرهم .. عالق بالمكان .. جلسنا عند زاوية الملعب مكان الكورنر .. المكان هاديء .. مافي حركة كتيرة .. إلا من بعض الأولاد .. يجرو وراء كورة هلكانه كدا .. هناك في طرف الحلة .. وشوية شوية تجي عربية .. تجهرنا بنورها وتمشي .. قعدنا قريب الربع ساعة .. وشفت صاحبي صامت .. قلت أخير أبداهو أنا بالكلام ..

- قلت لي وصلت لقرار ..
- أيوه .. الحكاية دي شكلها .. ما راح تمشي لقدام ..
- يازول .. قول خير .. ما تمشي كيف ؟؟!!
- في الحقيقة .. حكاية السمعة دي .. مشكلة كبيرة ..
- سمعة شنو يا أخي .. انت براك قلت البِت .. ما بتتعيب .. وما عندها ذنب في الحصل .. ليه داير تخرب الموضوع ..
- عارف إنها ما عندها ذنب .. لكن الناس ما بتعرف الكلام دا .. وبعدين سيرتنا بتبقى في كل لسان ..
- سيبك من كلام الناس ياخي .. وعيشو حياتكم .. وما تشغلو نفسكم بيهم ..
- نعيش حياتنا كيف .. نحن أكان سبنا الناس .. هم بيسيبونا .. والله نبقى لبانه في خشمهم ..
- العاوز يتكلم .. خليهو يتكلم .. البت ممتازه .. وواضح إنها اتعلقت بيك ..
- أنا ذااااااااااااتي .. اتعلقت بيها .. لكن الحكاية ما علينا نحن الاتنين بس ..
- منو تاني .. حا يدخل في الموضوع ..
- كيفن ياخي .. العرس دا .. مش راح يكون فيهو خلفه .. آها .. الأولاد ذنبهم شنو عشان الناس يعيروهم بأمهم .. يازول دي حاجة .. ما بتبقى كلوكلو ..
- يعني .. دا قرارك .. الأخير .. وما فيهو رجعه ..
- أيوه .. وأخير يكون الموضوع في أولو .. أحسن من ندخل في بيت وعيال .. وقلنا وقالوا ..
- والعروسة .. الفرحانة ديك .. تكتل ليها فرحتها في قلبها .. ولا أمها البتكون ما صدقت .. إنو بتها جاها عريس !!!
- أنا عارف الحكاية مؤلمة .. لكن ألم هسع .. ولا آلام بعدين .. وهي مصيرها .. تنساني .. وتلقى ود الحلال اليسعدها ..
- ياتو ود حلال دا .. غايتو .. الله يكون في عونها المسكينة .. هو في زول تاني حا يقبل عليها .. بالله دا عدل .. البنت تنظلم .. بسبب حاجة هي ما ليها يد فيها ..
- دا قدرها .. نعمل .. شنو ؟؟؟
- قدرها ؟؟ تعلق البت .. وتجي تقوللي قدرها .. انت قبيل الوداك .. تتشوبر شنو ؟؟؟

رجعنا للصمت .. مرة تانية .. وبان للعيان إنو (س) خلاص رمى طوبتها .. ومادام الحكاية بقى فيها عيال وسمعة .. يبقى الموضوع انتهى .. وبقيت أفكر في العروس .. البدت تستعد للزفه والفرح .. ولمة البنات وزغروده هنا ودلوكه هناك .. ويغنو لي ويغنو ليك





(نتابع بإذن الله )

  رد مع اقتباس
 
 
 
 
قديم 14-02-09, 10:59 AM   #9
قريرابي ماسي
 
الصورة الرمزية طارق عبدالرحيم الأسطى





طارق عبدالرحيم الأسطى غير متواجد حالياً

من مواضيعي :
افتراضي رد: ورد شاربة من موية المجاري !!!

راجين الباقي ، خليتني اتنفس الصعداء بعد آخر حرف

  رد مع اقتباس
 
 
 
 
قديم 14-02-09, 12:27 PM   #10
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة طارق عبدالرحيم الأسطى مشاهدة المشاركة
راجين الباقي ، خليتني اتنفس الصعداء بعد آخر حرف

عزيزي طارق الأسطى ..
ما بيطول انتظارك .. الحكاية وصلت نهايتها !!

  رد مع اقتباس
 
 
 
 
قديم 14-02-09, 12:34 PM   #11
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(7)


اتحركنا على البيت .. نجرجر في رجلينا .. وصاحبي .. شكلو أصبح كئيب خلاص .. ما عرفت أخفف عليهو .. أم أتهمو بالجبن والأنانية .. ما هو برضو معذور .. ما أي واحد يقدر يتحمل حاجة زي دي .. هسع أنا شغال أنصح فيهو .. وأشير عليهو .. لكن أكان الفاس وقعت في الراس .. ما عارف كنت راح اتصرف زيو .. ولا أدق صدري وألتزم بالكلام القلتو ليهو .. مش بيقولو الفي البر عوام ..

وصلنا البيت .. مشى على بقالتو ولفح عمتو .. ومرق قاصد الظلط .. داقش وين ما بعرفو .. خليتو .. قلت الفيهو مكفيهو .. المهم .. دخلت على البيت وراسي يودي ويجيب .. معقوله .. الحكاية تنتهي بالشكل دا .. وصاحبي .. كيف حا يقدر يقيف قدام البنت .. ويقول ليها (انتهى الحلم يا جميل) .. والله دا موقف .. الله لا وقفني ليهو .. يا ربي .. حا يقول ليها شنو .. ويعتذر ليها كيف .. ياخي دي حاجة تمخول العقل .. الله يعينهم الاتنين .. ومهما كان الكلام الحا يقولو .. ما حا يفرق .. يكفي إنو القصة انتهت .. والأعذار ما بتفيد .. قضيت الليل كلو فكري مشغول .. بالفلم دا .. اتعشيت بشنو .. الله أعلم .. نمت متين .. ما عارف !!
البعرفو إني كنت أردد الكلمات دي ..

ما ذنبها ؟؟
أخطأ أبوها وأمها ..
أجرما في حقها ..
ما ذنبها ؟؟
لماذا تقتصون منها ..
يلعنها اللاعنون ..
يدوسون عليها ..
والأعين في الطرقات ترصدها ..
تتابع خطواتها ..
الناس يهمسون خلفها ..
لا تسمعهم ..
ولكنهم .. ينهشون لحمها ..
يقتاتون .. من سيرتها ..
ما ذنبها ؟؟
ولدت .. بصحيفة سوداء ..
مثل الفجيعة لونها ..
ما ذنبها ؟؟
زهرة فائح أريجها ..
غطى عليها عفن المكان ..
ما ذنبها ؟؟
ذاك قدرها ..
أن تأتي للوجود بغير أمرها ..
والبذرة الملعونة ..
لم تكن يوما اختيارها ..
قولوا بربكم ..
ما ذنبها ؟؟؟؟؟






(نتابع بإذن الله )

  رد مع اقتباس
 
 
 
 
قديم 14-02-09, 12:48 PM   #12
قريرابي ماسي
 
الصورة الرمزية طارق عبدالرحيم الأسطى





طارق عبدالرحيم الأسطى غير متواجد حالياً

من مواضيعي :
افتراضي رد: ورد شاربة من موية المجاري !!!

زولتك دي اظنها خضراء الدمن زاتها

  رد مع اقتباس
 
 
 
 
قديم 14-02-09, 06:17 PM   #13
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة طارق عبدالرحيم الأسطى مشاهدة المشاركة
زولتك دي اظنها خضراء الدمن زاتها

لكن ما باااااااااالغت .. يا شيخ طارق ..
ما ضيعت صاحبتنا مرررررررررررره واحده !!

ياخوي خضراء الدمن .. المرأة الحسناء في المنبت السوء !!!
وبطلة قصتنا .. نعم هي نتيجة .. علاقة غير شرعية ..
ولكنها تربت تربية سليمة .. والنتيجة أخلاقها القويمة ...
ولا رأيك شنو ؟؟!!!

  رد مع اقتباس
 
 
 
 
قديم 14-02-09, 06:25 PM   #14
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

(8)


مرّّ على قعدتنا ديك حوالي أسبوع .. أنا انشغلت .. كنت بطلع فجر بدري .. الساعة ستة ونص أكون في الظلط .. وأرجع البيت متأخر .. قابلت صاحبي فيها مرة ولا مرتين .. وما كنا بنجيب سيرة الموضوع ..

في يوم وكان جمعة .. كنت مرخم في البيت .. جا داخل .. سلم ورقد في السرير الجنبي .. أنا كنت راقد في السرير الجنب الشباك .. وأتابع حركة الماره في الشارع .. الكهرباء قاطعة .. ومره مره .. كدا الشجر القدام البيت يتحرك .. ويسكن مرة تانية .. ومع حركتو دي .. يجينا حبة نسام .. يخفف من الكتمه شوية .. قبلت عليهو .. قلت أشوف نهاية القصة ..

- وين يا صاحبي .. من القعدة ديك وتاني ما لقينا فرصة ..
- أيوه .. انت مشغول .. وأنا كنت عندي شوية حاجات كدا جاري وراها ..
- والموضوع داك .. خلاص ؟؟ انتهيت منو ؟؟
- انتهيت منو .. وأنا ذاتي انتهيت ..
- وريني .. نهيتو كيف .. وقلت للمسكينة ديك شنو ؟؟
- أبدا .. اعتذرت ليها .. وقلت ليها مافي نصيب .. واتحججت ليها بأنو الأهل معترضين .. وما موافقين إني أعرس من برة الأسرة .. وقلت ليها إنها أكيد راح تلقى شخص تاني أحسن مني .. ودي ما نهاية الحياة .. وكلام كتير كدا .. كلو ما مقتنع بيهو .. بس كان لازم .. أحاول ما أجرح مشاعرها ..
- تجرح مشاعرها .. دا انت قطعتها قطيع !!!
- بالله .. عليك الله ما تنكت الجرح .. الموضوع خلاص .. أنا ما صدقت إني انتهيت منو ..
- براحتك .. لكن .. هي كان إحساسها شنو .. وقالت ليك شنو ..
- تعرف .. ما قالت إي كلمة .. سمعت كلامي كلو .. وفي النهاية .. جرن دموعها شوووووووووو .. ومشت خلتني واقف في محلي .. ومن الساعة ديك .. قطعت رجلها من البقالة .. ومن الشارع ذاتو .. الحصل عليها شنو .. ما بعرفو ..
- حا يكون حاصل شنو .. تلقاها حبست نفسها في البيت .. يعني انت دايرها .. بعد الاستعداد للعرس .. والفرحة الكانت فيها .. وتجي أنت .. ترمي ليها قنبلة زي دي .. عاوزها تكون كيف .. دي أكيد جاتها أزمة نفسية .. الله يسامحك ياخي ..
- يازول .. حا تقفل على الموضوع دا .. ولا أقوم أمشي ..
- خلاص .. حا أقفل عليهو .. هو في شيء تاني يتقال ...

مرت الأيام .. والشهور .. وترك (س) البقالة وفات جبرة ذاتها .. سمعت بيهو .. بعد فترة .. إنو اتبع طريقة من الطرق الصوفية .. وبقى وقتو كلو في المسيد .. وآخر حاجة سمعتها عنو .. إنو اتزوج بنت شيخ الطريقة .. والعهدة في هذا الخبر .. لمن أوصله لي ..

وانتهت بذلك قصة .. زهرتنا .. ودي كل الحكاية .. السؤال ( البيفضح نفسو) هنا .. لو انت مكان صاحبي دا ..
كان سويت شنووووووووووو ؟؟؟؟؟؟

  رد مع اقتباس
 
 
 
 
قديم 14-02-09, 07:52 PM   #15
عضو مجلس الادارة
 
الصورة الرمزية عمر الشيخ محمد حسن





عمر الشيخ محمد حسن غير متواجد حالياً

من مواضيعي :
افتراضي رد: ورد شاربة من موية المجاري !!!

ود أُختى على والله متابعين معاك القصة الحزينه دى من أولها ،الله لا ختانا مكان صاحبك لكن لو إفترضنا إنه دا حصل كذاب أى واحد يقولك انه سيتصرف خلاف تصرف صاحبنا س لأننا عايشين فى مجتمع محافظ ولايرحم أنا معاك البنيه مسكينة وماعندها ذنب فى الحصل و هى ضحية لجرم ليس لها فيه يد ولكن هذا قدرها وإذا نظرة مجتمعنا لم تتغير فلا أظن أن هناك حلول لمثل هذه الحالات وهذا موضوع جدير بالنقاش وعايزين شخص متخصص يقولنا رأى الدين شنو فى مثل حالة صاحبتنا دى ،ومشكور على هذا الإبداع وهذا السرد القصصى الرائع ولك خالص التقدير وتقبل مرورى .

آخر تعديل عمر الشيخ محمد حسن يوم 14-02-09 في 07:57 PM.
  رد مع اقتباس
 
 
 
 
قديم 15-02-09, 09:03 AM   #16
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة عمر الشيخ محمد حسن مشاهدة المشاركة
ود أُختى على والله متابعين معاك القصة الحزينه دى من أولها ،الله لا ختانا مكان صاحبك لكن لو إفترضنا إنه دا حصل كذاب أى واحد يقولك انه سيتصرف خلاف تصرف صاحبنا س لأننا عايشين فى مجتمع محافظ ولايرحم أنا معاك البنيه مسكينة وماعندها ذنب فى الحصل و هى ضحية لجرم ليس لها فيه يد ولكن هذا قدرها وإذا نظرة مجتمعنا لم تتغير فلا أظن أن هناك حلول لمثل هذه الحالات وهذا موضوع جدير بالنقاش وعايزين شخص متخصص يقولنا رأى الدين شنو فى مثل حالة صاحبتنا دى ،ومشكور على هذا الإبداع وهذا السرد القصصى الرائع ولك خالص التقدير وتقبل مرورى .


الخال عمر الشيخ

أشكرك شكر جزيل على متابعتك .. ومشاركتك ..

فعلاً القصة مؤلمة .. وتركت أثر في نفسي .. فما بالك بأبطالها !!

اقتباس:
الله لا ختانا مكان صاحبك لكن لو إفترضنا إنه دا حصل كذاب أى واحد يقولك انه سيتصرف خلاف تصرف صاحبنا س
أنا ذاااااااااااااتي قلت كدا ..

  رد مع اقتباس
 
 
 
 
قديم 15-02-09, 10:14 AM   #17
قريرابي ماسي
 
الصورة الرمزية طارق عبدالرحيم الأسطى





طارق عبدالرحيم الأسطى غير متواجد حالياً

من مواضيعي :
افتراضي رد: ورد شاربة من موية المجاري !!!

انت عرف يا علي ، في النهاية البنت حتى ولو اخلاقها زي السكر ولكن وجودها في الحياة سيكون مشكلة الي ان يرث الله الارض ومن عليها ، وسيتحمل نسلها القادم نتيجة هذا الخطاء ، انت تعرف زياد بن ابيه ، كان رجلا شجاعا حارب مع معاوية بن ابي سفيان ولكنه كان يشعر باسى بالغ لانه كان نتيجة علاقة ما طبيعية ، تتخيل في الجاهلية وليس في الاسلام ، وهو اخ لأب لمعاوية ، يقال ان معاوية اعترف به اخير ولكن برضو ظل هو زياد ابن ابيه. ولد ...............................................

  رد مع اقتباس
 
 
 
 
قديم 15-02-09, 10:32 AM   #18
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة طارق عبدالرحيم الأسطى مشاهدة المشاركة
انت عرف يا علي ، في النهاية البنت حتى ولو اخلاقها زي السكر ولكن وجودها في الحياة سيكون مشكلة الي ان يرث الله الارض ومن عليها ، وسيتحمل نسلها القادم نتيجة هذا الخطاء ، انت تعرف زياد بن ابيه ، كان رجلا شجاعا حارب مع معاوية بن ابي سفيان ولكنه كان يشعر باسى بالغ لانه كان نتيجة علاقة ما طبيعية ، تتخيل في الجاهلية وليس في الاسلام ، وهو اخ لأب لمعاوية ، يقال ان معاوية اعترف به اخير ولكن برضو ظل هو زياد ابن ابيه. ولد ...............................................

كلامك .. يا شيخ طارق .. فيه الحقيقة ..
هي فعلاً تحمل وصمة عار .. لا مهرب لها منه !!

هذه مشكلتها مع المجتمع .. لا يغفر لها ذنب ارتكبه غيرها !!

مع أن الله رب الناس يغفر .. ولكننا لا نغفر !!

بل أننا لا نتقبل .. فكرة التوبة والتكفير عن الخطأ .. وهذا لمن أخطأ
فما بالك بمن لم يخطيء ..

في قصة المرأة من جهينة لما زنت وحملت ووضعت ثم شُدت عليها ثيابها ..
ثم أمر بها فرُجمت ثم صلى عليها النبي صلى الله عليه وسلم..
فقال عمر: تصلي عليها يا رسول الله وقد زنت؟
قال: ( لقد تابت توبة لو قُسمت بين سبعين من أهل المدينة لوسعتهم ..
وهل وجَدْت أفضل من أن جادت بنفسها لله عز وجل)


أنظر إلى مشاعر سيدنا عمر تجاه المرأة باعتبار أنها زانية ..
وأنت تعلم شدته وغيرته على الدين ..

وأنظر إلى الرحمة المهداة .. وخير من مشى على الأرض .. سيدنا وحبيبنا
محمد صلى الله عليه وسلم .. كيف تقبلها بعد توبتها !!

  رد مع اقتباس
 
 
 
 
قديم 15-02-09, 10:47 AM   #19
قريرابي ماسي
 
الصورة الرمزية طارق عبدالرحيم الأسطى





طارق عبدالرحيم الأسطى غير متواجد حالياً

من مواضيعي :
افتراضي رد: ورد شاربة من موية المجاري !!!

الله حرم الزنا وقرنه بقتل النفس ( واللذين لا يقتلون النفس التي حرم الله و لايزنون ) الله حرم الزنا لكي يكون امتداد الخلق نظيفا لا تشوبه اي شائبة و ولا تعكر صفوه هفوة او مزاج ، اخونا ابو رنس الله يغفر الزنوب والعاقل لا يتعامل بالعواطف ابدا

  رد مع اقتباس
 
 
 
 
قديم 15-02-09, 12:10 PM   #20
قريرابي ماسي
 
الصورة الرمزية علي محمد أحمد (أبورنس)





علي محمد أحمد (أبورنس) غير متواجد حالياً

من مواضيعي :
افتراضي رد: ورد شاربة من موية المجاري !!!

اقتباس:
المشاركة الأصلية كتبت بواسطة طارق عبدالرحيم الأسطى مشاهدة المشاركة
الله حرم الزنا وقرنه بقتل النفس ( واللذين لا يقتلون النفس التي حرم الله و لايزنون ) الله حرم الزنا لكي يكون امتداد الخلق نظيفا لا تشوبه اي شائبة و ولا تعكر صفوه هفوة او مزاج ، اخونا ابو رنس الله يغفر الزنوب والعاقل لا يتعامل بالعواطف ابدا

شيخنا طارق .. بارك الله فيك .. ونفعنا بعلمك ..
ومشكور على المداخلة القيمة !!!

  رد مع اقتباس
 
 
إضافة رد

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة
الانتقال السريع

المواضيع المتشابهه
الموضوع كاتب الموضوع الأقسام الرئيسية مشاركات المشاركة الاخيرة
كيف تكتب بالماوس فى غياب الكيبورد ( لوحة المفاتيح) اشتياق القرير الكومبيوتر والبرامج والانترنت 2 15-11-09 06:56 PM
موجة غبار وأتربة شديدة تغطي سماء العاصمة السعودية الرياض طارق عبدالرحيم الأسطى منتدى الحوار العام 5 11-03-09 09:53 PM
لفائدتكم مختصرات فى لوحة المفاتيح (الكيبورد) اشتياق القرير الكومبيوتر والبرامج والانترنت 1 18-01-09 02:50 PM

---
شارك هذا الموضوع مع أصدقائك على الفيس بوك
Share

الساعة الآن »02:39 PM.


Powered by vBulletin® Version 2017
.Copyright ©2000 - 2017, Jelsoft Enterprises Ltd
جميع الحقوق محفوظة لمنتديات القرير .Copyright ©2008- المواضيع المكتوبة تعبر عن رأي كاتبيها ولا تعبر عن رأي ادارة منتديات القرير free counters
شركة نوفــ العربية ــل